மாநில நிர்வாகக் குழு கூட்டத்தில் கண்டனத் தீர்மானம் — மாணவர் பேரவைத் தேர்தலை நடத்த வலியுறுத்தல்! கல்லூரி மாணவர்கள் மற்றும் இளைஞர்கள் அமைதியான முறையில் போராட்டங்களில் பங்கேற்பதைத் தடுக்கும் வகையில் அரசுத் துறைகளை ஒருங்கிணைத்து நடவடிக்கை எடுக்க உத்தரவிட்டுள்ள தமிழ்நாடு அரசுக்கு இந்தியக் கம்யூனிஸ்ட் கட்சி (CPI) கடும் கண்டனம் தெரிவித்துள்ளது.
இந்தியக் கம்யூனிஸ்ட் கட்சியின் மாநில நிர்வாகக் குழுக் கூட்டம்:
சென்னையில் உள்ள கட்சியின் மாநிலத் தலைமை அலுவலகமான ‘பாலன் இல்லத்தில்’, மாநிலச் செயற்குழு உறுப்பினர் க.சந்தானம் தலைமையில் மாநில நிர்வாகக் குழுக் கூட்டம் நடைபெற்றது.
இக்கூட்டத்தில் மாநிலச் செயலாளர் மு.வீரபாண்டியன், தேசிய நிர்வாகக் குழு உறுப்பினர் டி.எம்.மூர்த்தி, மாநிலத் துணைச் செயலாளர்கள் நா.பெரியசாமி, எம்.ரவி, பொருளாளர் எம்.ஆறுமுகம், நாடாளுமன்ற உறுப்பினர்கள் கே.சுப்பராயன், வை.செல்வராஜ் உள்ளிட்ட முக்கிய நிர்வாகிகள் பலர் கலந்து கொண்டனர்.
கண்டனத் தீர்மானத்தின் முக்கிய அம்சங்கள்:
அடிப்படை உரிமைகள் பறிப்பு:
அரசு கலை மற்றும் அறிவியல் கல்லூரிகளில் பயிலும் மாணவர்கள், இடதுசாரிக் கட்சிகள் மற்றும் பிற அரசியல் இயக்கங்கள் நடத்தும் போராட்டங்களில் பங்கேற்பதைத் தடுக்க பள்ளிக் கல்வி, உயர்கல்வி, காவல் துறை மற்றும் மாவட்ட நிர்வாகத்தை ஒருங்கிணைத்து நடவடிக்கை எடுக்க அரசு உத்தரவிட்டுள்ளதை இக்கூட்டம் வன்மையாகக் கண்டிக்கிறது.
அரசியலமைப்புச் சட்டத்திற்கு எதிரானது:
18 வயதான இளைஞர்களுக்கு வாக்குரிமை வழங்கப்பட்டுள்ள நிலையில், அவர்களை அரசியலற்றவர்களாக மாற்ற முயலும் அதிகார வர்க்கத்தின் அணுகுமுறை ஜனநாயக விரோதமானது. நாட்டின் விடுதலைப் போராட்டம் முதல் சமூக மாற்றம் வரை மாணவர்களும் இளைஞர்களுமே முதன்மைச் சக்தியாகத் திகழ்ந்துள்ளனர்.
காரணமானவர்கள் மீது நடவடிக்கை தேவை:
திண்டுக்கல் மாவட்டம் குஜிலியம்பாறையில் இடதுசாரி கட்சியினரின் முகவரிகளை வட்டாட்சியர் சேகரிக்க உத்தரவிட்டதன் தொடர்ச்சியாகவே இந்த ஆணையும் பார்க்கப்படுகிறது. இந்த ஆணைகள் தற்போது திரும்பப் பெறப்பட்டிருந்தாலும், இதற்கு காரணமானவர்கள் மீது கடுமையான துறைரீதியான நடவடிக்கை எடுக்கப்பட வேண்டும்.
பிரதான கோரிக்கை:
மாணவர்களின் அரசியல் விழிப்புணர்வைத் தடுப்பதற்குப் பதிலாக, கல்வி நிறுவனங்களில் சமூகநீதி, மதச்சார்பின்மை மற்றும் சமத்துவத்தை வலுப்படுத்த வேண்டும். மேலும், கடந்த 30 ஆண்டுகளாக நிறுத்தப்பட்டுள்ள கல்வி நிறுவன மாணவர் பேரவைத் தேர்தல்களை (Student Union Elections) உடனடியாக நடத்தத் தமிழ்நாடு அரசு முன்வர வேண்டும் என இந்தியக் கம்யூனிஸ்ட் கட்சி ஒருமனதாகத் தீர்மானம் நிறைவேற்றியுள்ளது.
மாணவர் போராட்டங்கள் மீதான தடை உத்தரவு வாபஸ்: தவெக அரசின் அதிரடி மாற்றம்!