“வந்தே மாதரம் மசோதா மதச்சார்பின்மைக்கு எதிரானது!” — நாடாளுமன்றத்தில் தி.மு.க. எம்.பி. கனிமொழி ஆவேச உரை!

“சட்டத்தின் மூலம் தேசியவாதத்தைத் திணிக்க முடியாது!” என மக்களவையில் கடும் எதிர்ப்பு!

நாடாளுமன்ற மக்களவையில் தாக்கல் செய்யப்பட்ட ‘தேசிய கௌரவ அவமதிப்புத் தடுப்பு திருத்த மசோதா’விற்கு (வந்தே மாதரம் மசோதா) தி.மு.க. நாடாளுமன்றக் குழுத் தலைவரும் எம்.பி.யுமான கனிமொழி தனது கடுமையான எதிர்ப்பைப் பதிவு செய்துள்ளார். மக்களவையில் இக்கூட்டத்தொடரில் நடைபெற்ற காரசாரமான விவாதத்தின் போது உரையாற்றிய அவர், “தேசியவாதம் என்ற போர்வையில் தற்போதைய பா.ஜ.க. அரசு தனது இந்துத்துவ அஜெண்டாவை மக்கள் மீது திணிக்க முயல்கிறது. ஒரு சட்டத்தைக் கொண்டுவருவதன் மூலமாகவோ அல்லது கட்டாயப்படுத்துவதன் மூலமாகவோ குடிமக்களின் மனதில் தேசியவாதத்தையோ, நாட்டின் மீதான மரியாதையையோ ஒருபோதும் உருவாக்கிவிட முடியாது” என்று காட்டமாகத் தெரிவித்தார்.

“கூட்டாட்சித் தத்துவத்திற்கும் மாநில உரிமைகளுக்கும் அச்சுறுத்தல்!”
தொடர்ந்து பேசிய கனிமொழி எம்.பி., இந்திய அரசியலமைப்புச் சட்டத்தின் வரலாற்றுப் பின்னணியைச் சுட்டிக்காட்டிப் பேசுகையில், “நாட்டின் அரசியலமைப்புச் சட்டச் சிற்பிகளும் முன்னோடித் தலைவர்களும் தொலைநோக்குப் பார்வையுடன் வந்தே மாதரம் பாடலின் முதல் இரண்டு சரணங்களுக்கு மட்டுமே சட்டப்பூர்வ அங்கீகாரமும் முக்கியத்துவமும் அளித்தனர்.”

பிளவுபடுத்தும் அரசியல்
“ஆனால், தற்போதைய அரசு தனது சுய அரசியல் ஆதாயத்திற்காகவும் சமூகத்தைப் பிளவுபடுத்துவதற்காகவும் முழுப் பாடலையும் பாடுவதைக் கட்டாயமாக்கி, மீறினால் குற்றவியல் நடவடிக்கை எடுக்க வழிவகுக்கும் ஆபத்தான சூழலை உருவாக்குகிறது.”

மாநில வாழ்த்துப் பாடல்
“தமிழ்நாடு உள்ளிட்ட பல்வேறு மாநிலங்களில் கடந்த 50 ஆண்டுகளுக்கும் மேலாக மாநில வாழ்த்துப் பாடல் அதிகாரப்பூர்வமாக நடைமுறையில் உள்ளது. அங்கு மாநில வாழ்த்துப் பாடலுக்கே முதலிடம் அளிக்கப்பட்டு வருகிறது.” “மாநிலங்களின் கருத்துகளைக் கேட்காமலும், எந்தவித முறையான விவாதங்களும் இன்றியும் இவ்வளவு முக்கியத்துவம் வாய்ந்த மசோதாவை அவசர அவசரமாக நிறைவேற்றத் துடிப்பது நாட்டின் கூட்டாட்சித் தத்துவத்திற்கும் மதச்சார்பின்மைக்கும் எதிரானது” என்றும் அவர் குற்றம்சாட்டினார்.

பா.ஜ.க. உறுப்பினர் சம்பித் பாத்ரா பதில் உரை
தி.மு.க.வின் குற்றச்சாட்டுகளுக்குப் பதிலளித்துப் பேசிய பா.ஜ.க. நாடாளுமன்ற உறுப்பினர் சம்பித் பாத்ரா, “1950-ஆம் ஆண்டு அரசியல் நிர்ணய சபையில் அன்றைய தலைவர் டாக்டர் ராஜேந்திர பிரசாத் தெரிவித்த கருத்துகள் மற்றும் வழிகாட்டுதலின் அடிப்படையிலேயே இந்தச் சட்டத்திருத்தம் கொண்டுவரப்படுகிறது. வந்தே மாதரம் பாடலுக்கு தேசிய கீதத்திற்கு இணையான கௌரவத்தையும் சட்டப்பூர்வ பாதுகாப்பையும் வழங்குவதே இதன் நோக்கம்.” எதிர்க்கட்சிகளின் தொடர் அமளி மற்றும் வெளிநடப்புகளுக்கு இடையே, இந்த மசோதா மீதான காரசாரமான விவாதங்கள் மக்களவையில் தொடர்ந்து நடைபெற்றது.

நீட் தேர்வு முற்றிலும் தோற்றுவிடவில்லை: மறுக்க முடியாத சாதனைகளும், களையப்பட வேண்டிய கவலைகளும்! – டாக்டர் ஜி.ஆர். ரவீந்திரநாத்