Homeசெய்திகள்உலகம்அமெரிக்கத் தலைநகரை குறிவைக்கிறதா ஈரான்? கதிரியக்க வெடிகுண்டு தாக்குதல் குறித்து உளவுத்துறை எச்சரிக்கை!

அமெரிக்கத் தலைநகரை குறிவைக்கிறதா ஈரான்? கதிரியக்க வெடிகுண்டு தாக்குதல் குறித்து உளவுத்துறை எச்சரிக்கை!

-

- Advertisement -

அமெரிக்கத் தலைநகர் வாஷிங்டன் டி.சி.யில் கதிரியக்க வெடிகுண்டு அல்லது ரசாயன ஆயுதத் தாக்குதலை நடத்த ஈரான் திட்டமிட்டு வருவதாக அமெரிக்க உளவுத்துறை எச்சரிக்கை விடுத்துள்ளது.

அமெரிக்காவின் மூத்த அரசுத் தலைவர்களைக் குறிவைத்து இந்தத் தாக்குதல் நடத்தத் திட்டமிடப்பட்டுள்ளதாக ஏழு அமெரிக்க அதிகாரிகளை மேற்கோள் காட்டி சிஎன்என் செய்தி வெளியிட்டுள்ளது. இருப்பினும், இந்தத் திட்டத்தை ஈரான் செயல்படுத்தும் திறன் அல்லது நோக்கம் குறித்து அமெரிக்க அதிகாரிகளிடையே ஒருமித்த கருத்து இல்லை என்றும் அந்தச் செய்தியில் தெரிவிக்கப்பட்டுள்ளது.

உடனடி தாக்குதலுக்கான அறிகுறி இல்லை:

உளவுத்துறைக்குக் கிடைத்ததாகக் கூறப்படும் தகவல்கள், தாக்குதல் உடனடியாக நடைபெறப்போகிறது என்பதைக் காட்டவில்லை. மாறாக, எதிர்காலத்தில் பயன்படுத்தக்கூடிய வாய்ப்புகளை உருவாக்கும் முயற்சியாக இருக்கலாம் எனத் தகவலறிந்த அதிகாரிகள் தெரிவித்துள்ளனர்.

அதே நேரத்தில், வாஷிங்டனில் சாத்தியமான இலக்குகள் மற்றும் இடங்கள் குறித்த குறிப்பிட்ட தகவல்கள் கிடைத்துள்ளதாகவும், இதையடுத்து அமெரிக்க அதிகாரிகள் முன்னெச்சரிக்கைத் திட்டங்களை ஆலோசித்து வருவதாகவும் கூறப்படுகிறது.

வெள்ளை மாளிகை விளக்கம்:

இந்த விவகாரம் குறித்து வெள்ளை மாளிகை செய்தித் தொடர்பாளர் லாரன் பிஸ் வெளியிட்ட அறிக்கையில், “சாத்தியமான அனைத்து அச்சுறுத்தல்களையும் அமெரிக்கா கண்காணித்து வருகிறது. இருப்பினும், தற்போதைய நிலையில் அமெரிக்காவுக்கு நம்பகமான அச்சுறுத்தல் எதுவும் இல்லை” என்று தெரிவித்துள்ளார்.

இதற்கிடையே, இந்தச் செய்தி குறித்து கருத்து தெரிவித்த அதிபர் டொனால்ட் டிரம்ப், அமெரிக்க அரசு இந்தத் தகவலைத் தீவிரமாக எடுத்துக்கொண்டு விசாரித்து வருவதாகக் கூறியுள்ளார். அமெரிக்கா மீது தாக்குதல் நடத்தப்பட்டால் கடுமையான விளைவுகளைச் சந்திக்க நேரிடும் என்றும் அவர் எச்சரித்துள்ளார்.

ஈரான் மறுப்பு:

அமெரிக்க உளவுத்துறை தகவல் குறித்து ஈரான் தரப்பில் மறுப்பு தெரிவிக்கப்பட்டுள்ளது. ரசாயன ஆயுதங்கள் தொடர்பான குற்றச்சாட்டுகளை ஈரான் ஐ.நா. தூதரகம் நிராகரித்துள்ளது. ஈரான் வெளியுறவு அமைச்சக செய்தித் தொடர்பாளரும் இந்தத் தகவல்களை ஆதாரமற்றவை என்றும் புனையப்பட்டவை என்றும் விமர்சித்துள்ளார்.

போர் பதற்றத்துக்கு மத்தியில் புதிய சர்ச்சை:

கடந்த பிப்ரவரி 28-ஆம் தேதி அமெரிக்கா மற்றும் இஸ்ரேல் இணைந்து நடத்திய தாக்குதலில் ஈரானின் அப்போதைய தலைமை மதகுரு அயதுல்லா அலி கமேனி கொல்லப்பட்டதாக வெளியான தகவல்களைத் தொடர்ந்து, இரு தரப்புக்கும் இடையிலான மோதல் தீவிரமடைந்தது.

தற்போது ஈரானின் புதிய தலைமை மதகுரு மோஜ்தபா கமேனி தலைமையிலான சூழலில், அமெரிக்கா – ஈரான் இடையேயான பதற்றம் நீடித்து வருகிறது.

ஹோர்முஸ் நீரிணைப் பகுதியில் நிலவும் பதற்றம் மற்றும் போரை முடிவுக்குக் கொண்டுவருவதற்கான பேச்சுவார்த்தைகளில் ஏற்பட்டுள்ள தேக்கநிலை ஆகியவற்றுக்கு மத்தியில் இந்த உளவுத்துறைத் தகவல் வெளியாகியுள்ளது.

எனினும், வாஷிங்டனில் உடனடி தாக்குதல் நடைபெறப்போகிறது என்பதற்கான உறுதியான ஆதாரம் இதுவரை பொதுவெளியில் வெளியிடப்படவில்லை.

உளவுத்துறை எச்சரிக்கை, வெள்ளை மாளிகையின் மதிப்பீடு மற்றும் ஈரானின் மறுப்பு ஆகியவற்றுக்கு இடையே இந்த விவகாரம் சர்வதேச கவனம் பெற்றுள்ளது.

அமெரிக்க வான்வழித் தாக்குதல்களை மீறி ஈரான் வசமிருக்கும் அதிநவீன ஆயுதங்கள்: உளவுத்துறை வெளியிட்ட பகீர் தகவல்கள்!

MUST READ