தமிழக சட்டமன்றத் தேர்தல் களம் சூடுபிடித்துள்ள நிலையில், திமுக கூட்டணியில் இணைந்துள்ள தேமுதிக போட்டியிடும் தொகுதிகள் குறித்த பேச்சுவார்த்தை இன்றும் தொடர்ந்தது. ஏற்கனவே கூட்டணி ஒப்பந்தம் கையெழுத்தான நிலையில், எந்தெந்தத் தொகுதிகளில் போட்டியிடுவது என்பதை இறுதி செய்வதில் இரு கட்சிகளுக்கும் இடையே இழுபறி நீடித்து வருவதாகத் தகவல்கள் வெளியாகியுள்ளன.
மீண்டும் பேச்சுவார்த்தை
திமுகவின் பேச்சுவார்த்தைக் குழுவுடன், தேமுதிகவின் எல்.கே. சுதீஷ் தலைமையிலான குழுவினர் இன்று மீண்டும் ஆலோசனை நடத்தினர். இந்தச் சந்திப்பின் போது, தேமுதிக தரப்பில் விருப்பப் பட்டியல் வழங்கப்பட்டதாகவும், அதில் உள்ள குறிப்பிட்ட சில முக்கியத் தொகுதிகளை ஒதுக்குவதில் உடன்பாடு எட்டப்படவில்லை என்றும் கூறப்படுகிறது.
3 தொகுதிகளில் சிக்கல்?
கிடைக்கப்பெற்ற தகவல்களின்படி, திமுக கூட்டணியில் தேமுதிகவுக்கு ஒதுக்கப்பட்ட தொகுதிகளில், குறிப்பாக 3 தொகுதிகளை இறுதி செய்வதில் தற்போது சிக்கல் நீடிக்கிறது. தேமுதிக கேட்கும் தொகுதிகளை திமுகவின் மாவட்டச் செயலாளர்கள் விட்டுக்கொடுக்கத் தயங்குவதே இந்த இழுபறிக்குக் காரணம் என அரசியல் வட்டாரங்கள் தெரிவிக்கின்றன.
இந்த இழுபறியைத் தீர்க்க இரு கட்சிகளின் தலைமை மட்டத்திலும் அடுத்தகட்ட பேச்சுவார்த்தைகள் நடைபெற்று வருகின்றன. இன்னும் ஓரிரு நாட்களில் தேமுதிக போட்டியிடும் தொகுதிகள் குறித்த அதிகாரப்பூர்வ பட்டியல் வெளியாகும் என எதிர்பார்க்கப்படுகிறது.
அதிமுக கூட்டணியில் தேமுதிக? – பேச்சுவார்த்தை இறுதிக்கட்டத்தை எட்டியதாக தகவல்!