ஏமன்: செங்கடலில் உள்ள பாப் எல் மண்டிப் (Bab el-Mandeb) நீரிணைப் பகுதியில், ஹவுத்தி கிளர்ச்சியாளர்கள் நடத்தியதாகக் கருதப்படும் தாக்குதலில் சரக்குக் கப்பல் ஒன்று சிக்கி, மூன்று பேர் உயிரிழந்துள்ளனர். மத்திய கிழக்கு பிராந்தியத்தில் நிலவும் போர்ச் சூழலுக்கு மத்தியில், கப்பல் போக்குவரத்து மீது நடத்தப்பட்ட இந்தத் தாக்குதல் பெரும் அதிர்வலைகளை ஏற்படுத்தியுள்ளது.
தாக்குதலின் பின்னணி
தான்சானியா நாட்டுக்கொடியுடன் ‘திஹாமா’ (Tihama) என்ற பெயரில் இயங்கிய அந்த சரக்குக் கப்பல், ஓமனின் சலா துறைமுகத்திலிருந்து ஜிபூட்டி நோக்கிப் பயணித்துக் கொண்டிருந்தபோது இந்தத் தாக்குதல் நிகழ்ந்துள்ளது. இந்தத் தாக்குதலில் கப்பலில் இருந்த பாகிஸ்தானைச் சேர்ந்த இருவர் உட்பட மூன்று பேர் உயிரிழந்துள்ளதாக ஏமன் அரசு மற்றும் கடலோரக் காவல்படை அதிகாரிகள் உறுதிப்படுத்தியுள்ளனர். மத்திய கிழக்கு மோதல் தீவிரமடைந்த பிறகு, ஹவுத்திகளின் தாக்குதலில் பதிவாகும் முதல் உயிரிழப்பு இதுவாகும் என்பது குறிப்பிடத்தக்கது.
சர்வதேச வர்த்தகத்தில் கடும் பாதிப்பு
இந்தச் சம்பவம் சர்வதேச வர்த்தகப் பாதையான பாப் எல் மண்டிப் நீரிணையின் பாதுகாப்பைக் கேள்விக்குறியாக்கியுள்ளது. ஏற்கனவே ஹர்மூஸ் நீரிணை மூடப்பட்டுள்ள சூழலில், ஹவுத்திகளின் இத்தகைய ஆக்கிரமிப்பு நடவடிக்கைகள் கப்பல் போக்குவரத்து நிறுவனங்களிடையே கடும் நிச்சயமற்ற தன்மையை உருவாக்கியுள்ளன.
கெப்லர் (Kpler) தரவுகளின்படி, கடந்த வாரம் இந்த நீரிணை வழியாகச் சென்ற கப்பல்களின் எண்ணிக்கை கணிசமாகக் குறைந்துள்ளது. இயல்பாக தினசரி 50 கப்பல்கள் கடந்து சென்ற நிலையில், தற்போது சராசரியாக 32 கப்பல்கள் மட்டுமே இந்த வழியாகப் பயணிக்கின்றன.
முற்றுகையும் மோதலும்
கடந்த மாதம் சவுதி அரேபியாவுக்கு எதிராகக் கடற்படை முற்றுகையை அறிவித்த ஹவுத்திகள், சவுதி அரேபியா ஏமன் மீது முற்றுகையை ஏற்படுத்தியதாகக் குற்றம் சாட்டியிருந்தனர். எனினும், சவுதி தரப்பு இந்தக் குற்றச்சாட்டை மறுத்துள்ளது. பிப்ரவரி இறுதியில் ஈரான் மீது அமெரிக்கா மற்றும் இஸ்ரேல் நடத்திய தாக்குதல்களுக்குப் பிறகு, இப்பிராந்தியத்தில் மோதல்கள் உச்சகட்டத்தை எட்டியுள்ளன.
இந்தத் தாக்குதலுக்கு ஹவுத்திகள் அதிகாரப்பூர்வமாக இதுவரை பொறுப்பேற்கவில்லை என்றாலும், செங்கடல் பகுதியில் நிலவும் இந்தப் பதற்றமான சூழல், உலகளாவிய சரக்கு போக்குவரத்தை முடக்கும் அபாயத்தை நோக்கிச் சென்று கொண்டிருக்கிறது.