தினமும் ₹5,000 வரை லாபம் ஈட்டலாம்: கிராமப்புற இளைஞர்களை இலக்காகக் கொண்ட 10 உற்பத்தித் தொழில்கள்!

கிராமப்புறங்களில் நிலவும் வேலைவாய்ப்பின்மையை எதிர்கொள்ளவும், உள்ளூர் பொருளாதாரத்தை மேம்படுத்தவும் கிராமப்புற உற்பத்தித் தொழில்கள் சிறந்த தீர்வாக உருவெடுத்துள்ளன. நகரங்களை விட கிராமங்களில் மூலப்பொருட்கள் மலிவாகக் கிடைப்பது, குறைந்த வாடகை மற்றும் பராமரிப்புச் செலவு, கட்டுப்படியாகும் வேலையாட்கள் கூலி போன்ற காரணங்களால் உற்பத்தித் தொழில்களில் அதிக லாப விகிதம் கிடைப்பதாகப் பொருளாதார வல்லுநர்கள் சுட்டிக்காட்டுகின்றனர்.

கிராமத்திலேயே தங்கி தினமும் ₹5,000 வரை நிகர லாபம் ஈட்டக்கூடிய 10 முக்கிய உற்பத்தித் தொழில்கள், அவற்றின் முதலீட்டு விவரங்கள் மற்றும் அரசு வழங்கி வரும் நிதியுதவிகள் குறித்த விரிவான தொகுப்பு இதோ…

தேங்காய் நார் மற்றும் காயர்பித் தயாரிப்பு

பொள்ளாச்சி, தஞ்சாவூர், சேலம் மற்றும் கன்னியாகுமரி போன்ற தென்னை சாகுபடி அதிகம் உள்ள மாவட்டங்களில் இத்தொழில் தங்கச் சுரங்கமாகத் திகழ்கிறது.

• இயந்திரங்கள் மற்றும் இடம்: காயர் எக்ஸ்ட்ராக்ஷன் மெஷின் மற்றும் ஹைட்ராலிக் பித் கம்பாக்டர் மெஷின் தேவைப்படும். இத்தொழிலைத் தொடங்க 2,000 சதுர அடி திறந்தவெளி இடமும், ₹3.2 லட்சம் முதல் ₹5 லட்சம் வரை ஆரம்ப முதலீடும் தேவை.

• உற்பத்தி மற்றும் லாபம்: தென்னந்தோப்பு விவசாயிகளிடம் இருந்து காய்ந்த மட்டைகளை வாங்கி, நாளொன்றுக்கு 8 மணி நேர இயக்கத்தில் 1,000 கிலோ (1 டன்) காயர்பித் கட்டிகளை தயாரிக்கலாம். ஒரு கிலோ உற்பத்திச் செலவு ₹12 ஆகவும், ஹோல்சேல் விற்பனை விலை ₹20 முதல் ₹22 ஆகவும் உள்ளது. இதர பராமரிப்புச் செலவுகள் போக தினமும் ₹5,000 நிகர லாபமாகச் சேமிக்க முடியும்.

• சந்தை வாய்ப்பு: மாடித் தோட்டம் அமைப்பாளர்கள், நாற்றங்கால்கள், கோழிப்பண்ணைகள் மற்றும் ஏற்றுமதி நிறுவனங்களுக்கு இதனை நேரடியாகச் சப்ளை செய்யலாம்.

கால்நடை மற்றும் கோழி தீவனம் தயாரிப்பு

சந்தையில் பிராண்டட் தீவனங்களின் விலை உயர்ந்து வருவதால், உள்ளூர் அளவில் தயாராகும் தரமான தீவனங்களுக்குக் கிராமங்களில் எப்போதும் நிலையான தேவை உள்ளது.

• இயந்திரங்கள் மற்றும் இடம்: கிரைண்டர், மிக்ஸர் மற்றும் ஃபீட் பேலட் ஆகிய இயந்திரங்கள் தேவை. 300 முதல் 400 சதுர அடி பரப்பளவிலான ஷெட்டில் ₹2 லட்சம் முதல் ₹3 லட்சம் முதலீட்டில் தொடங்கலாம்.

• உற்பத்தி மற்றும் லாபம்: சோளம், நெல் தவுடு, கடலை புண்ணாக்கு, உளுந்து பொட்டு மற்றும் தாது உப்புக்களைக் கொண்டு நாளொன்றுக்கு 1,000 கிலோ தீவனம் தயாரிக்க முடியும். கிலோவுக்கு ₹22 செலவாகும் நிலையில், ₹28-க்கு விற்பனை செய்வதன் மூலம் அனைத்துச் செலவுகளும் போக தினமும் ₹5,000 லாபம் ஈட்டலாம்.

• சந்தை வாய்ப்பு: உள்ளூர் மாட்டுப் பண்ணைகள், நாட்டுக்கோழிப் பண்ணையாளர்கள் மற்றும் பால் கூட்டுறவுச் சங்கங்கள் மூலம் நேரடியாக விற்பனை செய்யலாம்.

மரச்செக்கு எண்ணெய் உற்பத்தி

ஆரோக்கிய விழிப்புணர்வு காரணமாக இரசாயனம் கலக்காத பாரம்பரிய மரச்செக்கு எண்ணெய்களுக்கான தேவை நகரங்களிலும் கிராமங்களிலும் வெகுவாக அதிகரித்துள்ளது.

• இயந்திரங்கள் மற்றும் இடம்: 2 வுட்டன் செக்குகள் மற்றும் ஒரு ஆயில் ஃபில்டர் மெஷின் அமைக்க 200 முதல் 300 சதுர அடி இடமும், ₹2 லட்சம் முதல் ₹3 லட்சம் வரை முதலீடும் தேவை.

• உற்பத்தி மற்றும் லாபம்: நிலக்கடலை, எள்ளு, கொப்பரை தேங்காய் ஆகியவற்றைக் கொண்டு தினமும் 100 லிட்டர் எண்ணெய் தயாரிக்கலாம். 1 லிட்டர் கடலை எண்ணெய் தயாரிக்க ₹190 செலவாகும் நிலையில், சந்தையில் ₹250-க்கு விற்பனை செய்யப்படுகிறது. எண்ணெய் விற்பனையில் கிடைக்கும் ₹6,000 லாபத்துடன், பிண்ணாக்கு விற்பனை மூலம் கூடுதல் உதிரி வருமானமும் கிடைக்கும். கழிவுகள் போக தினமும் ₹5,000 முதல் ₹6,000 வரை லாபம் ஈட்ட முடியும்.

• சந்தை வாய்ப்பு: சொந்தக் கடை மூலம் நேரடி விற்பனை, ஆர்கானிக் அங்காடிகள் மற்றும் குடியிருப்பு வளாகங்களுக்கு (Apartments) ஹோம் டெலிவரி செய்யலாம்.

 பாக்குமட்டை தட்டு தயாரிப்பு

ஒருமுறை மட்டுமே பயன்படுத்தப்படும் பிளாஸ்டிக் பொருட்களுக்கான தடையைத் தொடர்ந்து, சுற்றுச்சூழலுக்கு உகந்த பாக்குமட்டை தட்டுகளுக்குச் சர்வதேச அளவில் வரவேற்பு நிலவுகிறது.

• இயந்திரங்கள் மற்றும் இடம்: ஆட்டோமேட்டிக் அல்லது செமி ஆட்டோமேட்டிக் ஹைட்ராலிக் பிளேட் மெஷின் மற்றும் வாஷிங் செட்டப் அமைக்க 300 முதல் 500 சதுர அடி இடமும், ₹1.5 லட்சம் முதல் ₹2 லட்சம் முதலீடும் தேவை.

• உற்பத்தி மற்றும் லாபம்: காய்ந்த பாக்குமட்டைகளைக் கொண்டு 8 மணி நேரத்தில் 3,000 தட்டுகள் தயாரிக்கலாம். ஒரு தட்டின் உற்பத்திச் செலவு ₹2.20 ஆகவும், 12 இன்ச் தட்டின் ஹோல்சேல் விலை ₹4 ஆகவும் உள்ளது. போக்குவரத்துச் செலவுகள் கழித்து தினமும் ₹5,000 நிகர லாபமாகச் சேரும்.

• சந்தை வாய்ப்பு: திருமண கேடரிங் காண்ட்ராக்டர்கள், மொத்த வியாபாரிகள் மற்றும் ஏற்றுமதி முகவர்கள் மூலம் அமெரிக்கா, துபாய் போன்ற நாடுகளுக்கு ஏற்றுமதி செய்யலாம்.

மசாலா மற்றும் மஞ்சள் தூள் அரைக்கும் தொழில்

சமையல் தேவைகள் இருக்கும் வரை மசாலாப் பொருட்களுக்கான சந்தை வாய்ப்பு என்றும் குறையாது.

• இயந்திரங்கள் மற்றும் இடம்: 5 HP முதல் 7.5 HP வரையிலான பல்வரைசர் மெஷின் மற்றும் பவுச் சீலிங் மெஷின் அமைக்க 150 முதல் 250 சதுர அடி இடமும், ₹1.20 லட்சம் முதல் ₹2 லட்சம் வரை முதலீடும் போதுமானது.

• உற்பத்தி மற்றும் லாபம்: மிளகாய், மஞ்சள், மல்லி போன்ற மூலப்பொருட்களைக் கொண்டு தினமும் 100 கிலோ மசாலா தூள் பேக் செய்யலாம். கிலோவுக்கு ₹170 உற்பத்திச் செலவு ஆகிறது. சந்தையில் ₹230-க்கு விற்பனை செய்வதன் மூலம் செலவுகள் போக தினமும் ₹5,000 நிகர லாபம் பெறலாம்.

• சந்தை வாய்ப்பு: உள்ளூர் மளிகைக் கடைகள், ஹோட்டல்கள், உணவகங்கள் மற்றும் சமூக வலைதள விளம்பரங்கள் மூலம் வீடுகளுக்கு நேரடியாக விற்பனை செய்ய முடியும்.

துணி மற்றும் பேப்பர் பை தயாரிப்பு

சுற்றுச்சூழல் விழிப்புணர்வு மற்றும் அரசு தடைகள் காரணமாகத் துணி மற்றும் பேப்பர் பைகளின் பயன்பாடு அசுர வேகத்தில் அதிகரித்து வருகிறது.

• இயந்திரங்கள் மற்றும் இடம்: ஹெவி டியூட்டி தையல் மெஷின்கள், ஸ்கிரீன் பிரிண்டிங் செட்டப் அல்லது பேப்பர் பை கட்டிங் மெஷின்கள் அமைக்க 200 முதல் 300 சதுர அடி இடமும், ₹1.5 லட்சம் முதல் ₹2.5 லட்சம் வரை முதலீடும் தேவை.

• உற்பத்தி மற்றும் லாபம்: 2 முதல் 3 வேலையாட்களுடன் தினமும் 1,000 பைகள் தயாரிக்க முடியும். ஒரு பையின் உற்பத்திச் செலவு ₹8; மொத்த விற்பனை விலை ₹14. பராமரிப்புச் செலவுகள் போக தினமும் ₹5,000 லாபம் கிடைக்கும்.

• சந்தை வாய்ப்பு: ஜவுளிக் கடைகள், நகைக் கடைகள், பேக்கரிகள் மற்றும் சூப்பர் மார்க்கெட்டுகளுக்கு அவற்றின் லோகோ அச்சிட்டுச் சப்ளை செய்யலாம்.

 ஃப்ளை ஆஷ் மற்றும் இன்டர்லாக் பிரிக்ஸ் தயாரிப்பு

கட்டுமானச் செலவைக் குறைக்கும் ஃப்ளை ஆஷ் மற்றும் இன்டர்லாக் கற்களுக்கு ரியல் எஸ்டேட் மற்றும் கட்டுமானத் துறையில் தொடர் தேவை உள்ளது.

• இயந்திரங்கள் மற்றும் இடம்: பேன் மிக்சர் மற்றும் ஹைட்ராலிக் பிரஸ் பிரிக் மெஷின் நிறுவுவதற்கு 1,000 முதல் 1,500 சதுர அடி திறந்தவெளி இடமும், ₹2.5 லட்சம் முதல் ₹3.5 லட்சம் வரை முதலீடும் தேவை.

• உற்பத்தி மற்றும் லாபம்: ஃப்ளை ஆஷ், சிமெண்ட், எம்-சாண்ட் கொண்டு தினமும் 1,500 செங்கற்கள் உற்பத்தி செய்யலாம். ஒரு கல்லின் உற்பத்திச் செலவு ₹6.50; விற்பனை விலை ₹11. லாரி வாடகை மற்றும் செலவுகள் போக தினமும் ₹5,000 லாபம் ஈட்டலாம்.

• சந்தை வாய்ப்பு: கட்டிடக் கலைஞர்கள் (Civil Engineers), காண்ட்ராக்டர்கள் மற்றும் சொந்தமாக வீடு கட்டுபவர்களிடம் நேரடியாக ஆர்டர்களைப் பெறலாம்.

மண்புழு உரம் மற்றும் இயற்கை உரங்கள் தயாரிப்பு

நஞ்சில்லாத விவசாயத்தை நோக்கி விவசாயிகள் மாறி வரும் இக்காலத்தில், மண்புழு உரம் ‘கருப்பு தங்கம்’ என்று அழைக்கப்படுகிறது.

• அமைப்புகள் மற்றும் இடம்: HDPE வெர்மிபெட்ஸ் படுக்கைகள், ரொட்டேட்டரி சீவர் மெஷின் அமைக்க 1,000 முதல் 2,000 சதுர அடி நிழற்பாங்கு இடம் தேவை. ஆரம்ப முதலீடு ₹1 லட்சம் முதல் ₹1.5 லட்சம் வரை ஆகும்.

• உற்பத்தி மற்றும் லாபம்: மாட்டுச் சாணம் மற்றும் விவசாயக் கழிவுகளைக் கொண்டு தினமும் 1,000 கிலோ உரம் தயாரிக்கலாம். உற்பத்திச் செலவு கிலோவுக்கு ₹3.50; விற்பனை விலை ₹9.50. இதர செலவுகள் கழித்து தினமும் ₹5,000 நிகர லாபமாக கிடைக்கும்.

• சந்தை வாய்ப்பு: செடி நர்சரிகள், ஆர்கானிக் உரக் கடைகள், தென்னை/பாக்கு தோட்டம் வைத்துள்ள விவசாயிகள் மற்றும் மாடித் தோட்டம் அமைப்பாளர்களிடம் சப்ளை செய்யலாம்.

 கற்பூரம் மற்றும் அகர்பத்தி தயாரிப்பு

ஆன்மீக வழிபாடுகள் மற்றும் விசேஷங்கள் தொடர்ந்து நடைபெறுவதால் இத்தொழிலுக்கு 365 நாட்களும் சந்தை வாய்ப்பு உண்டு.

• இயந்திரங்கள் மற்றும் இடம்: ஆட்டோமேட்டிக் காம்பர் டேப்லெட் மெஷின் மற்றும் பவுச் சீலிங் மெஷின் அமைக்க வீட்டின் ஒரு சிறிய அறையோ (200 சதுர அடி) போதுமானது. முதலீடு ₹80,000 முதல் ₹1.20 லட்சம் வரை ஆகும்.

• உற்பத்தி மற்றும் லாபம்: தினமும் 25 முதல் 30 கிலோ கற்பூரம் தயாரிக்கலாம். ஒரு கிலோ உற்பத்திச் செலவு ₹350; ஹோல்சேல் விற்பனை விலை ₹550. ஒரு கிலோவுக்கு ₹200 வீதம் தினமும் ₹5,000 நிகர லாபமாகக் கிடைக்கும்.

• சந்தை வாய்ப்பு: உள்ளூர் மளிகைக் கடைகள், கோயில் பூசைக் கடைகள் மற்றும் மொத்த விநியோகஸ்தர்கள் மூலம் விற்பனை செய்யலாம்.

 சிறுதானிய மாவு மற்றும் ஸ்நாக்ஸ் தயாரிப்பு

ராகி, கம்பு, தினை, சாமை போன்ற சிறுதானியப் பொருட்களுக்குப் பொதுமக்கள் மத்தியில் அதிக வரவேற்பு கிடைத்து வருகிறது.

• இயந்திரங்கள் மற்றும் இடம்: கமர்சியல் பல்வரைசர், ரோஸ்டர் மெஷின் மற்றும் கண்டினியூவஸ் பேண்ட் சீலர் அமைக்க 200 முதல் 300 சதுர அடி இடமும், ₹1.20 லட்சம் முதல் ₹1.80 லட்சம் வரை முதலீடும் தேவை.

• உற்பத்தி மற்றும் லாபம்: தினமும் 100 கிலோ சத்துமாவு அல்லது சிறுதானிய ஸ்நாக்ஸ் பேக் செய்ய முடியும். உற்பத்திச் செலவு கிலோவுக்கு ₹80; ஹோல்சேல் விற்பனை விலை ₹140. கமிஷன் போக தினமும் ₹5,000 நிகர லாபம் பெறலாம்.

• சந்தை வாய்ப்பு: ஆர்கானிக் அங்காடிகள், சூப்பர் மார்க்கெட்டுகள் மற்றும் ஆன்லைன் சமூக வலைதளங்கள் மூலம் நேரடியாக விற்பனை செய்யலாம்.

விற்பனையை உயர்த்த 3 முக்கிய உத்திகள்

1. B2B மாடல்: ஆரம்பத்தில் 50 முதல் 100 கடைகளுக்குக் கமிஷன் அல்லது கடன் அடிப்படையில் பொருட்களை வழங்கிச் சந்தையைப் பிடிக்கலாம்.

2. லோக்கல் மார்க்கெட்டிங்: WhatsApp மற்றும் Facebook குழுக்கள் மூலம் தயாரிப்பு வீடியோக்களைப் பகிர்ந்து ‘ஹோம் டெலிவரி’ சேவை வழங்கலாம்.

3. ஒயிட் லேபலிங்: சொந்த பிராண்ட் பெயர் இல்லாமல் பெரிய நிறுவனங்களுக்குப் பொருட்களை மொத்தமாக (Bulk) உற்பத்தி செய்து தரலாம்.

அரசு மானியங்கள் மற்றும் கடன் உதவிகள்

கிராமப்புறங்களில் உற்பத்தித் தொழில்களை ஊக்குவிக்க அரசுகள் பல்வேறு திட்டங்களைச் செயல்படுத்தி வருகின்றன:

• PMEGP திட்டம்: இத்திட்டத்தின் கீழ் ₹10 லட்சம் முதல் ₹50 லட்சம் வரை வங்கி மூலம் கடன் பெறலாம். இதில் 25% முதல் 35% வரை அரசு மானியம் (Subsidy) நேரடியாக வழங்கப்படுகிறது.

• NEEDS திட்டம்: பட்டப்படிப்பு முடித்த இளைஞர்களுக்கு 25% மானியத்துடன் கூடிய முதலீட்டுக் கடன் மாவட்ட தொழில் மையம் மூலமாக வழங்கப்படுகிறது.

• உதயம் பதிவு: udyamregistration.gov.in என்ற அரசின் இணையதளத்தில் ஆதார் மற்றும் பான் கார்டு விவரங்களை அளித்து இலவசமாக MSME சான்றிதழ் பெறலாம். இதன் மூலம் வங்கிக் கடன்களில் முன்னுரிமை கிடைக்கும்.

ஆரம்பகட்டத்தில் சிறிய அளவில் தொடங்கி, சந்தையின் தேவையைப் புரிந்து கொண்டு தொழிலை விரிவுபடுத்துவதே வெற்றிக்கான வழி என தொழில் ஆலோசகர்கள் பரிந்துரைக்கின்றனர்.

கவர்ச்சிகரமான விளம்பரங்கள் vs நிஜக்கள நிலவரம்: தொடர்ச்சியாக மூடப்படும் பரண்மேல் ஆட்டுப்பண்ணைகள் — அதிர்ச்சி தரும் பின்னணி தகவல்கள்!