பேரறிஞர் அண்ணாவின் பிறந்தநாளை முன்னிட்டு திருப்பூரில் நடைபெற்ற நிகழ்ச்சியில் திமுக மற்றும் அதிமுக நிர்வாகிகள் அரசியல் வேறுபாடுகளை மறந்து ஒருவருக்கொருவர் கைகுலுக்கி, இனிப்பு ஊட்டி மகிழ்ந்த சம்பவம் கவனம் பெற்றுள்ளது.
அண்ணா சிலைக்கு மரியாதை
அண்ணா பிறந்தநாளை முன்னிட்டு திருப்பூர் மத்திய மாவட்ட திமுக சார்பில் மாவட்டச் செயலாளர் செல்வராஜ் தலைமையில் நிர்வாகிகள், திருப்பூர் ரெயில் நிலையம் அருகே உள்ள அண்ணா சிலைக்கு மாலை அணிவித்து மரியாதை செலுத்தினர்.
அதே நேரத்தில், திருப்பூர் மாநகர் மாவட்ட அதிமுக சார்பில் மாவட்டச் செயலாளர் வேல்குமார் சாமிநாதன் தலைமையில் கட்சி நிர்வாகிகள், அங்கு அலங்கரித்து வைக்கப்பட்டிருந்த அண்ணாவின் உருவப்படத்திற்கு மாலை அணிவித்து மரியாதை செலுத்தினர்.
ஒரே இடத்தில் குவிந்த திமுக – அதிமுகவினர்
இரு கட்சிகளின் நிகழ்ச்சிகளும் ஒரே நேரத்தில், மிக அருகருகே நடைபெற்றதால் திமுக மற்றும் அதிமுக நிர்வாகிகள் ஒரே பகுதியில் திரண்டனர். அப்போது இரு கட்சியினரும் பொதுமக்களுக்கு போட்டி போட்டுக்கொண்டு இனிப்புகளை வழங்கி வாழ்த்துகளை தெரிவித்தனர்.
இதனால் அந்தப் பகுதியில் சிறிது நேரம் சுவாரஸ்யமான சூழல் நிலவியது.
நேருக்கு நேர் கைகுலுக்கி வாழ்த்து
அப்போது யாரும் எதிர்பாராத வகையில் திமுக மற்றும் அதிமுக மாவட்டச் செயலாளர்கள் மற்றும் நிர்வாகிகள் ஒருவரை ஒருவர் பார்த்து புன்னகைத்தனர். தொடர்ந்து நேருக்கு நேர் கைகுலுக்கி அண்ணா பிறந்தநாள் வாழ்த்துகளை பரிமாறிக் கொண்டனர்.
அதுமட்டுமின்றி, தங்களிடம் இருந்த இனிப்புகளை ஒருவருக்கொருவர் ஊட்டி மகிழ்ந்தனர். அரசியல் களத்தில் பொதுவாக எதிரும் புதிருமாக செயல்படும் இரு கட்சிகளின் நிர்வாகிகள் இவ்வாறு சகஜமாக பழகிய காட்சி அப்பகுதியில் இருந்தவர்களின் கவனத்தை ஈர்த்தது.
“அரசியல் அப்புறம்… அண்ணா பிறந்தநாள் இப்போது!”
அண்ணா பிறந்தநாளையொட்டி நடைபெற்ற இந்த சந்திப்பில் அரசியல் பாகுபாடுகளை ஒதுக்கி வைத்து இரு கட்சியினரும் நட்புடன் நடந்துகொண்டது நெகிழ்ச்சியை ஏற்படுத்தியது.
எப்போதும் அரசியல் ரீதியாக மோதிக்கொள்ளும் திமுக – அதிமுக நிர்வாகிகள், அண்ணாவின் பிறந்தநாளில் ஒன்றாக நின்று இனிப்பு பரிமாறிக் கொண்ட சம்பவம் அப்பகுதியில் பேசுபொருளாகியுள்ளது.
அஜித்தின் கார் பந்தயத்தைப் பார்க்கவே லண்டன் பயணம்: கோவி. செழியன் கடும் சாடல்!