இந்திய திரையுலகின் புகழ்பெற்ற பின்னணி பாடகியும், ரசிகர்களால் ‘இசைக்குயில்’ என்றும் ‘தென்னிந்தியாவின் நைட்டிங்கேல்’ என்றும் அன்போடு அழைக்கப்படும் எஸ். ஜானகி (88), வயது முதிர்வு காரணமாக மைசூரில் காலமானார். அவரது மறைவை உறவினர்கள் உறுதி செய்துள்ளனர். இவரது மறைவு இந்திய இசைத் துறையில் ஈடுசெய்ய முடியாத பெரும் வெற்றிடத்தை ஏற்படுத்தியுள்ளது.
வான்புகழ் கொண்ட இசைப் பயணம்
1938 ஆம் ஆண்டு ஏப்ரல் 23 இல் ஆந்திர மாநிலம் குண்டூர் மாவட்டத்திலுள்ள பல்லபட்லாவில் ராமமூர்த்தி-சத்தியவதி தம்பதிக்கு மகளாகப் பிறந்தார் எஸ். ஜானகி. சிறு வயது முதலே இசையில் தீவிர ஆர்வம் கொண்ட இவர், நாதசுர மேதை பைடிசாமியிடம் முறையாக இசை பயின்றார்.
அறிமுகம்: 1956 இல் அகில இந்திய வானொலி நடத்திய பாட்டுப் போட்டியில் வென்று, அப்போதைய குடியரசுத் தலைவர் டாக்டர் ராஜேந்திர பிரசாத்திடம் பரிசு பெற்றார். தொடர்ந்து 1957 இல் ‘விதியின் விளையாட்டு’ என்ற திரைப்படத்தின் மூலம் தனது பின்னணி இசைப் பயணத்தைத் தொடங்கினார்.
திருப்புமுனைப் பாடல்கள்:
‘கொஞ்சும் சலங்கை’ படத்தில் இடம்பெற்ற ‘சிங்காரவேலனே தேவா…’ பாடல் இவருக்குப் பெரும் திருப்புமுனையாக அமைந்தது. பின்னர் இளையராஜா இசையமைப்பில் ‘அன்னக்கிளி’ படத்தில் பாடிய பாடல்கள், குறிப்பாக ‘அன்னக்கிளி உன்னைத் தேடுதே…’ பாடல் இவருக்குத் தமிழ் நெஞ்சங்களில் தனித்துவமான அடையாளத்தைப் பெற்றுத் தந்தது.
பல்லின மொழிச் சாதனை: தமிழ், தெலுங்கு, கன்னடம், மலையாளம், இந்தி, ஜெர்மன் உட்பட 17 மொழிகளில் 48,000-க்கும் மேற்பட்ட பாடல்களைப் பாடி சாதனை படைத்துள்ளார்.
குரல் நயம்:
5 வயதுக் குழந்தையின் குரல் முதல் 60 வயது முதியவரின் குரல் வரை அசாத்தியமாக மாற்றிப் பாடும் தனித்திறமை கொண்டவர்.
விருதுகளும் ஓய்வும்: 4 தேசிய விருதுகளையும், தென்னக மாநில அரசுகளிடம் இருந்து 33-க்கும் மேற்பட்ட மாநில விருதுகளையும் குவித்த இவர், கடந்த 2016 ஆம் ஆண்டு திரையிசையில் இருந்து ஓய்வு பெறுவதாக அறிவித்துத் தனது சொந்த ஊருக்குத் திரும்பினார்.
முதலமைச்சர் ஜோசப் விஜய் இரங்கல்
ஜானகி அம்மாவின் மறைவுக்கு இரங்கல் தெரிவித்து தமிழ்நாடு முதலமைச்சர் ஜோசப் விஜய் தனது எக்ஸ் (X) பக்கத்தில் விடுத்துள்ள செய்தி:
”தனது தனித்துவமான குரலால் பல தலைமுறைகளின் இதயங்களை வென்ற பழம்பெரும் பின்னணிப் பாடகி எஸ். ஜானகியின் மறைவு மிகுந்த வேதனையளிக்கிறது. பல்வேறு மொழிகளில் ஆயிரக்கணக்கான பாடல்களைப் பாடி, இசை உலகில் அழியாத முத்திரையைப் பதித்தவர். அவரது இனிமையான குரல் ரசிகர்களின் மனங்களில் என்றும் நிலைத்திருக்கும். அவரது பிரிவால் வாடும் குடும்பத்தினர் மற்றும் உலகெங்குமுள்ள ரசிகர்களுக்கு என் ஆழ்ந்த இரங்கலைத் தெரிவித்துக் கொள்கிறேன்.”
’இந்திய திரைத் துறைக்கு பேரிழப்பு’ – மு.க.ஸ்டாலின்
திமுக தலைவர் மு.க.ஸ்டாலின் வெளியிட்டுள்ள இரங்கல் அறிக்கையில்:
”மெல்லிசை மன்னர் எம்.எஸ்.வி முதல் அனிருத் வரை ஆயிரக்கணக்கான பாடல்களைப் பாடிய கானகோகிலம் ஜானகியின் இசைப் பயணம் மிக நீண்டது. அவரது மறைவு என்பது வானொலி தொடங்கி ஸ்பாட்டிஃபை வரை அவரது அமுத கானங்களை ரசிக்கும் தமிழ்நாட்டு மக்கள் உள்ளிட்ட தென்னிந்திய மக்களுக்கும், இந்திய திரைத்துறைக்கும் பேரிழப்பு. இனிமையும் இளமையும் மாறாத அவரது குரல் என்றும் நம் இல்லங்களிலும் நெஞ்சங்களிலும் ஒலித்துக்கொண்டே இருக்கும்.”
திரையுலக பிரபலங்கள் நெகிழ்ச்சி அஞ்சலி
எஸ். ஜானகியின் மறைவுக்குத் திரை உலகைச் சேர்ந்த பலரும் தங்களது சமூக வலைத்தள பக்கங்களில் இரங்கல்களைப் பகிர்ந்து வருகின்றனர்.
நடிகர் ரஜினிகாந்த்: “தன்னுடைய தேனமுதக் குரலால் தலைமுறை தலைமுறையாக மக்களை மகிழ்வித்த ஜானகி அம்மாவின் ஆத்மா சாந்தியடையட்டும்.”
இசையமைப்பாளர் அனிருத்: “உங்கள் ஆசீர்வாதங்களை எப்போதும் நினைவில் வைத்திருப்பேன். ஜானகி அம்மாவின் ஆத்மா சாந்தியடையட்டும்.”
நடிகை சிம்ரன்: “சில குரல்கள் நம் வாழ்வின் ஒரு பகுதியாக என்றென்றும் நிலைத்துவிடுகின்றன; ஜானகி அம்மாவின் குரலும் அத்தகையதே. அம்மா, அமைதியில் துயில்கொள்ளுங்கள்.”
பாடகி சின்மயி: “அவர் ஒரு தேவி. சுமார் 20 ஆண்டுகளுக்கு முன்பு ஆஸ்திரேலியாவில் நடந்த ஒரு நிகழ்ச்சியில் ஒரே பாடலில் அவர் ஒரு குழந்தை போல, பெண் போல, ஆண் போல என பல்வேறு வடிவங்களில் குரலை மாற்றிப் பாடி அசத்தினார். மேடைக்கு பின்னால் இருந்த நான், அந்தப் பாடலை முழுவதுமாகப் பாடுவது அவர்தான் என்பதை அறியும் வரை, அந்த ஆண் பாடகர் யார் என்றே தேடிக் கொண்டிருந்தேன். நான் மிகவும் மதிக்கும் ஒரு பாடகி அவர்” எனத் தனது நினைவுகளைப் பகிர்ந்துள்ளார்.