இசையமைப்பாளராகவும் நடிகராகவும் முத்திரை பதித்து வரும் ஜி.வி.பிரகாஷ் குமார் நடிப்பில் அடுத்ததாக உருவாகியுள்ள திரைப்படம் ‘ஹேப்பி ராஜ்’. இப்படத்தில் ஜி.வி.பிரகாஷுக்கு ஜோடியாக ‘லவ்வர்’ படத்தின் மூலம் கவனம் ஈர்த்த ஸ்ரீ கெளரி ப்ரியா நடித்துள்ளார்.
ரசிகர்கள் ஆவலுடன் எதிர்பார்த்துக் கொண்டிருக்கும் இப்படத்தின் அதிகாரப்பூர்வ ட்ரெய்லர் இன்று (மார்ச் 17) மாலை 6 மணிக்கு வெளியாகிறது. ரசிகர்களுக்கு இன்ப அதிர்ச்சியாக, இந்த ட்ரெய்லரை முன்னணி நடிகர் தனுஷ் தனது சமூக வலைதள பக்கங்கள் வாயிலாக வெளியிடுகிறார். நீண்ட கால நண்பர்களான தனுஷ் மற்றும் ஜி.வி.பிரகாஷ் இடையேயான இந்த நட்பு ரீதியான முன்னெடுப்பு சினிமா வட்டாரத்தில் நெகிழ்ச்சியை ஏற்படுத்தியுள்ளது.
மரியா ராஜா இளஞ்செழியன் இயக்கத்தில் உருவாகியுள்ள இப்படம் ஒரு கலகலப்பான ரொமாண்டிக் காமெடி (Rom-Com) ஜானரில் இருக்கும் என எதிர்பார்க்கப்படுகிறது.ஜி.வி.பிரகாஷ், ஸ்ரீ கெளரி ப்ரியா, அப்பாஸ் (நீண்ட இடைவேளைக்குப் பிறகு), ஜார்ஜ் மரியான் உள்ளிட்டோர் நடித்துள்ளனர்.
ஜஸ்டின் பிரபாகரன் இப்படத்திற்கு இசையமைத்துள்ளார்.திரைப்படம் வரும் மார்ச் 27, 2026 அன்று திரையரங்குகளில் வெளியாகத் தயாராகி வருகிறது.
ஏற்கனவே இப்படத்தின் பாடல்கள் மற்றும் ப்ரோமோக்கள் சமூக வலைதளங்களில் நல்ல வரவேற்பைப் பெற்றுள்ள நிலையில், இன்று வெளியாகும் ட்ரெய்லர் படத்தின் மீதான எதிர்பார்ப்பை இன்னும் அதிகரித்துள்ளது.