நடிகர் தனுஷின் 56வது திரைப்படமான ‘D56’ படத்தின் படப்பிடிப்பு பணிகள் தொடங்கியுள்ள நிலையில், இப்படத்தின் வெளியீடு குறித்த முக்கிய அறிவிப்பை படக்குழு வெளியிட்டுள்ளது. அதன்படி, ‘D56’ திரைப்படம் 2027-ம் ஆண்டு கோடை காலத்தில் திரையரங்குகளில் வெளியாகும் என அறிவிக்கப்பட்டுள்ளது.
‘லப்பர் பந்து’ திரைப்படத்தின் மூலம் கவனம் பெற்ற இயக்குநர் தமிழரசன் பச்சமுத்து, தனுஷின் 56வது படத்தை இயக்குகிறார். மதுரையை பின்னணியாகக் கொண்டு உருவாகும் இப்படத்தின் படப்பிடிப்பு பூஜை கடந்த செப்டம்பர் 25-ம் தேதி சிவகங்கை மாவட்டத்தில் உள்ள மாரநாடு கருப்பணசாமி கோவிலில் நடைபெற்றது.
இந்த பூஜை நிகழ்ச்சியில் தனுஷ், இயக்குநர் தமிழரசன் பச்சமுத்து, எஸ்.ஜே.சூர்யா, பிரீத்தி முகுந்தன், வடிவேலு உள்ளிட்ட படக்குழுவினர் கலந்து கொண்டனர். மேலும், இசையமைப்பாளர் சாய் அபயங்கரும் நிகழ்ச்சியில் பங்கேற்றார்.
‘D56’ படத்தில் தனுஷுடன் எஸ்.ஜே.சூர்யா, பிரீத்தி முகுந்தன், வடிவேலு, விஜய் பி.குமார் உள்ளிட்டோர் முக்கிய கதாபாத்திரங்களில் நடிக்கின்றனர். இப்படத்திற்கு சாய் அபயங்கர் இசையமைக்கிறார். சிதாரா என்டர்டெயின்மென்ட்ஸ் மற்றும் பிரைமார்க் புரொடக்ஷன்ஸ் இணைந்து படத்தை தயாரிக்கின்றன.
படத்தின் பூஜை நிகழ்ச்சியின்போது தனுஷ் மாரநாடு கருப்பணசாமி கோவிலுக்கு 18 அடி நீளமுள்ள அரிவாளை காணிக்கையாக வழங்கியதாகவும் தகவல் வெளியாகியுள்ளது. இதையடுத்து பூஜை நிகழ்ச்சியில் தனுஷைக் காண ஏராளமான ரசிகர்கள் திரண்டனர்.
இந்த நிலையில், படத்தின் பூஜை வீடியோவை தயாரிப்பு நிறுவனமான சிதாரா என்டர்டெயின்மென்ட்ஸ் சமூக வலைதளத்தில் வெளியிட்டுள்ளது. அதில், ‘D56 – Summer 2027 Release’ என படத்தின் வெளியீட்டு காலம் அதிகாரபூர்வமாக அறிவிக்கப்பட்டுள்ளது.
தனுஷின் அடுத்தடுத்த படங்கள் குறித்த எதிர்பார்ப்பு அதிகரித்து வரும் நிலையில், ‘D56’ படத்தின் இந்த ரிலீஸ் அப்டேட் ரசிகர்களிடையே கவனத்தை பெற்றுள்ளது.
சூரியின் ‘மண்டாடி’ வசூல் ரூ.140 கோடியை தாண்டியதா? 20 நாட்களில் இத்தனை கோடியா – படக்குழு அறிவிப்பு!