பரந்தூரில் அமைப்பதாக திட்டமிடப்பட்டிருந்த பிரம்மாண்ட விமான நிலையத் திட்டத்தைக் கைவிடுவதாக தமிழக முதலமைச்சர் (விஜய்) எடுத்த முடிவைப் பாராட்டியும், சென்னைக்கு இரண்டாவது விமான நிலையம் தேவையில்லை என்பதற்கான சூழலியல் மற்றும் பொருளாதாரக் காரணங்களை விளக்கியும் பூவுலகு அமைப்பின் சுந்தர்ராஜன் விரிவாகப் பேசியுள்ளார்.
1,200 நாள் போராட்டத்திற்கு கிடைத்த வெற்றி: முதலமைச்சரின் முடிவுக்கு வரவேற்பு!
பரந்தூர் விமான நிலைய திட்டத்திற்கு எதிராக அப்பகுதி மக்கள் சுமார் 1,200 நாட்களுக்கும் மேலாக அமைதி வழியில் தொடர் போராட்டங்களை நடத்தி வந்தனர்.
பல்வேறு அடக்குமுறைகள், தடை உத்தரவுகள் மற்றும் பேரிகேடுகளைத் தாண்டியும் இப்போராட்டம் தொடர்ந்து நடைபெற்றது. தவெக தலைவராக விஜய் தனது பயணத்தின் போது இப்போராட்டத்திற்கு ஆதரவு தெரிவித்து, வாக்குறுதி அளித்திருந்தார்.
அதன்படி, ஆட்சிப் பொறுப்பேற்றதும் இத்திட்டத்தைக் கைவிடுவதாக அறிவித்துள்ளார். ரியல் எஸ்டேட் நிறுவனங்கள் மற்றும் தொழில் கூட்டமைப்புகளின் (CII) கடும் அழுத்தங்களை மீறி, சூழலியல் பார்வையில் இத்தகைய வரலாற்றுச் சிறப்புமிக்க முடிவை எடுத்த முதலமைச்சருக்குப் பாராட்டுக்கள் உரியது எனச் சுந்தர்ராஜன் குறிப்பிட்டுள்ளார்.
“90% நிலக் கையகப்படுத்துதல் என்பது பொய்!” – சுந்தர்ராஜன் உடைக்கும் புள்ளிவிவரங்கள்!
இத்திட்டத்திற்காக 90% நிலக் கையகப்படுத்தும் பணிகள் முடிந்துவிட்டதாக முந்தைய ஆட்சியாளர்கள் கூறுவது முற்றிலும் உண்மைக்குப் புறம்பான தகவல் என்று சுந்தர்ராஜன் சுட்டிக்காட்டியுள்ளார்.
மொத்த நிலத் தேவை: 5,746 ஏக்கர்
கையகப்படுத்தப்பட்ட நிலம்: 1,800 ஏக்கர் மட்டுமே
நீர்நிலைகள் மற்றும் அரசு நிலம்: 1,600 ஏக்கர் நீர்நிலைகள் உட்படச் சேர்த்தால் கூட மொத்த கையகப்படுத்தல் 3,600 ஏக்கரைத் தாண்டாது.
மேலும், இத்திட்டத்திற்கான சுற்றுச்சூழல் தாக்க மதிப்பீட்டு அறிக்கை (EIA) தயாரிக்கப்படவில்லை, மக்களிடம் கருத்து கேட்புக் கூட்டம் நடத்தப்படவில்லை மற்றும் முறையான சுற்றுச்சூழல் அனுமதியும் பெறப்படவில்லை. எவ்விதத் தடையுமின்றிச் செயல்படுத்தினால் கூட இத்திட்டம் தொடங்க 2030-31 ஆம் ஆண்டாகிவிடும்.
சென்னையை வெள்ளத்திலும் வெப்பத்திலும் மூழ்கடிக்கும் அபாயம்!
2015 பெருவெள்ளத்தின் போது சென்னையின் மேற்குப் பகுதிகளான அண்ணா நகர், அம்பத்தூர், ஆவடி போன்ற பகுதிகள் தப்பியதற்குக் காரணம் பரந்தூர் பகுதியிலுள்ள நீர்நிலைகள் பாதுகாப்பாக இருந்ததுதான் முக்கிய காரணியாகும்.
இப்போது 1,600 ஏக்கர் நீர்நிலைகளையும் 33 நீர் நிலைப் பகுதிகளையும் அழித்து 5,746 ஏக்கரில் சிமெண்ட் கான்கிரீட் தளங்களை அமைத்தால், அது சென்னை நகரத்தையே தீவிர வெப்ப நகரமாகவும் (Disaster City) மற்றும் மழைக்காலங்களில் ஒட்டுமொத்த நகரத்தையும் வெள்ளத்தில் மூழ்க வைக்கும் அபாயத்திற்கும் தள்ளிவிடும். 2022-ல் வெளியாகிய ஆய்வறிக்கையிலேயே (Pre-feasibility report) இப்பகுதி வெள்ள அபாயம் கொண்டது எனச் சுட்டிக்காட்டப்பட்டுள்ளதை அவர் நினைவுகூர்ந்தார்.
சென்னைக்கு இன்னொரு கிரீன்ஃபீல்ட் ஏர்போர்ட் தேவையா? நிர்வாகத் திறமையே முதன்மை!
மும்பை விமான நிலையம் வெறும் 1,500 ஏக்கரில் குறுக்குமறுக்கான (Cross runways) இரு ஓடுபாதைகளைக் கொண்டு நாளொன்றுக்கு 1,000 விமானங்களைக் கையாண்டு வருகிறது. ஆனால், 1,300 ஏக்கர் பரப்பளவு கொண்ட சென்னை மீனம்பாக்கம் விமான நிலையம் வெறும் 450 விமானங்களை மட்டுமே கையாள்கிறது. சென்னைக்குத் தேவை புதிய விமான நிலையம் அல்ல; உலகத் தரத்திலான திறன்மிக்க விமான நிலைய நிர்வாகமே ஆகும். 450 ஆக இருக்கும் விமான கையாளுதலை 800 ஆக உயர்த்த முதலில் நடவடிக்கை எடுக்க வேண்டும்.
தாய்வான் நாட்டின் தலைநகரிலேயே சர்வதேச ஏர்போர்ட் வெறும் 3,000 ஏக்கரில் இயங்கும்போது, பரந்தூரில் 5,700 ஏக்கரில் ஏர்போர்ட் அமைப்பதன் நோக்கம் விமான நிலையத்துக்காக மட்டுமல்ல; அதில் வணிக வளாகங்கள் (Malls) மற்றும் 5 நட்சத்திர ஹோட்டல்கள் கட்டுவதற்கே எனச் சுந்தர்ராஜன் விமர்சித்துள்ளார்.
மாநிலத்தின் பரவலாக்கப்பட்ட வளர்ச்சியை முடக்கும் பரந்தூர்
பெங்களூருவில் பிரம்மாண்ட விமான நிலையம் வந்ததால் அம்மாநிலத்தின் பிற பகுதிகள் வளரவில்லை. ஆனால், பரந்தூரில் மெகா ஏர்போர்ட் வராத காரணத்தினால்தான் தமிழ்நாட்டில் தூத்துக்குடி, ஓசூர், கோவை, திருச்சி, மதுரை போன்ற நகரங்கள் பரவலாக வளர்ச்சி அடைந்துள்ளன.
பரந்தூர் போன்ற மெகா ஏர்போர்ட் ஒரு தனியார் நிறுவனத்திடம் ஒப்படைக்கப்பட்டால், ₹30,000 – ₹40,000 கோடி முதலீடு செய்யும் அத்தனியார் நிறுவனம் மதுரை, கோவை, திருச்சி போன்ற தென் மாவட்ட விமான நிலையங்களின் விரிவாக்கத்தை அனுமதிக்காது. மேலும், ஓசூர் எலக்ட்ரானிக்ஸ் மண்டலத்திலிருந்து 200 கி.மீ தூரத்தில் உள்ள பரந்தூருக்கு வரமால், 60 கி.மீ தொலைவிலுள்ள பெங்களூருக்கே நிறுவனங்கள் செல்லும்.
எனவே, சென்னைக்கு இன்னொரு விமான நிலையம் தேவையில்லை என்றும்; தேவைப்பட்டால் மதுரை, கோவை, திருச்சி, தூத்துக்குடி விமான நிலையங்களை விரிவாக்கம் செய்து ஓசூரில் புதிய விமான நிலையம் அமைப்பதே சரியான பரவலாக்கப்பட்ட வளர்ச்சிக்கு வழிவகுக்கும் எனச் சுந்தர்ராஜன் வலியுறுத்தியுள்ளார். அதேபோல, இத்திட்டத்திற்காக கையகப்படுத்தப்பட்ட 1,800 ஏக்கர் நிலங்களை மீண்டும் விவசாயிகளுக்கே திருப்பிக் கொடுக்க வேண்டும் என்றும் அவர் கோரிக்கை விடுத்துள்ளார்.