ரஷ்யாவின் தொடர் ஏவுகணை மற்றும் ட்ரோன் தாக்குதல்களை எதிர்கொள்ளும் வகையில், உக்ரைன் சுமார் 1,000 Patriot வான் பாதுகாப்பு ஏவுகணைகளைப் பெறுவதற்கான ஒப்பந்தங்களை மேற்கொண்டு வருகிறது.
உக்ரைன் பாதுகாப்புத்துறை அமைச்சர் யெவ்ஹென் க்மாரா, கூட்டணி நாடுகளின் உதவி மற்றும் ஐரோப்பிய ஒன்றியத்தின் கடன் மூலம் இந்த ஏவுகணைகளை வாங்குவதற்கான நடவடிக்கைகள் நடைபெற்று வருவதாக தெரிவித்துள்ளார். பெரும்பாலான ஏவுகணைகள் வரும் ஆண்டுகளில் வழங்கப்பட உள்ளதாகவும் அவர் கூறியுள்ளார்.
ஏன் Patriot ஏவுகணைகள் முக்கியம்?
ரஷ்யா சமீப காலமாக உக்ரைன் நகரங்கள் மற்றும் முக்கிய கட்டமைப்புகளை நோக்கி ஏவுகணை மற்றும் ட்ரோன் தாக்குதல்களை தீவிரப்படுத்தியுள்ளது.
குறிப்பாக பாலிஸ்டிக் ஏவுகணைகளை எதிர்கொள்வதில் Patriot அமைப்புகள் உக்ரைனின் முக்கியமான பாதுகாப்பு ஆயுதமாக உள்ளன. இதனால் போதுமான interceptor ஏவுகணைகள் இல்லாதது குறித்து உக்ரைன் தொடர்ந்து தனது கூட்டணி நாடுகளிடம் அவசர உதவி கோரி வருகிறது.
ஜெர்மனி, பிரிட்டன் உள்ளிட்ட நாடுகள் உதவி
ஜெர்மனி தனது கையிருப்பில் உள்ள Patriot PAC-2 interceptor ஏவுகணைகளில் ஒரு பகுதியை அவசரமாக உக்ரைனுக்கு வழங்குவதாக அறிவித்துள்ளது.
அதேபோல் பிரிட்டன், உக்ரைனின் வான் பாதுகாப்பை வலுப்படுத்த அமெரிக்க ராணுவ உபகரணங்களை வாங்குவதற்காக £100 மில்லியன் நிதியுதவி வழங்கியுள்ளது. இதில் Patriot அமைப்புகளும் அடங்கும்.
அமெரிக்காவும் கூடுதல் Patriot ஏவுகணைகளை வலியுறுத்துகிறது
உக்ரைனுக்கு உடனடியாக சுமார் 300 Patriot interceptor ஏவுகணைகள் தேவைப்படுவதாக அமெரிக்கா தனது கூட்டணி நாடுகளிடம் வலியுறுத்தியுள்ளது.
குளிர்காலம் நெருங்கும் நிலையில், ரஷ்யாவின் வான் தாக்குதல்களில் இருந்து உக்ரைனின் மின்சாரம், போக்குவரத்து மற்றும் பிற முக்கிய கட்டமைப்புகளை பாதுகாப்பது மிகப்பெரிய சவாலாக மாறியுள்ளது.
ரஷ்யாவின் தாக்குதல்கள் தொடர்கின்றன
இதற்கிடையில், ரஷ்யா மீண்டும் கீவ் உள்ளிட்ட உக்ரைன் பகுதிகளில் பெரிய அளவில் ட்ரோன் மற்றும் ஏவுகணை தாக்குதல்களை நடத்தியுள்ளது.
ஒரு சமீபத்திய தாக்குதலில் நூற்றுக்கணக்கான ட்ரோன்கள் மற்றும் ஏவுகணைகள் பயன்படுத்தப்பட்டதாக உக்ரைன் தெரிவித்துள்ளது. இதனால் கூடுதல் வான் பாதுகாப்பு ஆயுதங்களுக்கான கீவின் அவசர கோரிக்கை மேலும் அதிகரித்துள்ளது.
போர் முடிவுக்கு பேச்சுவார்த்தை ஒருபுறம்… ஆயுத உதவி மறுபுறம்!
ரஷ்யா–உக்ரைன் போரை முடிவுக்கு கொண்டுவர அமெரிக்கா தலைமையில் புதிய பேச்சுவார்த்தை முயற்சிகள் நடைபெற்று வரும் நிலையில், மறுபுறம் உக்ரைனுக்கு மேற்கத்திய நாடுகளின் ராணுவ உதவி தொடர்ந்து அதிகரித்து வருகிறது.
இதனால் போர் முடிவுக்கு வரும் முயற்சிகளும், உக்ரைனின் பாதுகாப்பை வலுப்படுத்தும் ராணுவ நடவடிக்கைகளும் ஒரே நேரத்தில் நடைபெற்று வருகின்றன.
ஏமன் சிறை மீது சவுதி வான்வழித் தாக்குதல்: பதிலடித் தாக்குதலில் 73 சவுதி குடிமக்கள் காயம்!