நடிகர் சூர்யா நடிப்பில் வெளியான புகழ்பெற்ற திரைப்படமான “அயன்” படத்தில், வில்லன் கும்பல் போதைப்பொருள் அடங்கிய கேப்சூல்களை வயிற்றில் விழுங்கி கடத்திச் செல்லும் காட்சிகள் இடம்பெற்றிருக்கும். அதே சினிமா பாணியை நிஜத்தில் கையாண்டு, எத்தியோப்பியாவிலிருந்து சென்னைக்கு வயிற்றுக்குள் போதைப்பொருள் கடத்தி வந்த கென்ய நாட்டைச் சேர்ந்த இளம் பெண்ணை, மத்திய வருவாய் புலனாய்வுத் துறை (DRI) அதிகாரிகள் அதிரடியாகக் கைது செய்துள்ளனர். அவரிடமிருந்து பறிமுதல் செய்யப்பட்ட 850 கிராம் கொக்கயினின் சர்வதேச மதிப்பு ரூ.15 கோடி ஆகும்.
எத்தியோப்பியா நாட்டின் தலைநகர் அடிஸ் அபாபாவில் இருந்து சென்னை வரும் எத்தியோப்பியன் ஏர்லைன்ஸ் விமானத்தில், சர்வதேச போதைப்பொருள் கடத்தல் கும்பலைச் சேர்ந்த பெண் ஒருவர் பெருமளவில் கொக்கயின் கடத்தி வருவதாக DRI அதிகாரிகளுக்கு ரகசிய தகவல் கிடைத்தது.
இதனையடுத்து, DRI தனிப்படை அதிகாரிகள் நேற்று (திங்கட்கிழமை) காலை சென்னை சர்வதேச விமான நிலையத்தில் தீவிர கண்காணிப்பில் ஈடுபட்டனர். காலை 8.30 மணிக்கு விமானம் வந்து இறங்கியதும், பயணிகளை அதிகாரிகள் தீவிரமாக நோட்டமிட்டனர்.
எக்ஸ்ரே சோதனையில் அம்பலமான ரகசியம்
சுற்றுலா விசாவில் சென்னை வந்திறங்கிய கென்ய நாட்டைச் சேர்ந்த 35 வயது மதிக்கத்தக்க இளம் பெண் ஒருவரின் நடத்தை அதிகாரிகளுக்கு சந்தேகத்தை ஏற்படுத்தியது. அவரை நிறுத்தி விசாரித்தபோது முன்னுக்குப் பின் முரணாகப் பேசினார். சுங்கத்துறை அலுவலகத்திற்கு அழைத்துச் சென்று விசாரணை நடத்தியபோதும் அவர் வாய்திறக்காமல் மௌனம் சாதித்தார்.
அவரது உடைமைகளைச் சோதனை செய்தபோது அதில் எதுவும் சிக்கவில்லை. தொடர்ந்து சந்தேகமடைந்த அதிகாரிகள், ‘அயன்’ பட பாணியில் ஏதேனும் விபரீதம் இருக்குமோ என்ற நோக்கில், அவரை விமான நிலைய மருத்துவமனைக்கு அழைத்துச் சென்று வயிற்றுப் பகுதியை எக்ஸ்ரே (X-ray) எடுத்துப் பார்த்தனர். அப்போது அதிகாரிகள் சந்தேகப்பட்டது போலவே அவரது வயிற்றுக்குள் ஏராளமான கேப்சூல்கள் இருப்பது கண்டு பிடிக்கப்பட்டது.
70 கேப்சூல்கள்… 15 கோடி கொக்கயின்!
மருத்துவக் குழுவினரின் உதவியோடு, அந்தப் பெண்ணின் வயிற்றுக்குள் இருந்த கேப்சூல்களை வெளியில் எடுக்கும் முயற்சிகள் மேற்கொள்ளப்பட்டன. இதில், உயிருக்கு ஆபத்தான முறையில் அவர் வயிற்றுக்குள் விழுங்கி கடத்தி வந்த 70 கேப்சூல்கள் வெற்றிகரமாக வெளியே எடுக்கப்பட்டன. அந்த கேப்சூல்களை உடைத்துப் பார்த்தபோது, அதனுள் உயர்தர கொக்கயின் போதைப்பொருள் மறைத்து வைக்கப்பட்டிருந்தது கண்டுபிடிக்கப்பட்டது. மொத்தம் 850 கிராம் எடையுள்ள கொக்கயின் போதைப்பொருளை அதிகாரிகள் பறிமுதல் செய்தனர். இதன் சர்வதேச சந்தை மதிப்பு சுமார் ₹15 கோடி ஆகும்.
சர்வதேச கும்பலுக்கு வலைவீச்சு
இதனையடுத்து கென்ய நாட்டுப் பெண்ணை DRI அதிகாரிகள் முறைப்படி கைது செய்தனர். அவர் சர்வதேச போதைப்பொருள் கடத்தல் கும்பலின் முக்கிய கண்ணி என்பது தெரியவந்துள்ளது. சென்னையில் இந்த போதைப்பொருளை அவர் யாரிடம் ஒப்படைக்க முயன்றார்? இதன் பின்னணியில் இருக்கும் சர்வதேச கடத்தல் ஆசாமிகள் சென்னையில் எங்கு பதுங்கியிருக்கிறார்கள்? என்பது குறித்து அதிகாரிகள் அவரிடம் தீவிர விசாரணை நடத்தி வருகின்றனர். ‘அயன்’ பட பாணியில் நடந்த இந்த அதிதிர்ச்சியூட்டும் கடத்தல் சம்பவம் சென்னை விமான நிலையத்தில் பெரும் பரபரப்பை ஏற்படுத்தியுள்ளது.
ஏமாற்றி கடத்தப்பட்ட 5 வடமாநில இளைஞர்கள்: சென்னையில் ஆட்டோ ஓட்டுநர்களின் பகீர் அடாவடி!