திருவண்ணாமலை மாவட்டம் ஆரணி அருகே செம்மரக்கட்டை கடத்தல் வழக்குகளில் தொடர்புடைய கட்டை குணா என்கிற குணசேகரன், அவரது வீட்டின் வெளியே தூங்கிக் கொண்டிருந்தபோது மர்ம நபர்களால் வெட்டிப் படுகொலை செய்யப்பட்டார்.
அதிகாலை நேரத்தில் அப்பகுதியில் மின்சாரத்தைத் துண்டித்துவிட்டு இந்தத் தாக்குதல் நடத்தப்பட்டதாகக் கூறப்படும் நிலையில், கொலை வழக்கு தொடர்பாக வினோத் என்பவரைக் காவல்துறையினர் கைது செய்து விசாரணை நடத்தி வருகின்றனர்.
வீட்டின் வெளியே தூங்கியபோது கொடூரத் தாக்குதல்
திருவண்ணாமலை மாவட்டம், ஆரணி அருகே திருமணி ஊராட்சிக்கு உட்பட்ட ஆவியேந்தாங்கல் கிராமத்தில் வசித்து வந்தவர் கட்டை குணா என்கிற குணசேகரன். இவரது மனைவி மோனிஷா. இவர்களுக்கு ஒரு மகளும், இரண்டு மகன்களும் உள்ளனர்.
குணசேகரன் மீது பல்வேறு காவல் நிலையங்களிலும், வனத்துறையிலும் செம்மரக்கட்டை கடத்தல் உள்ளிட்ட பல்வேறு வழக்குகள் நிலுவையில் இருந்து வந்ததாகக் கூறப்படுகிறது.
இந்நிலையில், இன்று அதிகாலை வீட்டின் வெளியே தூங்கிக் கொண்டிருந்த குணசேகரனை அங்கு வந்த மர்ம நபர்கள் தாக்கியுள்ளனர்.
தாக்குதலுக்கு முன்பாக அப்பகுதியில் மின்சாரத்தைத் துண்டித்துவிட்டு, பயங்கர ஆயுதங்களால் அவரைச் சரமாரியாக வெட்டியதாகத் தெரிவிக்கப்படுகிறது. இதில் பலத்த காயமடைந்த குணசேகரன் சம்பவ இடத்திலேயே உயிரிழந்தார்.
உடலை மீட்ட காவல்துறையினர் – ஒருவர் கைது
தகவலறிந்து சம்பவ இடத்திற்கு விரைந்து வந்த காவல்துறையினர், குணசேகரனின் உடலை மீட்டு பிரேதப் பரிசோதனைக்காகத் திருவண்ணாமலை அரசு மருத்துவக் கல்லூரி மருத்துவமனைக்கு அனுப்பி வைத்தனர். மேலும், அவரது வீட்டின் முன்பு போலீசார் குவிக்கப்பட்டு பாதுகாப்பு மற்றும் விசாரணைப் பணிகள் மேற்கொள்ளப்பட்டன.
இந்தக் கொலை வழக்கு தொடர்பாக வினோத் என்பவரைப் பரணமல்லூர் காவல் நிலையப் போலீசார் கைது செய்து தீவிர விசாரணை நடத்தி வருகின்றனர்.
தொழில் போட்டியா? முன்விரோதமா?
செம்மரக்கட்டை கடத்தல் வழக்குகளில் தொடர்புடைய குணசேகரன் கொலை செய்யப்பட்டதற்கான காரணம் குறித்து போலீசார் பல்வேறு கோணங்களில் விசாரணை மேற்கொண்டு வருகின்றனர். தொழில் போட்டி காரணமாக இந்தக் கொலை நடைபெற்றதா அல்லது ஏற்கெனவே இருந்த முன்விரோதம் காரணமா என்பது குறித்து விசாரணை நடைபெற்று வருகிறது.
ஆரணி அருகே அதிகாலை நேரத்தில் மின்சாரத்தைத் துண்டித்துவிட்டு, செம்மரக்கட்டை கடத்தல் வழக்குகளில் தொடர்புடைய நபர் வெட்டிப் படுகொலை செய்யப்பட்ட சம்பவம் அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது.
