கூலி திரைப்படம், ‘2.0’ மற்றும் ‘ஜெயிலர்’ வரிசையில் இணைந்துள்ளதாக தகவல் வெளியாகி இருக்கிறது.
சூப்பர் ஸ்டார் ரஜினிகாந்த் நடிப்பில் தற்போது ‘ஜெயிலர் 2’ திரைப்படம் உருவாகி வருகிறது. இதற்கிடையில் ரஜினி, ‘கூலி’ திரைப்படத்தில் நடித்திருந்தார். இந்த படம் கடந்த ஆகஸ்ட் 14ஆம் தேதி திரைக்கு கொண்டுவரப்பட்டது. உலகம் முழுவதும் பிரம்மாண்டமாக மிகுந்த எதிர்பார்ப்புகளுடன் வெளியான இந்த படம் ஜெனரல் ஆடியன்ஸ் மத்தியில் கலவையான விமர்சனங்களை பெற்று வருகிறது. ஆனால் ரஜினி ரசிகர்கள் இந்த படத்தை கொண்டாடி வருகின்றனர். அதன்படி படம் வெளியான முதல் 4 நாட்களில் ரூ.400 கோடிக்கும் அதிகமாக வசூல் செய்ததாக படக்குழு அதிகாரப்பூர்வமாக அறிவித்தது. அதன் பிறகு படத்தின் வசூல் நாளுக்கு நாள் குறைய தொடங்கியது. 
இருப்பினும் இப்படம் தற்போது வரை உலக அளவில் ரூ.500 கோடியை கடந்து விட்டதாக சொல்லப்படுகிறது. ஏற்கனவே ரஜினியின் 2.0 மற்றும் ஜெயிலர் ஆகிய படங்கள் ரூ.500 கோடியை கடந்த நிலையில் கூலி திரைப்படம் அந்த லிஸ்டில் இணைந்துள்ளது.
‘கூலி’ திரைப்படத்தை சன் பிக்சர்ஸ் நிறுவனம் தயாரிக்க லோகேஷ் கனகராஜ் இயக்கி இருந்தார். அனிருத் இதற்கு இசையமைத்திருந்தார். இந்த படத்தில் ரஜினியுடன் இணைந்து ஸ்ருதிஹாசன், நாகார்ஜுனன், சத்யராஜ், சௌபின் சாஹிர் மற்றும் பலர் நடித்திருந்தனர் என்பது குறிப்பிடத்தக்கது.