தமிழகத்தின் மின்தேவையைச் சமாளிக்கும் வகையில், வெளிச்சந்தையில் மின்சாரம் கொள்முதல் செய்வதற்கான நடவடிக்கைகளைத் தமிழ்நாடு மின்சார வாரியம் தொடர்ந்து மேற்கொண்டு வருகிறது.
இதன் ஒரு பகுதியாக, ஜனவரி முதல் ஜூன் மாதம் வரையிலான ஆறு மாதங்களுக்கு மின்சாரம் கொள்முதல் செய்வதற்கான ஐந்தாவது குறுகிய கால ஒப்பந்தப் புள்ளி (டெண்டர்) வெளியிடப்பட்டது.
இந்த ஆறு மாத காலத்திற்கு மொத்தம் 17,000 மெகாவாட் மின்சாரம் கொள்முதல் செய்வதற்கான டெண்டர் கோரப்பட்டிருந்தது. இந்த டெண்டர் இன்று திறக்கப்பட்ட நிலையில், பல்வேறு மின்சார உற்பத்தி மற்றும் விநியோக நிறுவனங்கள் ஒரு யூனிட் மின்சாரத்திற்கு ரூ.9 முதல் ரூ.20 வரை விலைப்புள்ளிகளைச் சமர்ப்பித்திருந்தன.
ரூ.9.50 முதல் ரூ.13 வரை விலைப்புள்ளிகள் ஏற்க முடிவு!
நிறுவனங்கள் சமர்ப்பித்த விலைப்புள்ளிகளைப் பரிசீலித்த மின்சார வாரியம், ஜனவரி முதல் ஜூன் வரையிலான காலத்திற்கு ஒரு யூனிட் மின்சாரத்தை ரூ.9.50 முதல் ரூ.13 வரையிலான விலையில் கொள்முதல் செய்ய முடிவு செய்துள்ளது. சனி, ஞாயிறு உள்ளிட்ட வார இறுதி நாட்களைத் தவிர்த்து, மற்ற நாட்களில் மின்சாரம் கொள்முதல் செய்யத் திட்டமிடப்பட்டுள்ளது.
மாத வாரியாக மின்சாரக் கொள்முதல் விவரம்:
ஜனவரி மாதத்தில் ஒரு யூனிட் ரூ.13 என்ற விலையில் 81 மெகாவாட் மின்சாரமும், பிப்ரவரி மாதத்தில் ஒரு யூனிட் ரூ.9.50 என்ற விலையில் 2,421 மெகாவாட் மின்சாரமும் கொள்முதல் செய்யத் திட்டமிடப்பட்டுள்ளது.
மார்ச் மாதத்தில் ஒரு யூனிட் ரூ.10 என்ற விலையில் 2,099 மெகாவாட் மின்சாரமும், ஏப்ரல் மாதத்தில் ஒரு யூனிட் ரூ.10 என்ற விலையில் 1,629 மெகாவாட் மின்சாரமும் கொள்முதல் செய்யப்பட உள்ளது.
மே மாதத்தில் ஒரு யூனிட் ரூ.9.95 என்ற விலையில் 1,480 மெகாவாட் மின்சாரமும், ஜூன் மாதத்தில் ஒரு யூனிட் ரூ.13 என்ற விலையில் 521 மெகாவாட் மின்சாரமும் கொள்முதல் செய்ய முடிவு செய்யப்பட்டுள்ளது.
இதன் மூலம் தமிழகத்தின் மின்தேவையைச் சமாளிக்கும் நோக்கில், அடுத்த ஆறு மாதங்களுக்கான மின்சாரக் கொள்முதலைத் திட்டமிட்டு மேற்கொள்ள மின்சார வாரியம் நடவடிக்கை எடுத்துள்ளது.