திருத்தேரை வடம் பிடித்துத் தொடக்கி வைத்தார் அமைச்சர் வன்னியரசு; 500-க்கும் மேற்பட்ட போலீஸார் தீவிர பாதுகாப்பு!
கள்ளக்குறிச்சி மாவட்டம் சங்கராபுரம் அருகே உள்ள பூட்டை கிராமத்தில் அமைந்துள்ள இந்து சமய அறநிலையத்துறைக்குச் சொந்தமான பிரசித்தி பெற்ற ஸ்ரீ பூட்டை மாரியம்மன் திருக்கோயில் ஆடித் திருவிழாவின் சிகர நிகழ்ச்சியான திருத்தேரோட்டம் இன்று வெகுவிமர்சையாக நடைபெற்றது. பல்லாயிரக்கணக்கான பக்தர்கள் கலந்து கொண்ட இந்தத் தேரோட்டத்தைச் சமூக நீதித்துறை அமைச்சர் வன்னியரசு வடம் பிடித்துத் தொடக்கி வைத்தார்.
கோலாகலமாக நடைபெற்ற தேரோட்டம்
இக்கோயிலில் இந்த ஆண்டிற்கான ஆடி மாத திருவிழா கடந்த மாதம் கொடியேற்றத்துடன் கோலாகலமாகத் தொடங்கியது. விழாவினை முன்னிட்டு நாள்தோறும் அம்மனுக்குச் சிறப்பு அபிஷேக ஆராதனைகளும், வாகனங்களில் சுவாமி வீதிஉலாவும் சிறப்பாக நடைபெற்று வந்தன. விழாவின் முக்கிய நிகழ்வான திருத்தேரோட்டத்தை முன்னிட்டு, இன்று காலை அம்மனுக்கு சிறப்பு திருமஞ்சனமும், மகா தீபாராதனையும் நடத்தப்பட்டது. தொடர்ந்து, சிறப்பு அலங்காரத்தில் அம்மன் திருத்தேரில் எழுந்தருளினார். இதனைத் தொடர்ந்து, சமூக நீதித்துறை அமைச்சர் வன்னியரசு மற்றும் ஜாகிர்தார் ஆகியோர் முன்னிலையில் முக்கியப் பிரமுகர்கள் மற்றும் பக்தர்கள் ஹரஹர மகாதேவா கோஷத்துடன் வடம் பிடித்து இழுக்க, திருத்தேர் வீதிஉலா தொடங்கியது. சங்கராபுரம் மற்றும் அதனைச் சுற்றியுள்ள பல்வேறு கிராமங்களைச் சேர்ந்த பல்லாயிரக்கணக்கான பக்தர்கள் திரளாகக் கலந்துகொண்டு சாமி தரிசனம் செய்தனர்.
500-க்கும் மேற்பட்ட போலீஸார் தீவிர பாதுகாப்பு
தேரோட்டத்தைக் காண ஆயிரக்கணக்கான பொதுமக்கள் மற்றும் பக்தர்கள் திரண்டதால், அசம்பாவிதங்கள் ஏதும் ஏற்படாமல் தவிர்க்கும் வகையில் கள்ளக்குறிச்சி மாவட்ட காவல் கண்காணிப்பாளர் தலைமையில் 500-க்கும் மேற்பட்ட காவல் துறையினர் தீவிரப் பாதுகாப்புப் பணியில் ஈடுபடுத்தப்பட்டிருந்தனர்.
ஆடி பௌர்ணமி கிரிவலம்: திருப்பரங்குன்றம் முருகன் கோயிலில் குவிந்த பக்தர்கள்!