விதிமீறி நிறுத்தப்பட்ட வாகனங்களின் டயர்களில் காற்றைப் பிடுங்க உத்தரவு; நடைபாதை ஆக்கிரமிப்புக் கடைகளும் அகற்றம்.
சேலம் புதிய பேருந்து நிலையத்தில் போக்குவரத்து இடையூறாக நிறுத்தப்பட்டிருந்த வாகனங்கள் மற்றும் ஆக்கிரமிப்புக் கடைகள் மீது மாநகரக் காவல் துணை ஆணையர் (போக்குவரத்து) மகேஸ்வரி அதிரடி நடவடிக்கை மேற்கொண்டார்.
அதிரடி ஆய்வு:
சேலம் புதிய பேருந்து நிலையப் பகுதியில் அடிக்கடி ஏற்படும் போக்குவரத்து நெரிசலைக் கட்டுப்படுத்தவும், பயணிகளுக்கு ஏற்படும் இடையூறுகளைத் தவிர்க்கவும் மாநகரக் காவல் துணை ஆணையர் மகேஸ்வரி தலைமையில் காவல்துறையினர் தீவிர கள ஆய்வில் ஈடுபட்டனர்.
அப்போது, பேருந்து நிலைய வளாகத்திற்குள் ஒதுக்கப்பட்ட பார்க்கிங் பகுதியில் வாகனங்களை நிறுத்தாமல், பயணிகள் நடந்து செல்லும் பாதையிலும், பேருந்துகள் வந்து செல்லும் வழித்தடங்களிலும் ஏராளமான இருசக்கர வாகனங்கள் மற்றும் நான்கு சக்கர வாகனங்கள் கண்டபடி நிறுத்தப்பட்டிருந்தன.
டயர் காற்றைப் பிடுங்க உத்தரவு:
இதனைக் கண்டு கடுப்பான துணை ஆணையர் மகேஸ்வரி, “பார்க்கிங்ல கொண்டு போய் விடாம இங்க வந்து விட்டுட்டு போயிருக்காங்க.. எல்லா வாகனத்துலயும் காத்த பிடிங்கி விடுங்க!” என அதிகாரிகளுக்கு அதிரடியாக உத்தரவிட்டார்.
இதனைத் தொடர்ந்து, விதிமீறி நிறுத்தப்பட்டிருந்த அனைத்து வாகனங்களின் டயர்களிலிருந்தும் காற்று இறக்கப்பட்டது. மேலும், விதிகளை மீறிய வாகன உரிமையாளர்களுக்கு அபராதமும் விதிக்கப்பட்டது.
ஆக்கிரமிப்புக் கடைகள் அகற்றம்:
இதனைத் தொடர்ந்து, பேருந்து நிலைய நடைபாதையை ஆக்கிரமித்து வைக்கப்பட்டிருந்த தற்காலிகக் கடைகள், விளம்பரப் பலகைகள் மற்றும் தள்ளுவண்டிகளையும் காவல்துறையினர் அதிரடியாக அகற்றினர்.
இனிமேல் பொதுமக்களுக்கும் போக்குவரத்துக்கும் இடையூறாக ஆக்கிரமிப்புகள் செய்தாலோ அல்லது கண்ட இடங்களில் வாகனங்களை நிறுத்தினாலோ கடுமையான நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.
துணை ஆணையரின் இந்தச் சடதி அதிரடி நடவடிக்கைக்குப் பயணிகள் மற்றும் பொதுமக்கள் வரவேற்பு தெரிவித்துள்ளனர்.