தமிழகத்தில் அரசுப் பள்ளிகளின் பராமரிப்புப் பணிகளில் சுமார் 80 சதவீதம் முறைகேடுகளும் ஊழலும் நடைபெற்றுள்ளதாக அமைச்சர் ஆதவ் அர்ஜுனா குற்றம்சாட்டியுள்ளார். சென்னையில் செய்தியாளர்களைச் சந்தித்த அவர், அரசுப் பள்ளிகளின் கட்டமைப்பு வசதிகள் மற்றும் பராமரிப்பு தொடர்பான ஆய்வுத் தரவுகளை வெளியிட்டார்.
15,661 கழிப்பறைகள் பயன்படுத்த முடியாத நிலையில்!
பொதுப்பணித்துறை மற்றும் கல்வித்துறை இணைந்து நடத்திய ஆய்வின்படி, தமிழகம் முழுவதும் 5,626 அரசுப் பள்ளிகள் பராமரிப்புப் பட்டியலில் உள்ளன.
இந்தப் பள்ளிகளில் சுமார் 30 ஆயிரம் கழிப்பறைகள் ஆய்வு செய்யப்பட்டுள்ளன. அவற்றில் 15,661 கழிப்பறைகள் மாணவர்கள் பயன்படுத்த முடியாத நிலையில் இருப்பதாக அமைச்சர் தெரிவித்தார். இது மொத்த எண்ணிக்கையில் பாதிக்கும் அதிகமாகும்.
பெண்கள் பள்ளிகளில் 65 சதவீத கழிப்பறைகளுக்குச் சீரமைப்பு தேவை
குறிப்பாக, பெண் குழந்தைகள் பயிலும் அரசுப் பள்ளிகளில் சுமார் 65 சதவீத கழிப்பறைகள் உடனடியாகச் சீரமைக்கப்பட வேண்டிய நிலையில் இருப்பதாக அவர் கூறினார்.
பள்ளிகளின் கட்டடங்கள் மற்றும் அடிப்படை வசதிகளின் தரத்தை மதிப்பிடுவதற்காக சிவப்பு, மஞ்சள் அல்லது ஆரஞ்சு, பச்சை எனப் பல்வேறு வண்ணங்களில் ஸ்டிக்கர்கள் ஒட்டப்பட்டு ஆய்வு மேற்கொள்ளப்பட்டுள்ளது.
இதன்படி, சிவப்பு நிறம் இடியும் நிலையில் உள்ள கட்டடங்களையும், மஞ்சள் அல்லது ஆரஞ்சு நிறம் உடனடிப் பராமரிப்பு தேவைப்படும் பகுதிகளையும், பச்சை நிறம் நல்ல நிலையில் உள்ளவற்றையும் குறிக்கிறது.
முந்தைய அரசுகள் மீது அமைச்சர் விமர்சனம்
அரசுப் பள்ளிகளில் முறையான பராமரிப்புப் பணிகள் மேற்கொள்ளப்படவில்லை என்றும், கடந்த காலங்களில் பராமரிப்புக்குத் தேவையான குறைந்தபட்ச நிதிகூட சரியாக ஒதுக்கப்படவில்லை என்றும் அமைச்சர் குற்றம்சாட்டினார்.
மேலும், இதுவரை எந்த அரசும் இத்தகைய விரிவான ஆய்வுத் தரவுகளை வெளிப்படையாகப் பொதுமக்கள் பார்வைக்கு வைத்ததில்லை என்றும் அவர் தெரிவித்தார்.
சீரமைப்புப் பணிகள் தீவிரப்படுத்தப்படும்
அரசு ஒப்பந்தங்களில் வெளிப்படைத்தன்மை உறுதி செய்யப்படும் என்றும், பொதுப்பணித்துறை சார்பில் பள்ளிக் கட்டடங்களின் தரம் முழுமையாக ஆய்வு செய்யப்பட்டு சீரமைப்புப் பணிகள் தீவிரப்படுத்தப்படும் என்றும் அமைச்சர் ஆதவ் அர்ஜுனா தெரிவித்துள்ளார்.
அரசுப் பள்ளிகளில் மாணவர்களுக்குத் தேவையான அடிப்படை வசதிகளை மேம்படுத்துவதற்கான நடவடிக்கைகள் மேற்கொள்ளப்படும் என்றும் அவர் கூறியுள்ளார்.