“விசிக – திமுக உறவில் தொடரும் பனிப்போர்” – ஆலூர் ஷாநவாஸின் அடுத்தகட்ட நகர்வால் தமிழக அரசியலில் பரபரப்பு!

தமிழக அரசியல் களத்தில் தேர்தல் முடிவுகளுக்குப் பிறகு கூட்டணி நிலவரங்கள் மற்றும் கட்சிகளுக்கு இடையேயான நகர்வுகள் பெரும் விவாதப் பொருளாகியுள்ளன. அந்த வகையில், விசிகவின் முக்கிய நிர்வாகியும் சட்டமன்ற உறுப்பினருமான ஆலூர் ஷாநவாஸ் திமுக மேடைகளில் பங்கேற்றுப் பேசி வருவதும், அது குறித்த அரசியல் பின்னணிகளும் தற்போது பெரும் பரபரப்பை ஏற்படுத்தியுள்ளன.விசிக – திமுக உறவில் விரிசல்
கடந்த பத்து ஆண்டுகளுக்கும் மேலாக திமுகவுடன் நெருக்கமான கூட்டணியில் பயணித்து வந்த விடுதலை சிறுத்தைகள் கட்சி, தற்போதைய தேர்தல் அரசியல் சூழலில் மாறுபட்ட நிலைப்பாடுகளை எடுத்துள்ளது. பெரியாரியமும் அம்பேத்கரியமும் இணைந்து ஆர்எஸ்எஸ் மற்றும் சனாதனச் சித்தாந்தங்களை எதிர்க்க வேண்டும் என்ற கொள்கை அடிப்படையில் இக்கூட்டணி நீண்ட காலம் தொடர்ந்தது. ஆனால், தேர்தல் முடிவுகள் மற்றும் அதிகாரப் பகிர்வு சார்ந்த விவகாரங்களால் இந்தக் கூட்டணியில் ஏற்பட்டுள்ள பனிப்போர் தற்போது வெளிப்படையாக விவாதிக்கப்படத் தொடங்கியுள்ளது.

திமுக மேடைகளில் ஆலூர் ஷாநவாஸ் பேச்சு
விசிகவின் முன்னணி முகங்களில் ஒருவரான ஆலூர் ஷாநவாஸ், கலைஞர் நினைவு நாள் உள்ளிட்ட திமுக நிகழ்ச்சிகளிலும் மேடைகளிலும் தொடர்ந்து பங்கேற்றுப் பேசி வருவது அரசியல் வட்டாரத்தில் உற்றுநோக்கப்படுகிறது. “பத்து ஆண்டுகளாகத் திராவிட மாடலையும், பெரியாரின் சிந்தனைகளையும் மக்களிடம் கொண்டு சேர்த்தோம்; திடீரென நிலைப்பாட்டை மாற்றுவது மக்களின் நம்பிக்கையைக் கேள்விக்குள்ளாக்கும்”

என்ற ரீதியில் அவர் பேசி வருவது, விசிக தலைவர் திருமாவளவனின் தற்போதைய அரசியல் நிலைப்பாட்டிற்கு மறைமுகச் சவாலாகப் பார்க்கப்படுவதாக அரசியல் விமர்சகர்கள் கருதுகின்றனர்.

திமுகவின் புதிய அரசியல் வியூகம்
மறுபுறம், விசிகவிற்குள் நிலவும் இந்த மாறுபட்ட கருத்துக்களைப் பயன்படுத்தி, கட்சியைத் தன்வசப்படுத்தும் அல்லது பலவீனப்படுத்தும் யுக்திகளில் திமுக தரப்பு கவனம் செலுத்தி வருவதாகத் தகவல்கள் வெளியாகின்றன. பனையூர் பாபு போன்றவர்கள் ஏற்கனவே விசிகவிலிருந்து விலகி திமுகவில் இணைந்ததைத் தொடர்ந்து, தற்போது ஆலூர் ஷாநவாஸ் போன்ற முன்னணித் தலைவர்களின் நகர்வுகள் விசிக தலைமைக்கு கூடுதல் நெருக்கடியை ஏற்படுத்தியுள்ளன.

விரைவில் ஆலூர் ஷாநவாஸ் திமுகவில் ஐக்கியமாகலாம் என்றும், அவருக்கு முக்கியப் பொறுப்புகள் அல்லது நாடாளுமன்ற உறுப்பினர் பதவி வரை வாய்ப்புகள் வழங்கப்படலாம் என்றும் சமூக வலைத்தளங்களில் விவாதங்கள் சூடுபிடித்துள்ளன. இந்த அரசியல் நகர்வுகள் தமிழ்நாட்டில் எதிர்வரும் காலங்களில் எத்தகைய கூட்டணிக் மாற்றங்களை ஏற்படுத்தப் போகிறது என்பதைப் பொறுத்திருந்துதான் பார்க்க வேண்டும்.

“தமிழகத்தின் தலையெழுத்தையே மாத்திடும்!”.. தொகுதி மறுவரையறைக்கு எதிராகச் சசிகாந்த் செந்தில் கொடுத்த வார்னிங்!