ஈரானுடன் சமாதான ஒப்பந்தம் எட்ட முடியும் என நம்பிக்கை தெரிவிக்கிறார் அமெரிக்க அதிபர் டொனால்ட் ட்ரம்ப்!
ஈரான் மீது அமெரிக்கா மீண்டும் தாக்குதல் நடத்தினால், அப்பிராந்தியத்தில் உள்ள முக்கிய நாடுகளின் எரிசக்தி மற்றும் எண்ணெய் உற்பத்தி நிலையங்களைக் குறிவைத்து கடுமையான பதிலடித் தாக்குதல் நடத்தப்படும் என ஈரான் பகிரங்க எச்சரிக்கை விடுத்துள்ளது. ஒருபுறம் ராணுவ மிரட்டல்கள் தீவிரமடைந்து வந்தாலும், மறுபுறம் ஈரானுடன் பேச்சுவார்த்தை மூலம் ஒப்பந்தத்தை எட்ட முடியும் என அமெரிக்க அதிபர் டொனால்ட் ட்ரம்ப் நம்பிக்கை தெரிவித்துள்ளார்.
ஈரானிய வெளியுறவு அமைச்சரின் அதிரடித் தொலைபேசி உரையாடல்கள்
அமெரிக்கப் படைகள் எத்தகைய ஆக்கிரமிப்பு நடவடிக்கைகளில் ஈடுபட்டாலும் மிகக் கடுமையான பதிலடி கொடுக்கப்படும் என ஈரான் அறிவித்துள்ளது. இது தொடர்பாக ஈரானிய வெளியுறவுத்துறை அமைச்சர் அப்பாஸ் அராக்சி (Abbas Araqchi), துருக்கி, பாகிஸ்தான் மற்றும் சவுதி அரேபியா ஆகிய நாடுகளின் வெளியுறவுத் தலைவர்களுடன் தனித்தனியாக அவசரத் தொலைபேசி உரையாடல்களை மேற்கொண்டார். சவுதி வெளியுறவுத்துறை அமைச்சர் இளவரசர் ஃபைசல் பின் ஃபர்ஹானிடம் பேசிய அராக்சி, அமெரிக்கா அல்லது இஸ்ரேல் நடத்தும் தாக்குதல்களுக்குப் பிராந்திய நாடுகள் ஏதேனும் உதவி செய்தால், அதற்கான விளைவுகளைச் சந்திக்க நேரிடும் என எச்சரித்தார்.
பாகிஸ்தான் ராணுவத் தளபதி ஆசிம் முனிர் மற்றும் துருக்கி வெளியுறவுத்துறை அமைச்சர் ஹகன் ஃபிடான் ஆகியோரிடம் பிராந்தியப் பாதுகாப்பு நிலவரங்கள் குறித்து அவர் விரிவாக விவாதித்தார். குவேட் நாட்டின் முக்கிய வசதிகளைக் குறிவைத்து ஈரான் ஏவிய டிரோன்களைத் தாங்கள் சுட்டு வீழ்த்தியதாகக் குவேட் ராணுவம் அறிவித்த சில மணி நேரங்களிலேயே இந்தத் தூதரகப் பேச்சுவார்த்தைகள் நடந்துள்ளன என்பது குறிப்பிடத்தக்கது.
அமெரிக்க அதிபர் ட்ரம்பின் நிலைப்பாடு
பிராந்தியத்தில் பதற்றம் உச்சத்தை எட்டியுள்ள நிலையிலும், ராஜதந்திர ரீதியிலான தீர்வு சாத்தியமே என்று அமெரிக்க அதிபர் டொனால்ட் ட்ரம்ப் கூறியுள்ளார். தனது சிறப்புப் தூதர்களான ஜாரெட் குஷ்னர், ஸ்டீவ் விட்காஃப் மற்றும் வெளியுறவுத்துறைச் செயலாளர் மார்க்கோ ரூபியோ ஆகியோர் அடங்கிய தூதரகக் குழு, ஈரானுடன் வெற்றிகரமாகப் பேச்சுவார்த்தை நடத்தி ஒரு சுமூகமான ஒப்பந்தத்தை எட்டும் என்பதில் தமக்கு முழு நம்பிக்கை இருப்பதாகத் ட்ரம்ப் தெரிவித்துள்ளார். இரு தரப்பிலும் தொடரும் எச்சரிக்கைகளும் ராணுவ நகர்வுகளும் மேற்காசியப் பகுதியில் எப்போது வேண்டுமானாலும் பேராபத்து வெடிக்கலாம் என்ற சூழலை உருவாக்கியுள்ளன.