மயிலாடுதுறை கடற்கரைப் பகுதியில் புதிய எண்ணெய் கிணறுகள் தோண்டத் தனியார் நிறுவனத்திற்கு ஒன்றிய அரசு அனுமதி வழங்கக் கூடாது என்றும், பாதுகாக்கப்பட்ட வேளாண் மண்டலத்தில் அனுமதிக்கப்படுவதைத் தமிழ்நாடு அரசு தடுத்து நிறுத்த வேண்டும் என்றும் விடுதலைச் சிறுத்தைகள் கட்சியின் (விசிக) தலைவர் தொல்.திருமாவளவன் வலியுறுத்தியுள்ளார்.
இது தொடர்பாக அவர் விடுத்துள்ள விரிவான அறிக்கை விவரம் இதோ:
சுற்றுச்சூழல் மற்றும் வாழ்வாதார அபாயம்
மயிலாடுதுறை கடற்கரையிலிருந்து கடலுக்குள் சுமார் 81 சதுர கிலோமீட்டர் பரப்பளவில் அமைந்துள்ள PY-3 எண்ணெய் வயலில், ஐந்து புதிய எண்ணெய் கிணறுகளைத் தோண்டுவதற்காக ‘ஹார்டி எக்ஸ்ப்ளோரேஷன் அன்ட் புரொடக்ஷன்’ (Hardy Exploration & Production) என்ற தனியார் நிறுவனம் ஒன்றிய அரசின் சுற்றுச்சூழல் அமைச்சகத்திடம் சுற்றுச்சூழல் அனுமதி கோரி விண்ணப்பித்துள்ளது.
மீன்வளம் மற்றும் கடல் சூழல் பாதிப்பு:
இத்தகைய கிணறுகள் அமைக்க நடத்தப்படும் நில அதிர்வு ஆய்வுகள் (Seismic Survey) மீன்களின் உணர்வு அமைப்பைப் பாதிப்பதோடு, நச்சுக் கழிவுகளால் மீன்வளம் முழுமையாக அழியும் அபாயம் உள்ளது. மேலும், இப்பகுதி கடல் ஆமைகள், பவளப்பாறைகள் மற்றும் மீன் இனப்பெருக்கம் நடைபெறும் சூழலியல் உணர்திறன் பகுதியாகும் (Ecologically Sensitive Area).
விவசாயம் பாதிப்பு:
ஏற்கனவே ONGC கிணறுகளால் கதிராமங்கலம், திருவேள்விக்குடி கிராமங்களில் நிலத்தடி நீர் குறைந்து விவசாயம் பாதிக்கப்பட்டுள்ள நிலையில், புதிய கிணறுகள் டெல்டா மக்களின் வாழ்வாதாரத்தை முற்றிலும் சிதைத்துவிடும் என விசிக எச்சரித்துள்ளது.
விசிகவின் முக்கியக் கோரிக்கைகள் – மாநில அரசிற்கு வேண்டுகோள்:
மயிலாடுதுறை மாவட்டம் தமிழ்நாட்டின் “பாதுகாக்கப்பட்ட வேளாண் மண்டலத்தில்” அமைந்துள்ளதைச் சுட்டிக்காட்டியுள்ள தொல்.திருமாவளவன், டெல்டா பகுதியில் சுற்றுச்சூழல் பாதிப்பை ஏற்படுத்தும் இத்திட்டத்தை ஒன்றிய அரசு அனுமதிப்பதைத் தமிழ்நாடு அரசு தடுத்து நிறுத்த வேண்டும் என வலியுறுத்தியுள்ளார்.
OALP முறைக்கு எதிர்ப்பு:
எண்ணெய் மற்றும் எரிவாயு உரிமம் வழங்கும் OALP (Open Acreage Licensing Programme) முறையை மாற்றி, இதுபோன்ற தொகுதிகளைத் தேர்வு செய்யும் முழு அதிகாரத்தையும் மாநில அரசுகளுக்கு வழங்கும் வகையில் முறைகள் மாற்றியமைக்கப்பட வேண்டும் எனவும் விசிக கோரிக்கை விடுத்துள்ளது.