ஊரக வளர்ச்சி முகமையின் திட்ட இயக்குநர்களாக இந்திய வனப்பணி (IFS) அதிகாரிகளை நியமிக்கும் முடிவைத் தமிழக அரசு கைவிட வேண்டும் என்றும், அப்பதவிகளை ஊரக வளர்ச்சித் துறை அதிகாரிகளுக்குப் பதவி உயர்வு வழங்குவதன் மூலம் நிரப்ப வேண்டும் என்றும் பாமக தலைவர் அன்புமணி ராமதாஸ் வலியுறுத்தியுள்ளார்.
ஐ.எஃப்.எஸ் அதிகாரிகளின் நியமனத்திற்கு எதிர்ப்பு
இது குறித்து அவர் வெளியிட்டுள்ள அறிக்கையில் குறிப்பிட்டுள்ளதாவது:
“தமிழ்நாட்டில் தேனி மற்றும் கன்னியாகுமரி மாவட்டங்களின் ஊரக வளர்ச்சி முகமை திட்ட இயக்குநர்களாக இந்திய வனப்பணி அலுவலர்களை (IFS) நியமித்து அரசாணை பிறப்பிக்கப்பட்டுள்ளது.
கிராமப்புற மக்களுக்கு நேரடியாகச் சேவை வழங்க வேண்டிய பொறுப்புகளில், அத்துறைக்கு எந்த வகையிலும் தொடர்பில்லாத வனப்பணி அலுவலர்களை நியமிப்பது ஊரக மக்களுக்கான சேவையைச் சீர்குலைத்து விடும்.
தமிழக அரசு நிர்வாகத்தில் வருவாய்த்துறைக்கு அடுத்தபடியாக மக்களுடன் நேரடியாகத் தொடர்புள்ள துறை ஊரக வளர்ச்சி மற்றும் ஊராட்சித் துறை தான். 100 நாள் மற்றும் 150 நாள் வேலைத் திட்டங்கள், சாலைகள், பாலங்கள், குடிநீர் மற்றும் கழிப்பிட வசதிகள் போன்ற அனைத்துக் கட்டமைப்புகளையும் இத்துறையே செயல்படுத்துகிறது.”
பதவி உயர்வு பாதிப்பு மற்றும் கோரிக்கை
“ஊரக வளர்ச்சித் துறையில் இளநிலை உதவியாளராகப் பணியைத் தொடங்கி, 20 ஆண்டுகளுக்கும் மேலாகப் பணியாற்றி இணை இயக்குநர் நிலைக்கு உயருபவர்களுக்கே இப்பதவிக்கான முழு அனுபவமும் தகுதியும் உண்டு.
திட்ட இயக்குநர் பணிக்கு அகில இந்தியப் பணி அலுவலர்களைத் தொடர்ந்து நியமித்து வருவதால், ஊரக வளர்ச்சித் துறை அதிகாரிகள் 35 ஆண்டுகள் பணியாற்றினாலும் அவர்களுக்கு இயல்பாகக் கிடைக்க வேண்டிய பதவி உயர்வுகள் கிடைப்பதில்லை. இந்த அநீதி போக்கப்பட வேண்டும்.
எனவே, ஊரகப் பகுதிகளின் வளர்ச்சி மற்றும் அதிகாரிகளின் பதவி உயர்வைக் கருத்தில் கொண்டு, IFS அதிகாரிகளை நியமிக்கும் முடிவைத் தமிழக அரசு உடனே கைவிட்டு, ஊரக வளர்ச்சித் துறை அதிகாரிகளுக்கே அப்பதவியை வழங்க வேண்டும்” என்று அன்புமணி கேட்டுக்கொண்டுள்ளார்.