“அமைதி” கருப்பொருளில் 11 நாட்கள் திருவிழா ஆயிரக்கணக்கான போலீசார் பாதுகாப்பு & போக்குவரத்து மாற்றம்
சென்னை பெசன்ட் நகரில் அமைந்துள்ள் உலகப் புகழ்பெற்ற அன்னை வேளாங்கண்ணி தேவாலயத்தின் 54-வது ஆண்டு பெருவிழா இன்று (ஆகஸ்ட் 29) மாலை கொடியேற்றத்துடன் கோலாகலமாகத் தொடங்குகிறது. இதனை முன்னிட்டுத் தேவாலயத்தின் முன்புறம் பல்லாயிரக்கணக்கான பக்தர்கள் திரண்டுள்ளனர்.
திருவிழா நிகழ்வுகள் & நேரங்கள்:
இன்று தொடங்கி செப்டம்பர் 8-ஆம் தேதி வரை 11 நாட்கள் நடைபெறும் இத்திருவிழா, இந்த ஆண்டு “அமைதி” என்ற மையக் கருப்பொருளை அடிப்படையாகக் கொண்டு கொண்டாடப்படுகிறது.
கொடி பவனி: இன்று மாலை 4.30 மணியளவில் புனிதக் கொடி பவனி தொடங்குகிறது.
கொடியேற்றம்: மாலை 5.45 மணிக்குச் சென்னை – மயிலை உயர்மறை மாவட்டப் பேராயர் ஜார்ஜ் அந்தோணிசாமி அவர்கள் 75 அடி உயரக் கொடிமரத்தில் திருக்கொடியை ஏற்றி விழாவை முறைப்படி தொடங்கி வைக்கிறார்.
பெரிய தேர் பவனி: திருவிழாவின் முக்கிய நிகழ்வான மின் அலங்காரப் பெரிய தேர் பவனி செப்டம்பர் 7-ஆம் தேதி இரவு 7.30 மணிக்கு நடைபெறும்.
கொடி இறக்கம்: செப்டம்பர் 8-ஆம் தேதி மாலையுடன் விழா நிறைவடைந்து திருக்கொடி இறக்கப்படுகிறது.
நடைபயணம் & பக்தர்களின் வருகை:
சென்னை மாநகரம் மட்டுமின்றிச் சுற்றியுள்ள பல்வேறு மாவட்டங்களிலிருந்தும் ஏராளமான பக்தர்கள் பெசன்ட் நகர் அன்னை வேளாங்கண்ணி திருத்தலத்தை நோக்கித் தொடர்ந்து நடைபயணமாக (பாதயாத்திரை) வந்த வண்ணம் உள்ளனர்.
பாதுகாப்பு & அடிப்படை வசதிகள்:
பாதுகாப்பு: பாதுகாப்புப் பணியில் ஆயிரக்கணக்கான காவல் துறையினர் ஈடுபடுத்தப்பட்டுள்ளனர். மேலும், நூற்றுக்கணக்கான கண்காணிப்பு கேமராக்கள் (CCTV) பொருத்தப்பட்டு, கட்டுப்பாட்டு அறையிலிருந்து (Control Room) தீவிரமாகக் கண்காணிக்கப்பட்டு வருகிறது.
போக்குவரத்து மாற்றம்: கொடியேற்ற விழாவைக் முன்னிட்டு பெசன்ட் நகர் மற்றும் அதனைச் சுற்றியுள்ள பகுதிகளில் போக்குவரத்து மாற்றங்கள் செய்யப்பட்டுள்ளன.
அடிப்படை வசதிகள்: வருகை தரும் பக்தர்களின் வசதிக்காக ஆலய வளாகம் மற்றும் பெசன்ட் நகர் கடற்கரைப் பகுதிகளில் குடிநீர், சுகாதாரம் உள்ளிட்ட அனைத்து அடிப்படை வசதிகளும் சிறப்பாகச் செய்யப்பட்டுள்ளன.
2 மாத தவணை பாக்கி: ஃபைனான்ஸ் நிறுவனம் கார் பறிமுதல் செய்ததால் ஓட்டுநர் தூக்கிட்டுத் தற்கொலை!