தவெக வாக்காளர்கள் இலவச திட்டங்களை எதிர்ப்பவர்கள். அதேவேளையில் இலவச திட்டங்களை செயல்படுத்தி ஆட்சிக்கு வந்த அதிமுகவில் இருந்து செங்கோட்டையன் போன்றவர்கள் அங்கே செல்கிறபோது, இரு கட்சி வாக்குகளையும் ஒருங்கிணைக்க முடியாது என்று மூத்த பத்திரிகையாளர் தராசு ஷ்யாம் தெரிவித்துள்ளார்.
மூத்த பத்திரிகையாளர் தராசு ஷ்யாம், செங்கோட்டையன் தவெகவில் இணைந்ததன் சாதக, பாதகங்களை விளக்கு பிரபல யூடியூப் சேனலுக்கு அளித்த நேர்காணலில் தெரிவித்துள்ளதாவது:- அதிமுகவில் இருந்து நீக்கப்பட்ட செங்கோட்டையன் விஜய் முன்னிலையில் தவெகவில் இணைந்துள்ளார். அவர் தவெகவில் இணைந்ததால் யாருக்கு அரசியல் லாபம்? யாருக்கு நஷ்டம்? என்பதுதான் முக்கியது. மற்றபடி அவருடைய செய்தியாளர் சந்திப்பில் எந்த வித சுவாரஸ்மான விஷயங்களும் கிடையாது. சங்கடமான கேள்விகள் வந்தபோது அதை முழுமையாக தவிர்த்து விட்டார். எடப்பாடி பழனிசாமி எதிர்ப்பு என்பது தான் இதில் அடிப்படையான விஷயம். 2017 முதல் 2021 வரை எடப்பாடியின் அமைச்சரவையில் செங்கோட்டையனும் இருந்தார். அப்போது அவர் வைத்த குற்றச்சாட்டுகளுக்கும் ஒரு அமைச்சராக அவரும் கூட்டு பொறுப்புதான். எடப்பாடி பழனிசாமியும், செங்கோட்டையன் விவகாரத்தை நாசூக்காக கடந்து சென்றார். அவருடைய மனசாட்சிகளான செம்மலை, வைகைச் செல்வன் போன்றவர்கள் பதில் அளித்தனர். அதே சமயத்தில் அறிவாலயத்தில் உதயநிதி ஸ்டாலின் பிறந்தநாள் விழா கொண்டாடப்படுகிறது. இதன் மூலம் அடுத்த தலைமுறைக்கு திராவிட சித்தாந்தத்தை கொண்டு செல்ல வேண்டும் என்கிற எண்ணம் தெரிகிறது. இதன் மூலம் திராவிட இயக்க சித்தாந்தத்தை முதன்மையாக எடுத்துச்செல்ல போவது யார் என்கிற கேள்வி எழுகிறது. ஒருபுறம் அதை திமுக மற்றும் அதன் கூட்டணி கட்சிகள் எடுத்துவிட்டன. ஆட்சிக்கு எதிரான மனநிலையால் சேதாரங்கள் இருந்தபோதும் இது ஒரு முழுமையான வாக்கு வங்கியாக இருக்கிறது.
இதற்கு எதிராக ஒரு வாக்கு வங்கி நிலை நிறுத்தப்பட்டது. அது அதிமுக – பாஜக வாக்கு வங்கியாகும். இதில் அதிமுக வாக்கு வங்கி என்பது எம்ஜிஆர் வாக்கு வங்கியாகும். தற்போது எம்ஜிஆர் உடைய வாக்கு வங்கியில் ஒரு பகுதியை தான் செங்கோட்டையன் சிதைக்கிறார். இன்றைய காலகட்டத்தில் எம்ஜிஆர் வாக்கு வங்கி என்பது மூன்றாக பிரிந்துள்ளது. முதலாவது எடப்பாடி பழனிசாமி, இரண்டாவது ஓபிஎஸ் – டிடிவி தினகரன், 3வது செங்கோட்டையன். செங்கோட்டையன், எம்ஜிஆர் வாக்கு வங்கியில் ஒரு பகுதியை தவெகவுக்கு கொண்டுசெல்லும் முயற்சியில் இருக்கிறார். அப்போது அதிமுகவின் 33 சதவீத வாக்கு வங்கி மிகவும் சுருங்கும். 2024 தேர்தலில் எடப்பாடி பழனிசாமி 24 சதவீதம் வாக்குகளை வைத்திருந்தார். தற்போது அந்த வாக்குகளும் குறையும் என்பதுதான் என்னுடைய கணிப்பு. எனவே பாஜகவுக்கான வெற்றி வாய்ப்பு என்பது மிகவும் குறைகிறது.
அதிமுகவில் இருந்து மனோஜ் பாண்டியன் பிரிந்து செல்வது என்பது, ஒரு பகுதியில் அதிமுக வாக்கு வங்கியில் சரிவை ஏற்படுத்துவார். அதேநேரத்தில் ஓபிஎஸ், தினகரன் போன்றவர்கள் ஒரு சமுதாயத்தின் வாக்கு வங்கியில் பாதிப்பை ஏற்படுத்துவார்கள். எடப்பாடி பழனிசாமி வைத்திருக்கும் இரட்டை இலையின் வாக்கு வங்கி குறைகிற போது, பாஜகவுக்கு பழைய 4 இடங்கள் கூட கிடைப்பதற்கு வாய்ப்பு கிடையாது. செங்கோட்டையன், விஜய் ஆகியோர் தினகரன், ஓபிஎஸ்-ஐ தவெக கூட்டணிக்கு கொண்டுவர முயற்சி செய்வார்கள். ஆனால் அதனால் தவெகவுக்கு பாதிப்பும் இருக்கிறது. தவெகவின் பலம் அவர்கள் புதிய கட்சியாக இருப்பதுதான். திமுக, அதிமுகவுக்கு மாற்று நான் என்று விஜய் சொல்கிறார். அவருடைய கட்சியின் அடிப்படை வாக்காளர்களாக இருப்பது 30 வயதுக்குட்பட்ட இளைஞர்கள் தான். அவர்கள் இலவசத்தை எதிர்ப்பவர்கள். அதேவேளையில் அதிமுக தலைவர்களான எம்ஜிஆர், ஜெயலலிதா போன்றவர்கள் இலவச திட்டங்களை செயல்படுத்தியவர்கள். அந்த கட்சியில் உள்ள செங்கோட்டையன், டிடிவி தினகரன் போன்றவர்கள் தவெகவுக்கு செல்கிறபோது, பெரிய முரண் ஏற்படுகிறது. இது எப்படி வாக்குகளை ஒருங்கிணைக்கும்? செங்கோட்டையன், டிடிவி, ஓபிஎஸ் போன்றவர்களுக்கு தனிப்பட்ட முறையில் இது பலன் அளிக்கலாம். ஆனால் இதனால் விஜய்க்கு என்ன பலன்? செங்கோட்டையன் போன்றவர்கள் வெற்றி பெற்று, விஜய் தோற்றுவிட்டால் என்ன செய்வது?
முதலமைச்சர் மு.க.ஸ்டாலின், ஆளுநர் தமிழ்நாட்டிற்கு துரோகம் செய்கிறார். திமிரு எடுத்த ஆளுநரின் திமிரை அடக்க வேண்டும் என்று சொல்கிறார். அதற்கு காரணம் மத்திய அரசின் மேலாதிக்க எதிர்ப்பு, இந்தி எதிர்ப்பு, தமிழ் மொழி பாதுகாப்பு, தமிழ் மாநில உணர்வுகளை போற்றி பாதுகாக்க வேண்டும் என்பன போன்ற சித்திரம் அதற்குள்ளாக உள்ளது. இதை செய்வதற்கு சரியான நபர் ஸ்டாலின்தான். நூற்றுக்கு 40 பேர் அப்படிதான் நினைக்கிறார்கள். உதயநிதி ஸ்டாலின் பிறந்தநாள் கொண்டாட்டமும் அதை தான் காட்டுகிறது. தொடக்கத்தில் தவெகவும் அப்படிதான் இருந்தது. இளைய தலைமுறையினர் தான் மாற்றத்திற்கான சாவி. அவர்களால் தான் மாற்றத்தை கொண்டுவர முடியும். நானும் தவெக அப்படி வருகிறதோ என்று பார்த்தேன். ஆனால் தற்போது செங்கோட்டையன், டிடிவி தினகரன் போன்றவர்கள் விஜயிடம் செல்கிறபோது அது மொத்தமாக அடிபட்டு போய்விடும். அப்போது தவெக மற்றொரு அதிமுகவாக தான் தெரியும். காரணம் அவர்கள் அதிமுக வாக்கு வங்கியை தான் குறிவைக்கிறார்கள். எடப்பாடி பழனிசாமியின் செயல்பாடுகளை பிடிக்காத அதிமுகவினர், தவெகவுக்கு போகிறார்கள். அதற்கு முதலில் போய் சேர்ந்திருப்பவர் செங்கோட்டையன்.
செங்கோட்டையன், தவெக செல்வதற்கு அமித்ஷா ஏற்பாடு செய்திருப்பார் என்று நான் கருதவில்லை. கட்சி ஒற்றுமையாக இருந்தால் அடிப்படை வாக்கு வங்கி அப்படியே இருக்கும் என்பதுதான் எதார்த்தம். தவெக, அதிமுக – பாஜக கூட்டணிக்கு ஒருபோதும் போக முடியாது. அப்படியான நிலைப்பாட்டை அவர்கள் எடுத்துவிட்டனர். செங்கோட்டையன் மட்டுமிட்டுமின்றி அதிமுகவில் இருந்து பலரும் தவெகவிற்கு சென்றுள்ளனர். அதனால் தவெகவின் அரசியல் சட்டகத்தில் புத்துணர்ச்சியே கிடையாது. எனவே பாஜக செங்கோட்டையனை, தவெகவுக்கு அனுப்பி இருக்காது. வேண்டுமென்றால் பீகாரை போன்று இரு தரப்பையும் இணக்கமாக செல்ல முயற்சி செய்திருப்பார்கள். ஆனால் அது நடக்கவில்லை. அப்போது 2026 சட்டமன்றத் தேர்தலில் கூட்டணி கணக்குகள் மாறுகின்றன. அப்போது தமிழ்நாட்டில் 4 அணிகள் உருவாகும். இதன் காரணமாக 5வது அணி தாமாகவே வந்துவிடும், இவ்வாறு அவர் தெரிவித்தார்.