சிவகங்கை மாவட்டம் சாலைகிராமத்தில் உள்ள அரசு மேல்நிலைப் பள்ளியில், வகுப்பறைக்குள்ளேயே 12-ஆம் வகுப்பு மாணவர் ஒருவரை சக மாணவர் கத்தியால் குத்திய சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது.
வகுப்பறையில் திடீர் மோதல்
சாலைகிராமம் அரசு மேல்நிலைப் பள்ளியில் பிளஸ்-2 பயின்று வரும் இரு மாணவர்களுக்கு இடையே கடந்த சில நாட்களாகவே சிறு சிறு தகராறுகள் இருந்து வந்ததாகக் கூறப்படுகிறது. இந்நிலையில், வழக்கம்போல் பள்ளி இயங்கிக் கொண்டிருந்தபோது, மாணவர்களுக்கிடையே மீண்டும் வாக்குவாதம் வெடித்துள்ளது. வாக்குவாதம் முற்றிய நிலையில், ஆத்திரமடைந்த ஒரு மாணவர், தான் மறைத்து வைத்திருந்த சிறிய கத்தியை எடுத்து சக மாணவரைத் தாக்கியுள்ளார். இதில் காயமடைந்த மாணவரின் அலறல் சத்தம் கேட்டு, அருகிலிருந்த ஆசிரியர்களும் சக மாணவர்களும் விரைந்து வந்து அவரை மீட்டனர்.
மருத்துவமனையில் சிகிச்சை
காயமடைந்த மாணவரை உடனடியாக அருகில் உள்ள அரசு ஆரம்ப சுகாதார நிலையத்திற்கு ஆசிரியர்கள் சிகிச்சைக்காக அழைத்துச் சென்றனர். அங்கு அவருக்கு முதலுதவி சிகிச்சைகள் வழங்கப்பட்டதைத் தொடர்ந்து, மருத்துவர்களின் தீவிர கண்காணிப்பிற்குப் பின் ஆபத்தான கட்டத்தைத் தாண்டி மாணவர் பாதுகாப்பாக வீடு திரும்பினார்.
போலீசார் தீவிர விசாரணை
இச்சம்பவம் குறித்துத் தகவலறிந்து விரைந்து வந்த சாலைகிராமம் காவல் துறையினர், வழக்குப் பதிவு செய்து தீவிர விசாரணை மேற்கொண்டு வருகின்றனர்.
மாணவர்களுக்கு இடையே மோதல் ஏற்பட்டதற்கான உண்மையான காரணம் என்ன?
பள்ளி வளாகத்திற்குள் கத்தி எவ்வாறு கொண்டு வரப்பட்டது? என்ற கோணங்களில் பள்ளி ஆசிரியர்கள் மற்றும் வகுப்பறை மாணவர்களிடம் காவல்துறையினர் விசாரணை நடத்தி வருகின்றனர்.
பள்ளி வளாகத்திற்குள்ளேயே நடைபெற்ற இந்த வன்முறைச் சம்பவம் அப்பகுதி பொதுமக்கள் மற்றும் பெற்றோரிடையே பெரும் அச்சத்தையும் கவலையையும் ஏற்படுத்தியுள்ளது. பள்ளி மாணவர்களிடையே அதிகரித்து வரும் வன்முறைச் சம்பவங்களைத் தடுக்க உரிய விழிப்புணர்வும், கடுமையான கண்காணிப்பும் தேவை எனப் சமூக ஆர்வலர்கள் கோரிக்கை விடுத்துள்ளனர்.