ரஷியா – உக்ரைன் இடையிலான போர் தொடர்ந்து நீடித்து வரும் நிலையில், உக்ரைன் மீது ரஷியா நடத்திய புதிய வான்வழித் தாக்குதல்களில் 8 பேர் உயிரிழந்துள்ளதாக அந்நாட்டு அதிகாரிகள் தெரிவித்துள்ளனர்.
உக்ரைனின் பல்வேறு பகுதிகளை குறிவைத்து ரஷிய படைகள் டிரோன்கள் மற்றும் ஏவுகணைகள் மூலம் தாக்குதல் நடத்தியதாக தகவல் வெளியாகியுள்ளது. இந்த தாக்குதல்களில் பொதுமக்கள் பலர் காயமடைந்துள்ளனர்.
வடக்கு உக்ரைனில் உள்ள சுமி நகரில் குழந்தைகள் மையம் ஒன்றும் தாக்குதலுக்கு உள்ளானதாக தெரிவிக்கப்பட்டுள்ளது. இதில் 16 வயது சிறுமி உட்பட 3 பேர் உயிரிழந்ததாக உக்ரைன் உள்துறை அமைச்சர் தெரிவித்துள்ளார்.
தெற்கு பகுதியில் உள்ள சபோரிஜியா பிராந்தியத்தில் இரவு நேரத்தில் நடத்தப்பட்ட தாக்குதல்களில் 3 பேர் உயிரிழந்ததாக உக்ரைன் அதிபர் வோலோடிமிர் ஜெலென்ஸ்கி தெரிவித்துள்ளார். கீவ் நகரிலும் ரஷிய டிரோன் தாக்குதலில் ஒருவர் உயிரிழந்ததாக அவர் குறிப்பிட்டுள்ளார்.
மேலும், கருங்கடல் பகுதியை ஒட்டியுள்ள ஒடேசா பிராந்தியத்தில் நடத்தப்பட்ட மிகப்பெரிய தாக்குதலில் ஒருவர் உயிரிழந்ததாக அங்குள்ள அதிகாரிகள் தெரிவித்துள்ளனர். இந்த தாக்குதலில் குடியிருப்பு கட்டிடங்கள், கடை, ஓட்டல், மருத்துவக் கட்டிடம் மற்றும் தானியக் கிடங்கு உள்ளிட்டவை சேதமடைந்ததாக கூறப்பட்டுள்ளது.
தலைநகர் கீவ் நகரிலும் ரஷிய டிரோன்கள் மூலம் தாக்குதல்கள் நடத்தப்பட்டுள்ளன. அங்கு பல்வேறு கட்டிடங்கள் சேதமடைந்ததுடன், பொதுமக்கள் சிலர் காயமடைந்து மருத்துவமனையில் அனுமதிக்கப்பட்டுள்ளனர்.
கடந்த ஒரு வாரத்தில் மட்டும் ரஷியா உக்ரைன் மீது சுமார் 2,200 தாக்குதல் டிரோன்கள், 1,600-க்கும் மேற்பட்ட வான்வழி குண்டுகள் மற்றும் 38 ஏவுகணைகள் ஏவியுள்ளதாக ஜெலென்ஸ்கி தெரிவித்துள்ளார்.
இந்த தாக்குதல்களுக்கு மத்தியில், ரஷியா தனது ராணுவ நடவடிக்கையை தொடர்ந்து முன்னெடுக்கப் போவதாக அந்நாட்டு வெளியுறவுத்துறை அமைச்சர் செர்கெய் லாவ்ரோவ் ஐ.நா. பொதுச்சபையில் தெரிவித்துள்ளார்.
இதனிடையே, ரஷிய தாக்குதல்களில் பொதுமக்கள் வசிக்கும் பகுதிகள் மற்றும் முக்கிய கட்டமைப்புகள் குறிவைக்கப்படுவதாக உக்ரைன் குற்றம்சாட்டியுள்ளது. ரஷியா இந்த குற்றச்சாட்டை மறுத்து வருகிறது. இரு தரப்பினரும் பொதுமக்களை குறிவைப்பதாக கூறப்படும் குற்றச்சாட்டுகளை மறுத்து வருகின்றனர்.
ரஷியா – உக்ரைன் இடையிலான போரை முடிவுக்கு கொண்டுவர அமெரிக்கா உள்ளிட்ட நாடுகள் மேற்கொண்டு வரும் பேச்சுவார்த்தைகளில் இதுவரை குறிப்பிடத்தக்க முன்னேற்றம் ஏற்படவில்லை. போர் தொடர்ந்து நீடித்து வரும் நிலையில், புதிய தாக்குதல்கள் சர்வதேச அளவில் கவனத்தை பெற்றுள்ளன.
விண்வெளிக்கு செல்ல தயாராகும் பாகிஸ்தான்! சீனாவில் தீவிர பயிற்சி பெறும் 2 விமானிகள்