டிஜிட்டல் இந்தியாவின் மிகப்பெரிய சாதனையாகப் பேசப்பட்ட UPI (Unified Payments Interface) பணப் பரிவர்த்தனைகளின் மீது, மோடி அரசு மறைமுகமாகக் கட்டணம் வசூலிக்கத் திட்டமிட்டுள்ளதாக எதிர்க்கட்சிகள் கடும் கண்டனம் தெரிவித்துள்ளன. அமெரிக்க நிறுவனங்களின் அழுத்தத்திற்குப் பணிந்து, இந்தியாவின் பொருளாதார முதுகெலும்பான ‘பூஜ்ஜிய MDR’ (Zero-MDR) கொள்கையை அரசு காவு கொடுத்துவிட்டதாகக் காங்கிரஸ் தலைவர்கள் ராகுல் காந்தி மற்றும் மல்லிகார்ஜுன கார்கே ஆகியோர் பகிரங்கமாகக் குற்றம்சாட்டியுள்ளனர்.
ராகுல் காந்தியின் குற்றச்சாட்டு: “அமெரிக்காவின் அடிமையாகும் மோடி அரசு!”
UPI பரிவர்த்தனைகளுக்குக் கட்டணம் விதிக்கும் பாதையை மோடி அரசு கமுக்கமாகத் திறந்துவிட்டுள்ளதாக மக்களவை எதிர்க்கட்சித் தலைவர் ராகுல் காந்தி எச்சரித்துள்ளார். அவர் எழுப்பிய முக்கியப் புள்ளிகள்:
வியாபாரிகள் மீது விழும் சுமை: இனி, ₹2,000-க்கு மேற்பட்ட வணிகர் சார்ந்த (Merchant) UPI பரிவர்த்தனைகள் மீது வணிகர் தள்ளுபடி விகிதம் (MDR) கட்டணம் கட்டாயமாக்கப்படலாம்.
மதிப்பின் அடிப்படையில் ஆதிக்கம்: இத்தகைய பரிவர்த்தனைகள் எண்ணிக்கையில் வெறும் 5% மட்டுமே என்றாலும், மொத்த UPI பணமதிப்பில் இது சுமார் 65% பங்கைக் கொண்டுள்ளது.
மக்களின் தலையில் விழும் அடி: வாடிக்கையாளர்களிடம் நேரடியாகப் பணம் வசூலிக்கப்படாது என்று அரசு பசப்பு வார்த்தைகளைக் கூறினாலும், கடைக்காரர்கள் மீது திணிக்கப்படும் இந்தக் கட்டணம் இறுதியில் பொருட்களின் விலையேற்றமாக மாறி சாமானிய நுகர்வோரின் பையையே காலி செய்யும்.
அமெரிக்கச் சரணடைவு: இந்தியாவின் ‘பூஜ்ஜிய MDR’ கொள்கையைத் தகர்க்க அமெரிக்கப் பணப் பரிவர்த்தனை நிறுவனங்கள் நீண்ட காலமாக முயன்ற நிலையில், பிரதமர் மோடி மீண்டும் அமெரிக்காவின் அழுத்தத்திற்குப் பணிந்து சரணடைந்துள்ளார்.
மல்லிகார்ஜுன கார்கேவின் எச்சரிக்கை: “இது டிஜிட்டல் வரித் கொள்ளை!”
பணமதிப்பிழப்பு நடவடிக்கையின் போது டிஜிட்டல் பொருளாதாரத்தைக் காப்பாற்றுவதாகக் கூறிவிட்டு, இப்போது மக்களிடம் எஞ்சியிருக்கும் சொற்ப சேமிப்பையும் பறிக்க பாஜக அரசு “டிஜிட்டல் பணப்பரிவர்த்தனை வரி” முறையைக் கொண்டுவருவதாகக் காங்கிரஸ் தலைவர் மல்லிகார்ஜுன கார்கே ஆவேசப்பட்டுள்ளார்:
வானளாவிய பணவீக்கம்: மொத்த விற்பனை விலை பணவீக்கம் 10%-க்கு அருகில் உள்ள நிலையில், ஏற்கனவே திணறிவரும் மக்களின் மீது புதிய கட்டணச் சுமையை ஏற்றுவது அநீதியாகும்.
அதிகரிக்கும் கட்டணக் கொள்ளை: ₹5,000 பரிவர்த்தனைக்கு ₹25 வரையிலும், ₹10,000 பரிவர்த்தனைக்கு ₹50 வரையிலும் கட்டணம் வசூலிக்கப்பட வாய்ப்புள்ளதாகத் தகவல்கள் அம்பலமாகியுள்ளன.
நாடாளுமன்றத்திற்கு ஏமாற்றம்: UPI சேவைகளுக்கு எந்தக் கட்டணமும் விதிக்கப்படாது என்று நிதியமைச்சர் சமீபத்தில் நாடாளுமன்றத்தில் அளித்த உத்தரவாதத்தை மீறி, இந்தத் திடீர் கொள்கை மாற்றம் கொண்டுவரப்பட்டுள்ளது மக்களை ஏமாற்றும் செயலாகும்.
பணவீக்கத்தால் அல்லல்படும் மக்களுக்கு நிவாரணம் வழங்குவதற்குப் பதிலாக, மக்களின் பணத்தைப் பிக்பாக்கெட் அடிப்பதற்கான வழிகளையே மத்திய அரசு தேடிக்கொண்டிருப்பதாக எதிர்க்கட்சிகள் சாடுகின்றன. உலகத்திற்கே முன்னுதாரணமாக இருந்த இந்தியாவின் டிஜிட்டல் பரிவர்த்தனைக் கட்டமைப்பைச் சீரழிக்கும் இந்த நடவடிக்கைக்கு மத்திய அரசு என்ன பதில் சொல்லப் போகிறது என்ற கேள்வி தற்போது நாடு முழுவதும் எழுந்துள்ளது.
விநாயகர் சதுர்த்தி ஸ்பெஷல்! ஒரு கிலோ ரூ.27 ஆயிரம்… மகாராஷ்டிராவில் விற்பனையாகும் ‘தங்க கொழுக்கட்டை’!