தலைமைத் தேர்தல் ஆணையர் ஞானேஷ் குமாருக்கு எதிராக டெல்லி ஜந்தர் மந்தரில் நடைபெற்ற போராட்டத்தின்போது, பெண் பத்திரிகையாளர்களிடம் காவல்துறையினர் பாலியல் துன்புறுத்தலில் ஈடுபட்டதாக கூறப்படும் புகார் பரபரப்பை ஏற்படுத்தியுள்ளது.
அக்டோபர் 3-ம் தேதி நடைபெற்ற போராட்டத்தை செய்தியாக சேகரித்துக் கொண்டிருந்த 3 பெண் பத்திரிகையாளர்கள், காவல்துறையினர் தங்களிடம் தவறாக நடந்து கொண்டதாக புகார் அளித்துள்ளனர். ஒரு பெண் பத்திரிகையாளர், காவல்துறை உதவி ஆணையர் ஒருவர் தன்னை பாலியல் ரீதியாக துன்புறுத்தியதாக குற்றம் சாட்டியுள்ளார்.
குற்றப்பிரிவுக்கு மாற்றப்பட்ட புகார்
பெண் பத்திரிகையாளர்களின் புகார்களை டெல்லி காவல்துறை விசாரணைக்காக குற்றப்பிரிவுக்கு (Crime Branch) மாற்றியுள்ளது. சம்பவம் தொடர்பான சிசிடிவி காட்சிகள் ஆய்வு செய்யப்படுவதுடன், புகார்தாரர்கள் மற்றும் சம்பந்தப்பட்டவர்களிடம் வாக்குமூலங்களும் பெறப்பட உள்ளன.
இந்த விவகாரத்தில் பத்திரிகையாளர்களின் பாதுகாப்பு மற்றும் ஊடக சுதந்திரம் தொடர்பாகவும் கேள்விகள் எழுந்துள்ளன. பத்திரிகையாளர்களை நடத்தும் விதம் குறித்து அதிருப்தி தெரிவித்துள்ள பத்திரிகை அமைப்புகள், உரிய நடவடிக்கை எடுக்க வேண்டும் என்று வலியுறுத்தியுள்ளன.
பிரியங்கா காந்தி கடும் கண்டனம்
இந்த விவகாரம் குறித்து காங்கிரஸ் பொதுச்செயலாளர் பிரியங்கா காந்தி, பிரதமர் நரேந்திர மோடி மற்றும் மத்திய உள்துறை அமைச்சர் அமித் ஷாவிடம் கேள்வி எழுப்பியுள்ளார்.
ஜந்தர் மந்தரில் செய்தி சேகரித்தபோது பெண் பத்திரிகையாளர்கள் காவல்துறையினரால் பாலியல் துன்புறுத்தலுக்கு உள்ளானதாக குற்றம் சாட்டியுள்ள நிலையில், பல பத்திரிகையாளர்கள் போராட்டம் நடத்தியபோதும் உடனடி நடவடிக்கை எடுக்கப்படவில்லை என்று அவர் தெரிவித்துள்ளார்.
பெண்களுக்கு பாதுகாப்பு வழங்க வேண்டிய காவல்துறையினரே பெண்களை அச்சுறுத்தும் சூழல் ஏற்பட்டுள்ளதாக பிரியங்கா காந்தி விமர்சித்துள்ளார். மேலும், “பெண்களிடம் இதுபோன்று நடத்துவது சரியானதா? இல்லையென்றால், இந்த விவகாரம் குறித்து ஏன் கவனம் செலுத்தவில்லை?” என பிரதமர் மோடி மற்றும் அமித் ஷாவிடம் கேள்வி எழுப்பியுள்ளார்.
இந்த விவகாரம் தொடர்பான குற்றச்சாட்டுகள் தற்போது விசாரணையில் இருப்பதால், உண்மை நிலை குற்றப்பிரிவு விசாரணையின் முடிவில் தெரியவரும் என எதிர்பார்க்கப்படுகிறது.
வாக்காளர் பட்டியலில் விடுபட்டவர்களை மீண்டும் சேர்க்க சிறப்பு முகாம் – தேர்தல் ஆணையம் அதிரடி உத்தரவு!