பிரபல தொழிலதிபரும், ஜெம் கிரானைட் நிறுவனத்தின் உரிமையாளருமான வீரமணி மீதான போக்சோ வழக்கு மற்றும் அதுதொடர்பான முந்தைய ஆட்சிக் காலங்களின் நடவடிக்கைகள் குறித்து மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம் செய்தியாளர்களைச் சந்தித்துப் பேட்டி அளித்தார்.
அப்போது அவர் எழுப்பிய முக்கியக் குற்றச்சாட்டுகளின் விவரம் இதோ,
பல்வேறு ஆட்சிக் காலங்களில் புகார்கள் மற்றும் மௌனம்
ஜெம் கிரானைட் உரிமையாளர் வீரமணி மீது தற்போது போக்சோ வழக்கு பதிவு செய்யப்பட்டு விசாரணை நடைபெற்று வருகிறது. ஆனால், ஏற்கனவே கடந்த 2013 ஆம் ஆண்டு ஜெயலலிதா முதலமைச்சராக இருந்தபோதே அவர் மீது இதுபோன்ற புகார்கள் எழுப்பப்பட்டிருந்தன. இருப்பினும், அந்தப் புகார் என்ன ஆனது என்பது குறித்த விவரங்கள் வெளிவரவில்லை. அதனைத் தொடர்ந்து, கடந்த 2025 ஆம் ஆண்டு மு.க. ஸ்டாலின் முதலமைச்சராக இருந்த காலகட்டத்திலும் அவர் மீது புகார் பதிவு செய்யப்பட்ட போதிலும் உரிய நடவடிக்கை எடுக்கப்படவில்லை என்ற குற்றச்சாட்டுகள் எழுந்துள்ளன. இதன் மூலம், அனைத்து ஆட்சிக் காலங்களிலும் அவர் மீதான புகார்கள் முக்க்கியமாக மறைக்கப்பட்டு, பாலியல் குற்றவாளி தப்பித்துக் கொள்ள அனுமதிக்கப்பட்டிருக்கிறார் என்ற உண்மைகள் தற்போது வெளிவந்து கொண்டிருக்கின்றன.
விரிவான விசாரணைக்கு கோரிக்கை
இது ஒரு தனிப்பட்ட நபரின் குற்றத்தோடு நின்றுவிடாமல், மிகப்பெரிய அளவிலான பாலியல் மோசடியாக நடந்துள்ளதைச் சுட்டிக்காட்டிய பெ. சண்முகம், இதில் வீரமணி மட்டுமே சம்பந்தப்பட்டிருக்க வாய்ப்பில்லை என்றார். எனவே, கடந்த காலங்களில் புகார்கள் மீது நடவடிக்கை எடுக்காமல் இருக்க அன்றைய ஆளுங்கட்சியைச் சேர்ந்தவர்கள் யார் மூலமாக காவல்துறை அதிகாரிகளுக்கு அழுத்தம் கொடுக்கப்பட்டது என்பது குறித்து விரிவான விசாரணை நடத்தப்பட வேண்டும் என வலியுறுத்தினார். இந்தக் குற்றங்களை மூடிமறைக்க உதவி செய்த அனைவரும் சட்டத்தின் முன் நிறுத்தப்பட்டு கடுமையாகத் தண்டிக்கப்பட வேண்டும் என்றார்.
பெண்கள் மற்றும் குழந்தைகள் பாதுகாப்பு விவகாரத்தில் சிபிஎம் நிலைப்பாடு இந்த விவகாரம் தொடர்பாக அமைச்சர் ராஜ்மோகன் எழுப்பிய கேள்விக்கு பதிலளித்த அவர், குழந்தைகள் பாதிக்கப்பட்ட இடங்களிலும், பெண்கள் மீதான வன்கொடுமைகள் நடக்கும்போதும் மார்க்சிஸ்ட் கம்யூனிஸ்ட் கட்சியும், அனைத்திந்திய ஜனநாயக மாதர் சங்கமும் எப்போதும் சமரசம் இல்லாமல் களத்தில் நின்று போராடி வருவதாகத் தெரிவித்தார். எனவே, வெறும் வீரமணி என்கிற ஒரு நபரோடு இந்த வழக்கைச் சுருக்கிவிடாமல், வரலாற்று ரீதியாகத் தொடர்புடைய அனைத்துக் காலங்களையும் சேர்ந்த காவல்துறை அதிகாரிகள் மற்றும் ஆளுங்கட்சிப் பிரமுகர்களை விசாரணை வளையத்திற்குள் கொண்டு வரவேண்டும் என்று மார்க்சிஸ்ட் கம்யூனிஸ்ட் கட்சியின் சார்பில் அவர் உறுதியாகக் கேட்டுக்கொண்டார்.
தமிழ்நாட்டில் சேவல் சண்டைக்கு தடை இல்லையா? உயர் நீதிமன்றத்தில் டிஜிபி தரப்பு விளக்கம்!