விசாரணைக்குப் பிறகு செய்தியாளர்களைச் சந்தித்த முன்னாள் அமைச்சர் செந்தில் பாலாஜி, தன் மீது தொடரப்பட்ட வழக்குகள் முற்றிலும் அரசியல் காழ்ப்புணர்ச்சியால் புனையப்பட்டவை என்றும், இவற்றைச் சட்டப்படியே முழுமையாக எதிர்கொள்வோம் என்றும் திட்டவட்டமாகத் தெரிவித்துள்ளார்.
வழக்குகளுக்குப் பின்னணியில் அரசியல் காழ்ப்புணர்ச்சி
மூன்று மணி நேரத்திற்கும் மேலாக நடைபெற்ற விசாரணைக்குப் பின் செய்தியாளர்களைச் சந்தித்த செந்தில் பாலாஜி, தன் மீதான வழக்குகள் குறித்து விரிவாகப் பேசினார். “வழக்கு தொடர்ந்து நீதிமன்றத்தில் நடைபெற்று வருவதால் அது குறித்து வெளியில் விரிவாகப் பேச முடியாது. எனினும், இது முழுக்க முழுக்க அரசியல் காழ்ப்புணர்ச்சியால் போடப்பட்ட வழக்காகும். ஆளுங்கட்சியினர் ஆட்சி நடத்துவதில் கவனம் செலுத்துவதை விட, எதிர்க்கட்சிகள் மீது வழக்குகளைத் தொடுவதிலேயே அதிக குறியாக உள்ளனர்,” என்று அவர் குற்றம் சாட்டினார்.
சட்டமன்றத்தில் பதிலளிக்கத் தயக்கம்
சட்டமன்றத்தில் எதிர்கேள்விகளுக்குப் பதிலளிக்கத் திராணியில்லாமல் ஆளுங்கட்சியினர் கூச்சல் குழப்பத்தை ஏற்படுத்துவதாகவும் அவர் விமர்சித்தார். மேலும், காணாமல் போன ஹார்ட் டிஸ்க் (Hard disk) குறித்தும், மின்வாரியக் கடன் குறைக்கப்பட்டதாகக் கூறப்படும் வெள்ளை அறிக்கை குறித்தும் பல கேள்விகளை எழுப்பியதாகவும், ஆனால் அதற்கு அவர்களிடம் எந்தப் பதிலும் இல்லை என்றும் அவர் குறிப்பிட்டார். வெள்ளை அறிக்கையானது முழுக்க முழுக்கத் திமுகவின் சாதனைகளை மட்டுமே முன்னிறுத்தி வெளியிடப்பட்டுள்ளதாகவும் அவர் தெரிவித்தார்.
மக்களே உரிய தீர்ப்பளிப்பார்கள்
இந்த விவகாரங்கள் அனைத்தையும் பொதுமக்கள் நேரலையாகக் கவனித்துக் கொண்டு வருவதாகவும், உரிய காலத்தில் மக்கள் இதற்கான தகுந்த பதிலை அளிப்பார்கள் என்றும் செந்தில் பாலாஜி எச்சரித்தார். “மூன்று பைல்களை அவர்கள் திறக்கட்டும், அதன் மீது என்ன நடவடிக்கை வேண்டுமானாலும் எடுக்கட்டும். முழுமையான விசாரணை முடிந்த பிறகு நீதிமன்றம் உண்மையை வெளிப்படுத்தும், அப்போது நானும் பேசுவேன்,” என்றார். மேலும், தற்போதைய அரசு மக்களுக்கு எந்தவிதப் பயனும் இல்லாத ஆட்சியை நடத்தி வருவதாகவும் அவர் தனது பேட்டியில் கடுமையாக விமர்சித்தார்.
3 தமிழர்கள் கொலையை சிபிஐ விசாரிக்க வேண்டும்: பிரதமர் மோடிக்கு அன்புமணி கடிதம்