இந்தியத் தொலைத்தொடர்பு சந்தையில் முன்னணி நிறுவனங்களில் ஒன்றான ஏர்டெல், தனது நான்கு முக்கிய ப்ரீபெய்ட் திட்டங்களை திடீரென நீக்கியுள்ளது. அத்துடன், தனது இதர ப்ரீபெய்ட் கட்டணங்களை 16 சதவீதம் வரை உயர்த்தி, வாடிக்கையாளர்களுக்கு பெரும் அதிர்ச்சியை ஏற்படுத்தியுள்ளது. 
மாற்றத்தின் விவரங்கள்:
திட்ட உயர்வு: அதிக மக்களால் பயன்படுத்தப்பட்டு வந்த ரூ. 299 ப்ரீபெய்ட் திட்டம், தற்போது 16% விலை உயர்த்தப்பட்டு ரூ. 349 என மாற்றப்பட்டுள்ளது.
பயனாளர் மாற்றம்: இந்தத் திட்டத்தில் நாள்தோறும் வழங்கப்பட்டு வந்த 1.5 ஜிபி டேட்டா (Data) வசதி, தற்போது 2 ஜிபி டேட்டாவாக அதிகரிக்கப்பட்டுள்ளதாக அந்நிறுவனம் தெரிவித்துள்ளது.
திட்டங்கள் ரத்து: ரூ. 579, ரூ. 619 மற்றும் ரூ. 649 ஆகிய மூன்று முக்கிய ப்ரீபெய்ட் திட்டங்களை ஏர்டெல் நிறுவனம் முழுமையாக நீக்கியுள்ளது.
சந்தை நிலவரம்:
இந்தியத் தொலைத்தொடர்பு சந்தையில் ஜியோ நிறுவனம் சுமார் 40% முதல் 41% சந்தைப் பங்கையும், ஏர்டெல் நிறுவனம் சுமார் 32% முதல் 33% சந்தைப் பங்கையும் கொண்டுள்ளன. இந்த இரண்டு நிறுவனங்களும் சந்தையில் ஏகபோக ஆதிக்கத்தைச் செலுத்தி வருகின்றன. தொடக்கத்தில் குறைந்த கட்டணத்தில் சேவைகளை வழங்கி மக்களை ஈர்த்த இந்த நிறுவனங்கள், தற்போது போட்டி போட்டுக்கொண்டு கட்டணங்களை உயர்த்தி வருவது வாடிக்கையாளர்கள் மத்தியில் அதிருப்தியை ஏற்படுத்தியுள்ளது.
தற்போது ஜியோ நிறுவனம் தனது வரம்பற்ற (Unlimited) வாய்ஸ் அழைப்புகள், தினமும் 2 ஜிபி டேட்டா மற்றும் 28 நாட்கள் செல்லுபடியாகும் காலத்துடன் கூடிய ரூ. 349 திட்டத்தை வழங்கி வரும் அதே வேளையில், ஏர்டெல் நிறுவனமும் அதற்கு நிகரான வகையில் தனது திட்டங்களை மாற்றியமைத்துள்ளது.
ஏர்டெல் யூசரா நீங்க? – இனி மாசம் மாசம் பாக்கெட் காலி.. வெளியான அதிர்ச்சி அறிவிப்பு!