பாராளுமன்றக் கூட்டத்தொடரில் மத்திய அரசு கொண்டுவரத் திட்டமிட்டுள்ள தொகுதி மறுவரையறை (Delimitation) மற்றும் பெண்களுக்கான இடஒதுக்கீடு மசோதாக்கள் தொடர்பாக, ‘அக்னி நியூஸ் சர்வீஸ்’ ஆசிரியரும் மூத்த பத்திரிகையாளருமான சுரேஷ்குமார் கருத்து தெரிவித்துள்ளார். ஈ தமிழ் நியூஸ் (ETamil News) ஊடகத்திற்கு அளித்துள்ள சிறப்பு நேர்காணலில் அவர் கூறியதாவது:
தென்மாநில நலனும் திமுகவின் நகர்வும்:
பாராளுமன்றத்தில் தொகுதி மறுவரையறை மசோதா மற்றும் மகளிர்க்கான இடஒதுக்கீடு மசோதா ஆகியவை தாக்கல் செய்யப்படும் போது, அவை இரு அவைகளிலும் நிறைவேறுவதற்கான வாய்ப்புகள் அதிகமாக உள்ளன. தென்மாநிலங்களின் நாடாளுமன்றத் தொகுதிகளின் எண்ணிக்கை குறையாமல், பாதிப்பு ஏதும் இல்லாத வகையில் தொகுதி மறுவரையறை வரைவு மசோதா அமைந்தால், அதனை ஆதரிப்பது குறித்து யோசிக்கலாம் என்ற ரீதியில் முதலமைச்சர் எம்.கே. ஸ்டாலின் ஒரு முக்கிய அரசியல் நகர்வை மேற்கொண்டுள்ளார்.
தமிழகம் மற்றும் தென்மாநிலங்களின் பிரதிநிதித்துவம் மற்றும் உரிமைகளுக்குப் பாதிப்பு ஏற்படாத வகையில் தொகுதிகள் உயர்த்தப்பட்டால் (எடுத்துக்காட்டாக தமிழக எம்பி தொகுதிகள் 39-லிருந்து 60-க்கும் மேல் அதிகரித்தால்), மாநில நலனைக் கருத்தில் கொண்டு திமுக இம்மசோதாவை ஆதரிப்பதிலோ அல்லது வாக்களிப்பில் தகுந்த முடிவை எடுப்பதிலோ தவறில்லை.
மாநிலக் கட்சிகளின் நிலைப்பாடு:
உத்தரப் பிரதேசம் போன்ற பெரிய மாநிலங்களில் தொகுதிகளின் எண்ணிக்கை அதிகரிக்கும் போது, அம்மாநிலத்தைச் சேர்ந்த சமாஜ்வாதி கட்சி போன்ற முக்கியப் பிராந்தியக் கட்சிகள் தங்கள் மாநில நலனைக் கருதி இம்மசோதாவை எதிர்க்கத் தயங்கக்கூடும். இதேபோலத்தான் பல்வேறு மாநிலக் கட்சிகளும் தங்கள் மாநிலப் பலனைக் கருத்தில் கொண்டே முடிவெடுக்கும். இந்தியக் கூட்டணியில் இடம்பெற்றுள்ள பிராந்தியக் கட்சிகள், அந்தந்த மாநிலத் தேவைகள் மற்றும் தொகுதிப் பங்கீடுகளின் அடிப்படையில் தற்சார்பாக முடிவெடுக்கத் தொடங்கியுள்ளன.
பாராளுமன்றத்தில் திமுகவின் எதிர்ப்புக் குரல்:
அதேவேளையில், மேகதாது அணை விவகாரம், நீட் தேர்வு விலக்கு, பல்கலைக்கழகங்களில் ஆளுநர்களின் தலையீடு மற்றும் ஒற்றைத் தேர்தல் (‘ஒரே நாடு ஒரே தேர்தல்’) போன்ற விவகாரங்களில் திமுக தனது கொள்கை ரீதியான வலுவான எதிர்ப்பைப் பாராளுமன்றத்தின் இரு அவைகளிலும் தொடர்ந்து பதிவு செய்யும் என்று எதிர்பார்க்கப்படுகிறது.