தமிழகத்தில் பெண்கள் மற்றும் குழந்தைகளுக்கு எதிரான குற்றச்சம்பவங்கள் தொடர்ந்து நடைபெற்று வருவதாகவும், தவெக நிர்வாகிகள் மீதும் பாலியல் அத்துமீறல் புகார்கள் எழுந்து வருவதாகவும் கூறி, முதலமைச்சர் ஜோசப் விஜய்க்கு அம்மா மக்கள் முன்னேற்றக் கழகப் பொதுச்செயலாளர் டிடிவி தினகரன் கடும் கண்டனம் தெரிவித்துள்ளார்.
இதுதொடர்பாக அவர் வெளியிட்டுள்ள அறிக்கையில், “தவெகவும் பாலியல் குற்றங்களும்” என்ற தலைப்பில் புத்தகமே எழுதலாம் என்ற அளவிற்கு நாள்தோறும் பாலியல் குற்றச்சம்பவங்கள் நடைபெறுவதாக விமர்சித்துள்ளார். பெண்களுக்கு எதிரான குற்றங்களுக்கு ‘No Compromise’ என்று கூறிய தவெக தலைவர் விஜய், தனது கட்சி நிர்வாகிகள் மீது எழும் குற்றச்சாட்டுகளில் என்ன நடவடிக்கை எடுக்கப் போகிறார் என்றும் கேள்வி எழுப்பியுள்ளார்.
தவெக நிர்வாகிகள் மீது எழும் பாலியல் புகார்கள்
திருவண்ணாமலை மாவட்டம் ஆரணியில், தவெக மாவட்டச் செயலாளர் தங்களிடம் தகாத முறையில் பேசுவதாகக் குற்றம்சாட்டி பெண் நிர்வாகிகள் அவரது அலுவலகம் முன்பு போராட்டத்தில் ஈடுபட்டதை டிடிவி தினகரன் சுட்டிக்காட்டியுள்ளார்.
அதேபோல், கோவை மாவட்டம் காரமடையில் தவெக ஒன்றியச் செயலாளர் ஆலோசனைக் கூட்டம் என்ற பெயரில் தன்னை அழைத்துப் பாலியல் ரீதியாகத் துன்புறுத்தியதாக பெண் நிர்வாகி ஒருவர் மாவட்ட ஆட்சியரிடம் புகார் அளித்துள்ளதாகவும் அவர் குறிப்பிட்டுள்ளார்.
தவெக சட்டமன்ற உறுப்பினர்கள் மீது எழுந்த குற்றச்சாட்டுகளிலும் உரிய நடவடிக்கை எடுக்கப்படவில்லை என்றும், கட்சியின் அடிமட்ட நிர்வாகிகள் முதல் மாவட்டச் செயலாளர்கள் வரை பெண்களுக்கு எதிரான பாலியல் அத்துமீறல்களில் ஈடுபடுவதாகப் புகார்கள் எழுந்தும் தலைமை அவற்றைக் கண்டுகொள்ளாமல் இருப்பதாகவும் டிடிவி தினகரன் குற்றம்சாட்டியுள்ளார்.
தொடர் குற்றச்சம்பவங்கள் குறித்து கேள்வி
தமிழகத்தில் அடுத்தடுத்து நடைபெறும் பல்வேறு குற்றச்சம்பவங்களையும் தனது அறிக்கையில் பட்டியலிட்டுள்ள டிடிவி தினகரன், திருப்பூர் வீரபாண்டியில் 11 வயது சிறுமி கடத்தப்பட்டுப் பாலியல் வன்கொடுமைக்கு உள்ளாக்கப்பட்ட சம்பவம், விழுப்புரத்தில் பெண்ணின் கழுத்தில் கத்தியை வைத்து 16 சவரன் நகைகள் கொள்ளையடிக்கப்பட்ட சம்பவம் ஆகியவற்றைக் குறிப்பிட்டுள்ளார்.
மேலும், தமிழ்நாடு ஊரக வளர்ச்சித் துறையின் ரூ.22 கோடி நிதி டிஜிட்டல் முறையில் திருடப்பட்டதாகக் கூறப்படும் விவகாரம், மதுரையில் பிரபல நகைக்கடையில் 500 பவுன் நகைகள் திருடப்பட்ட சம்பவம், திருவாரூரில் ஏழு பேராசிரியர்களின் வீடுகளில் நடைபெற்ற கொள்ளை, நாமக்கல் மாவட்டம் பள்ளிபாளையம் அருகே ஏழு வீடுகளில் நள்ளிரவில் கொள்ளை முயற்சி, காஞ்சிபுரத்தில் டாஸ்மாக் வசூல் பணம் ரூ.1.5 கோடி கொள்ளையடிக்கப்பட்ட சம்பவம் ஆகியவற்றையும் அவர் சுட்டிக்காட்டியுள்ளார்.
செஞ்சி பகுதியில் மாயமான சிறுமியை ஒரு மாதத்திற்கும் மேலாகியும் கண்டுபிடிக்க முடியாமல் காவல்துறை திணறுவதாகவும் தனது அறிக்கையில் குறிப்பிட்டுள்ளார்.
சட்டம் ஒழுங்கு முதலமைச்சரின் கட்டுப்பாட்டில் உள்ளதா?
தொடர்ச்சியாக நடைபெறும் கொலை, கொள்ளை மற்றும் பெண்கள், குழந்தைகளுக்கு எதிரான குற்றச்சம்பவங்களையும், அவற்றைத் தடுத்து கண்டறிய வேண்டிய காவல்துறையின் செயல்பாடுகள் குறித்தும் கேள்வி எழுப்பியுள்ள டிடிவி தினகரன், தமிழகத்தில் சட்டம் ஒழுங்கு என்று ஒன்று இருக்கிறதா என்றும், அது முதலமைச்சரின் கட்டுப்பாட்டில்தான் உள்ளதா என்றும் விமர்சித்துள்ளார்.
தவெகவினர் மீதும் பாரபட்சமின்றி நடவடிக்கை எடுக்க வலியுறுத்தல்
குற்றச்செயல்களில் ஈடுபடுவோர் தனது சொந்தக் கட்சியினராக இருந்தாலும், அவர்கள் மீது எவ்விதப் பாரபட்சமுமின்றிக் கடுமையான சட்ட நடவடிக்கை எடுக்க வேண்டும் என டிடிவி தினகரன் வலியுறுத்தியுள்ளார். இதுவே குற்றங்களைக் குறைக்கவும், எதிர்காலத்தில் இத்தகைய சம்பவங்கள் நிகழாமல் தடுக்கவும் உதவும் என்றும் தெரிவித்துள்ளார்.
தமிழகத்தின் சட்டம் ஒழுங்கைச் சீரமைக்கவும், தவெக நிர்வாகிகள் மீது எழும் குற்றச்சாட்டுகள் தொடர்பாகப் பாரபட்சமின்றி நடவடிக்கை எடுக்கவும் முதலமைச்சர் ஜோசப் விஜய் முன்வர வேண்டும் என அவர் வலியுறுத்தியுள்ளார்.