‘கிரைண்டர்’ செயலி மூலம் பழகி கத்திமுனையில் கொள்ளை; நிர்வாண வீடியோ எடுத்து மிரட்டிய இருவர் கைது!

சென்னையை அடுத்த சேலையூர் அருகே ‘கிரைண்டர்’ (Grindr) செயலி மூலம் பழகி, வீட்டின் உள்ளே புகுந்து கத்திமுனையில் 6 சவரன் தங்க நகை மற்றும் ரூ.60,000 ரொக்கப் பணத்தைக் கொள்ளையடித்ததுடன், நிர்வாண வீடியோ எடுத்து மிரட்டிய வழக்கில் இரண்டு வாலிபர்களை போலீஸார் கைது செய்துள்ளனர்.

​சென்னை சேலையூர் காவல் எல்லைக்குட்பட்ட புதூர் கிராமம், சரஸ்வதி தெருவைச் சேர்ந்தவர் ராகேஷ் (41, பெயர் மாற்றப்பட்டுள்ளது). இவர் போரூரில் உள்ள ஒரு தனியார் நிறுவனத்தில் பணியாற்றி வருகிறார். இவரது மனைவி கோவிலஞ்சேரி பகுதியில் உள்ள ஒரு பள்ளியில் ஆசிரியையாகப் பணிபுரிந்து வருகிறார். ​கடந்த 24-ஆம் தேதி, ராகேஷின் மனைவி வழக்கம்போல பள்ளிக்குச் சென்றிருந்தார். அந்தச் சமயத்தில், காலை சுமார் 11.30 மணியளவில், ராகேஷ் ‘கிரைண்டர்’ சமூக ஊடகச் செயலி மூலம் தனக்கு அறிமுகமான இருவரைத் தனது வீட்டிற்கு வரவழைத்துள்ளார்.

​கத்திமுனை மிரட்டல் & கொள்ளை
​வீட்டிற்குள் நுழைந்த அந்த இருவரும், திடீரென மறைத்து வைத்திருந்த கத்தியைக் காட்டி ராகேஷை மிரட்டியுள்ளனர். பின்னர் வீட்டிலிருந்த 6 சவரன் தங்க நகைகள் மற்றும் ரூ.60,000 ரொக்கப் பணத்தைப் பறித்துக் கொண்டனர். அதோடு நில்லாமல், ராகேஷை கட்டாயப்படுத்தி அருகிலிருந்த ஏடிஎம் (ATM) மையத்திற்கு அழைத்துச் சென்று, அங்கிருந்தும் பணத்தை எடுக்க வைத்து அதையும் பறித்துச் சென்றுள்ளனர்.

​​பணத்தைப் பறித்ததோடு மட்டுமின்றி, ராகேஷை நிர்வாணப்படுத்தி தங்கள் கைபேசியில் வீடியோ ஒன்றையும் பதிவு செய்துள்ளனர். இச்சம்பவம் குறித்து காவல்துறையிடம் புகார் அளித்தால், இந்த வீடியோவை சமூக வலைதளங்களில் வெளியிட்டு விடுவோம் என்று மிரட்டிவிட்டு அங்கிருந்து தப்பியோடினர். ​இதனால் அதிர்ச்சியடைந்த ராகேஷ், மானபங்கத்திற்கு பயந்து உடனடியாகப் புகார் அளிக்காமல் தவித்துள்ளார். பின்னர் அன்றைய தினம் இரவு 9 மணியளவில், தைரியத்தை வரவழைத்துக் கொண்டு காவல் கட்டுப்பாட்டு அறையின் அவசர உதவி எண்ணான 100-ஐத் தொடர்பு கொண்டு தகவல் தெரிவித்துள்ளார்.

​தகவல் அறிந்தவுடன் சம்பவ இடத்திற்கு விரைந்த சேலையூர் போலீஸார், தீவிர விசாரணை மேற்கொண்டனர். இது தொடர்பாக புதிய குற்றவியல் சட்டமான பாரதிய நியாய சன்ஹிதாவின் (BNS) கீழ் பின்வரும் பிரிவுகளில் வழக்குப் பதிவு செய்யப்பட்டது. ​ஆபாசமாகப் பேசுதல் / திட்டுதல் – பிரிவு 296(b), ​கடுமையான காயம் ஏற்படுத்தி வழிப்பறி செய்தல் – பிரிவு 329(4), ​மிரட்டிப் பணம் பறித்தல் – பிரிவு 308, ​கொலை மிரட்டல் விடுத்தல் – பிரிவு 351(3) ​இதனைத் தொடர்ந்து, பாதிக்கப்பட்டவரின் வீடு மற்றும் அப்பகுதியில் இருந்த சிசிடிவி (CCTV) கேமரா காட்சிகளை போலீஸார் விரிவாக ஆய்வு செய்தனர்.

அதன் அடிப்படையில், இக்குற்றச்சம்பவத்தில் தொடர்புடைய, ​அரியலூர் மாவட்டத்தைச் சேர்ந்த அலெக்சாண்டர் (28) மற்றும் ​கடலூர் மாவட்டத்தைச் சேர்ந்த ஓட்டுநர் முகமது ரஷிக் (26)​ஆகிய இருவரையும் போலீஸார் அதிரடியாகக் கைது செய்தனர். கைதான இருவரும் நீதிமன்றத்தில் ஆஜர்படுத்தப்பட்டு, வரும் ஜூலை 10-ஆம் தேதி வரை புழல் மத்திய சிறையில் நீதிமன்றக் காவலில் அடைக்கப்பட்டுள்ளனர்.

ரூ.20 கோடி தங்கம் மோசடி: பெண் இன்ஸ்பெக்டர் ஷீலா மேரியின் முன்ஜாமீன் மனு தள்ளுபடி!