டிஜிட்டல் அரெஸ்ட் மோசடி தொடர்பாக நாடு முழுவதும் 80-க்கும் மேற்பட்ட இடங்களில் சிபிஐ அதிரடி சோதனையில் மேற்கொண்டதில் இருவர் கைது செய்யப்பட்டுள்ளனர்.
நாடு முழுவதும் பெரும் அச்சுறுத்தலாக உருவெடுத்துள்ள ‘டிஜிட்டல் அரெஸ்ட்’ (Digital Arrest) எனப்படும் டிஜிட்டல் சிறைபிடிப்பு மோசடி நெட்வொர்க்கிற்கு எதிராக மத்திய புலனாய்வு அமைப்பு நாடு தழுவிய சோதனை நடத்தியுள்ளது.
‘ஆபரேஷன் சக்ரா-VI’ (Operation Chakra-VI) திட்டத்தின் கீழ், 60 சிறப்புப் படைகளை அமைத்து 16 மாநிலங்களில் உள்ள 80-க்கும் மேற்பட்ட இடங்களில் சிபிஐ அதிகாரிகள் ஒருங்கிணைந்த சோதனைகளை மேற்கொண்டுள்ளனர். இந்த அதிரடி சோதனையின் போது, மோசடி கும்பலுக்கு உதவியதாக சென்னை மற்றும் கொல்கத்தாவில் இருந்து இரண்டு பேர் கைது செய்யப்பட்டுள்ளனர்.
பஞ்சாப், குஜராத், டெல்லி, மகாராஷ்டிரா, ஹரியானா, தமிழ்நாடு, தெலுங்கானா, ஆந்திரப் பிரதேசம், உத்தரப் பிரதேசம், மத்தியப் பிரதேசம், ராஜஸ்தான், அசாம், மேற்கு வங்கம், மணிப்பூர், கர்நாடகா மற்றும் ஒடிசா ஆகிய 16 மாநிலங்களில் இந்த சோதனைகள் நடத்தப்பட்டன. சுமார் 200-க்கும் மேற்பட்ட டிஜிட்டல் அரெஸ்ட் மோசடி வழக்குகளுடன் தொடர்புடைய ஒரு பெரிய குற்றவியல் நெட்வொர்க்கை முடக்குவதே இந்த சோதனையின் முக்கிய நோக்கமாகும்.
போலி நிறுவனங்கள் மற்றும் ‘மியூல்’ வங்கி கணக்குகள்
கைது செய்யப்பட்ட இரண்டு நபர்களும், மோசடி பணத்தை சட்டவிரோதமாக மாற்றுவதற்காக போலி நிறுவனங்களை (Shell Companies) உருவாக்கியதாகவும், ‘மியூல்’ (Mule) எனப்படும் வாடகை வங்கி கணக்குகளை இயக்கி வந்ததாகவும் சிபிஐ தரப்பில் தெரிவிக்கப்பட்டுள்ளது. இவர்களின் வங்கி கணக்குகள் மூலம் சுமார் 2 கோடி ரூபாய் வரையிலான மோசடிப் பணம் பரிமாற்றம் செய்யப்பட்டுள்ளது கண்டுபிடிக்கப்பட்டுள்ளது.
இந்திய உச்ச நீதிமன்றத்தின் அதிகாரப்பூர்வ இணையதளத்தைப் போன்றே தோற்றமளிக்கும் ஒரு போலி இணையதளத்தை இந்த மோசடி கும்பல் உருவாக்கியதை சிபிஐ சமீபத்தில் கண்டறிந்தது. இந்த போலி இணையதளத்தைப் பயன்படுத்தி, பாதிக்கப்பட்டவர்களை டிஜிட்டல் முறையில் சிறைபிடித்து (Digital Arrest) மிரட்டி பணம் பறித்துள்ளனர்.
இது தொடர்பாக உச்ச நீதிமன்ற பதிவாளர் அளித்த புகாரின் அடிப்படையில், சிபிஐ வழக்குப்பதிவு செய்து விசாரணையைத் தீவிரப்படுத்தியது. குற்றவாளிகள் நீதிமன்றங்கள் மற்றும் பல்வேறு சட்ட அமலாக்க முகமைகளால் வழங்கப்பட்டது போன்ற போலி மற்றும் போலியாகத் தயாரிக்கப்பட்ட உத்தரவு நகல்களைப் பதிவேற்றி, தங்களின் மோசடி நடவடிக்கைகளை உண்மை என நம்ப வைத்துள்ளனர் என்பது விசாரணையில் தெரியவந்துள்ளது.
ஆவணங்கள் மற்றும் டிஜிட்டல் சாதனங்கள் பறிமுதல்
மேற்கொள்ளப்பட்ட அதிரடி சோதனைகளின் போது, ஏராளமான போலி ஆவணங்கள், டிஜிட்டல் சாதனங்கள், மொபைல் போன்கள் மற்றும் வங்கிப் பரிவர்த்தனை தொடர்பான முக்கியப் பதிவுகள் பறிமுதல் செய்யப்பட்டுள்ளன. இவை அனைத்தும் தற்போது விரிவான தடய அறிவியல் சோதனை மற்றும் ஆய்வுக்கு உட்படுத்தப்பட்டுள்ளன.
சர்வதேச அளவில் நீளும் மோசடி வலை
இந்த மோசடி நெட்வொர்க் இந்திய குடிமக்களை மட்டுமன்றி, வெளிநாடுகளைச் சேர்ந்த பலரையும் ஏமாற்றியுள்ளதற்கான ஆதாரங்கள் சிபிஐ-க்கு கிடைத்துள்ளன. இதனால், பாதிக்கப்பட்ட நாடுகளின் சட்ட அமலாக்க முகமைகளுக்கு உரிய வழிகள் மூலம் தகவல் தெரிவிக்கப்பட்டு வருகிறது. இது தொடர்பான விரிவான விசாரணை தொடர்ந்து நடைபெற்று வருகிறது.