- Advertisement -
சென்னை, திருவொற்றியூர் பகுதியில் நகர்ப்புற வாழ்விட மேம்பாட்டு வாரியத்தில் வீடு வாங்கித் தருவதாகக் கூறி 7 லட்சம் ரூபாய் மோசடி செய்த வழக்கில், தமிழக வெற்றிக் கழகத்தின் (தவெக) ஆதிதிராவிடர் நலப் பிரிவு பெண் நிர்வாகிகள் தாய் மற்றும் மகள் இருவரையும் போலீசார் கைது செய்துள்ளனர்.
மோசடியின் பின்னணி:
சென்னை திருவொற்றியூர் எஸ்.கே.டி. நகர் சீனிவாசபுரத்தைச் சேர்ந்தவர் ஞானப்பிரகாசம். இவர் தனியார் நிறுவனம் ஒன்றில் வேலை செய்து வருகிறார். இவருக்குக் குடிசை மாற்று வாரியத்தில் (நகர்ப்புற வாழ்விட குடியிருப்பு) சொந்தமாக வீடு வாங்கித் தருவதாக ஆசை வார்த்தை கூறி, கொருக்குப்பேட்டை டிரைவர் காலனியைச் சேர்ந்த மஞ்சுளா (57) மற்றும் அவரது மகள் அருணா (32) ஆகியோர் இவரிடம் மொத்தம் 7 லட்சம் ரூபாய் பணத்தைப் பெற்றுள்ளனர்.
ஆனால், கூறியபடி வீடு வாங்கித் தராமலும், வாங்கிய பணத்தைத் திருப்பித் தராமலும் இருவரும் ஞானப்பிரகாசத்தை ஏமாற்றி வந்துள்ளனர்.
நீதிமன்ற உத்தரவும், கைது நடவடிக்கையும்!
பணத்தை இழந்த ஞானப்பிரகாசம் இது குறித்து நீதிமன்றத்தில் வழக்குத் தொடர்ந்தார். வழக்கை விசாரித்த உயர்நீதிமன்றம் உரிய நடவடிக்கை எடுக்க உத்தரவிட்டதைத் தொடர்ந்து, நீதிமன்றத்தின் பிணை ஆணையின் பேரில் திருவொற்றியூர் போலீசார் வழக்குப்பதிவு செய்தனர்.
இந்த வழக்கில் தொடர்புடைய மஞ்சுளா மற்றும் அவரது மகள் அருணா இருவரும் தமிழக வெற்றிக் கழகத்தின் (தவெக) ஆதிதிராவிடர் நலப் பிரிவு உறுப்பினர்களாகச் செயல்பட்டு வருவது குறிப்பிடத்தக்கது. இதனையடுத்து, தலைமறைவாக இருந்த தாய் மற்றும் மகள் இருவரையும் போலீசார் அதிரடியாகக் கைது செய்து காவல் நிலையம் அழைத்து வந்து தீவிர விசாரணை நடத்தி வருகின்றனர்.
கட்சிப் பெண் நிர்வாகிகள் மோசடி வழக்கில் கைது செய்யப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது.
