அதிமுக சட்டமன்ற உறுப்பினர்களை தவெக தங்கள் பக்கம் இழுத்துக் கொண்டதன் காரணமாகவே இரண்டு தொகுதிகளுக்கு இடைத்தேர்தல் அறிவிக்கப்பட்டுள்ளதாக அதிமுக பொதுச் செயலாளர் எடப்பாடி பழனிசாமி கடுமையாக விமர்சித்துள்ளார்.
திருச்சியில் நடைபெற்ற அதிமுக நிர்வாகி இல்லத் திருமண விழாவில் பங்கேற்ற எடப்பாடி பழனிசாமி, அங்கு பேசியபோது தமிழக அரசியல் நிலவரம், இடைத்தேர்தல், விவசாயிகள் பிரச்சினை, மின்சாரம் மற்றும் ஆட்சியின் செயல்பாடுகள் குறித்து பல்வேறு கருத்துகளை தெரிவித்தார்.
“மிட்டாய் கொடுத்து அழைத்துச் செல்வது போல இழுத்தனர்”
புதிதாக ஆட்சிக்கு வந்த தவெக, அதிமுக சட்டமன்ற உறுப்பினர்களை தெருவில் விளையாடிக் கொண்டிருக்கும் குழந்தைகளுக்கு மிட்டாய் கொடுத்து அழைத்துச் செல்வது போல தங்கள் பக்கம் இழுத்துக் கொண்டதாக எடப்பாடி பழனிசாமி விமர்சித்தார்.
இதன் காரணமாகவே இரண்டு தொகுதிகளுக்கு இடைத்தேர்தல் அறிவிக்கப்பட்டுள்ளதாகவும் அவர் கூறினார்.
அந்த இரண்டு சட்டமன்ற உறுப்பினர்களும் அதிமுக தொண்டர்களின் உழைப்பாலும், கூட்டணிக் கட்சித் தலைவர்களின் உழைப்பாலும் வெற்றி பெற்றவர்கள் என்றும் எடப்பாடி பழனிசாமி தெரிவித்தார்.
“இரவல் காலில் நிற்கும் ஆட்சி”
சுயநலத்திற்காகவும், குதிரை பேரத்துக்கு விலைபோயும் அதிமுக சட்டமன்ற உறுப்பினர்களை ராஜினாமா செய்ய வைத்து ஆட்சியை தக்க வைத்துக் கொண்டுள்ளதாக அவர் குற்றம்சாட்டினார்.
“அவர்கள் சொந்தக் காலில் நிற்கவில்லை; இரவல் காலில் நின்று கொண்டிருக்கிறார்கள்” என விமர்சித்த எடப்பாடி பழனிசாமி, கூட்டணிக் கட்சியில் இருப்பவர்கள் விலகிக் கொண்டால் ஆட்சி கவிழ்ந்துவிடும் என்றும் கூறினார்.
“வாக்குறுதிகளை நிறைவேற்றவில்லை”
ஆட்சிப் பொறுப்பேற்று சில மாதங்கள் கடந்துள்ள நிலையில், மக்களுக்காக என்னென்ன திட்டங்களை புதிய அரசு வழங்கியுள்ளது என எடப்பாடி பழனிசாமி கேள்வி எழுப்பினார்.
தேர்தல் நேரத்தில் அளிக்கப்பட்ட வாக்குறுதிகளில் பெரும்பாலானவை நிறைவேற்றப்படவில்லை என்றும், மக்களுக்கு தேவையான பணிகளை மேற்கொள்ளாமல் சமூக வலைதள பதிவுகள் மற்றும் ரீல்ஸ் மூலம் காலத்தை கழித்து வருவதாகவும் அவர் விமர்சித்தார்.
அதிமுக ஆட்சியின் திட்டங்களை பட்டியலிட்ட எடப்பாடி
அதிமுக 30 ஆண்டுகளுக்கும் மேலாக தமிழகத்தை ஆட்சி செய்த கட்சி என்றும், பொன்விழா கண்ட கட்சி என்றும் குறிப்பிட்ட எடப்பாடி பழனிசாமி, பொதுமக்களுக்கு ஏராளமான திட்டங்களை வழங்கியுள்ளதாக தெரிவித்தார்.
டெல்டா மாவட்டங்களை பாதுகாக்கும் வகையில் பாதுகாக்கப்பட்ட வேளாண் மண்டலத்தை சட்டபூர்வமாக பெற்றுத் தந்தது அதிமுக ஆட்சிதான் என்றும் அவர் கூறினார்.
மேலும், மத்திய அரசு மற்றும் கர்நாடக அரசுடன் போராடி காவிரியில் தமிழகத்திற்கு கிடைக்க வேண்டிய நீரை பெற்றுத் தந்ததும் அதிமுக அரசுதான் என தெரிவித்தார்.
விவசாயிகளுக்காக பல்வேறு நடவடிக்கைகள்
விவசாயிகளுக்கு பிரச்சினை ஏற்பட்டபோதெல்லாம் உடனடியாக நடவடிக்கை எடுத்தது அதிமுக அரசு என எடப்பாடி பழனிசாமி கூறினார்.
கூட்டுறவு வங்கிகளில் விவசாயிகள் பெற்ற பயிர்க்கடன்களை தள்ளுபடி செய்தது, அரசு நேரடி நெல் கொள்முதல் நிலையங்களில் விவசாயிகளின் நெல்லை உடனுக்குடன் கொள்முதல் செய்தது, அதற்கான தொகையை விவசாயிகளின் வங்கிக் கணக்கில் செலுத்தியது உள்ளிட்ட பல்வேறு நடவடிக்கைகளை அதிமுக அரசு மேற்கொண்டதாக அவர் தெரிவித்தார்.
மின்வெட்டு, மின்கட்டண உயர்வுக்கு விமர்சனம்
தமிழகத்தில் அத்தியாவசியப் பொருட்களின் விலைவாசி உயர்ந்துள்ளதாகவும், பல்வேறு பகுதிகளில் அடிக்கடி மின்தடை ஏற்படுவதாகவும் எடப்பாடி பழனிசாமி குற்றம்சாட்டினார்.
மின்கட்டணமும் உயர்த்தப்பட்டுள்ளதாக கூறிய அவர், 2011-ம் ஆண்டு அதிமுக ஆட்சிக்கு வந்தபோது தமிழகத்தில் கடுமையான மின்வெட்டு நிலவியதாகவும், ஆட்சிப் பொறுப்பேற்ற மூன்றே ஆண்டுகளில் தமிழகத்தை மின் மிகை மாநிலமாக மாற்றியதாகவும் தெரிவித்தார்.
விவசாயிகளுக்கு அதிமுக ஆட்சியில் 24 மணி நேரமும் இலவச மின்சாரம் வழங்கப்பட்டதாகவும் அவர் குறிப்பிட்டார்.
“விவசாயிகள் போராட்டம் நடத்துகின்றனர்”
தேர்தல் நேரத்தில் குறு, சிறு விவசாயிகளின் கடன்களை தள்ளுபடி செய்வதாக அளித்த வாக்குறுதியை அரசு முழுமையாக நிறைவேற்றவில்லை என எடப்பாடி பழனிசாமி விமர்சித்தார்.
இதனால் தமிழகம் முழுவதும் விவசாயிகள் பல்வேறு இடங்களில் போராட்டங்களை நடத்தி வருவதாகவும் அவர் கூறினார்.
திறந்தவெளியில் நெல்: அரசுக்கு கண்டனம்
டெல்டா மாவட்டங்களில் அறுவடை செய்யப்பட்ட நெல் திறந்தவெளியில் கொட்டி வைக்கப்பட்டுள்ளதால், மழையில் நனைந்து முளைத்து வீணாகி வருவதாக எடப்பாடி பழனிசாமி தெரிவித்தார்.
விவசாயிகளின் பிரச்சினைகளை தொடர்ந்து பேசும் ஒரே கட்சி அதிமுகதான் என்றும் அவர் கூறினார்.
விவசாயிகளின் பிரச்சினைகளுக்கு தீர்வு காணாமல் அவர்களின் அதிருப்தியை சம்பாதித்துக் கொண்டால், அது அடுத்த தேர்தலில் எதிரொலிக்கும் என்றும் எடப்பாடி பழனிசாமி எச்சரித்தார்.
விநாயகர் சதுர்த்தி நாளை கொண்டாட்டம்: அரசியல் கட்சி தலைவர்கள் வாழ்த்து