பிற மதத்தினர் இந்து கோவில்களுக்குள் சென்று வழிபாடு நடத்தும்போது, கோவில் நிர்வாகத்தின் உரிய விதிமுறைகளை முறையாகப் பின்பற்றுவதை உறுதி செய்யக் கோரிய வழக்கில், விதிமுறைகள் கண்டிப்பாக அமல்படுத்தப்படும் என அரசு தரப்பில் உறுதி அளிக்கப்பட்டதைத் தொடர்ந்து, வழக்கை முடித்து வைத்து உயர் நீதிமன்ற மதுரைக் கிளை உத்தரவிட்டுள்ளது.
மதுரையைச் சேர்ந்த தங்கம் வெங்கடேஷ் என்பவர் இந்த மனுவைத் தாக்கல் செய்திருந்தார். அதில், பிற மத அடையாளங்களைத் தாங்கியிருப்பவர்கள் மற்றும் இந்து மத அனுஷ்டானங்களைப் பின்பற்றாதவர்கள் கோவில்களின் கருவறைகள், மண்டபங்கள் உள்ளிட்ட பகுதிகளுக்குள் நுழைவது தொடர்பான விதிமுறைகள் மற்றும் நடைமுறைகளைத் தீவிரமாக அமல்படுத்த வேண்டும் எனக் கோரியிருந்தார்.
நீதிபதிகள் அமர்வில் விசாரணை
இந்த மனு உயர் நீதிமன்ற மதுரைக் கிளையில் நீதிபதிகள் ஜி.ஆர். சுவாமிநாதன் மற்றும் முருகன் ஆகியோர் அடங்கிய அமர்வில் விசாரணைக்கு வந்தது. அப்போது, இந்து கோவில்களுக்குள் பிற மதத்தினர் அனுமதிக்கப்படும்போது உரிய விதிமுறைகள் பின்பற்றப்படுவதாக அரசு தரப்பில் தெரிவிக்கப்பட்டது.
மேலும், நடைமுறையில் உள்ள விதிகள் முறையாக அமல்படுத்தப்படுவதாகவும் அரசு தரப்பில் விளக்கம் அளிக்கப்பட்டது.
திருவண்ணாமலை கோவில் சம்பவம் குறித்து நீதிபதிகள் கருத்து
விசாரணையின்போது, திருவண்ணாமலை கோவிலுக்குள் இஸ்லாமிய மதத்தைச் சேர்ந்த ஒருவர் தனது மத அடையாளத்துடன் சென்றதாகக் கூறப்படும் சம்பவம் சமூக வலைதளங்களில் வெளியானதை நீதிபதிகள் சுட்டிக்காட்டினர்.
இதுபோன்ற நிகழ்வுகளை எவ்வாறு ஏற்றுக்கொள்ள முடியும் எனக் கேள்வி எழுப்பிய அவர்கள், கோவில்களுக்குள் நுழைவது தொடர்பான விதிமுறைகள் முறையாகக் கடைப்பிடிக்கப்பட வேண்டியதன் அவசியத்தையும் வலியுறுத்தினர்.
மேலும், பிற மதத்தினர் இந்து கோவில்களுக்குள் சென்று வழிபாடு நடத்தும்போது, தங்களுக்கு அந்த வழிபாட்டில் நம்பிக்கை இருப்பதை உறுதிப்படுத்தும் வகையில் உரிய நடைமுறைகளைப் பின்பற்ற வேண்டும் என்றும் நீதிபதிகள் குறிப்பிட்டனர்.
அரசு தரப்பு உறுதி: வழக்கு முடித்து வைப்பு
மதுரை மீனாட்சி அம்மன் கோவிலுக்கு முதலமைச்சர் விஜய் முறைப்படி சென்றதையும், திருச்செந்தூர் கோவிலுக்குச் சென்ற அமைச்சர் ஸ்ரீநாத் தொடர்பான நடைமுறைகளையும் நீதிபதிகள் விசாரணையின்போது குறிப்பிட்டதாகத் தெரிவிக்கப்பட்டுள்ளது.
இதையடுத்து, பிற மதத்தினர் இந்து கோவில்களுக்குள் செல்லும்போது உரிய விதிமுறைகள் கண்டிப்பாகப் பின்பற்றப்படும் என அரசு தரப்பில் ஆஜரான வழக்கறிஞர் உறுதி அளித்தார்.
அரசு தரப்பின் உறுதியைப் பதிவு செய்துகொண்ட நீதிபதிகள், கோவில்களுக்குள் நுழைவது தொடர்பான விதிமுறைகளை முறையாகவும் தீவிரமாகவும் அமல்படுத்த வேண்டும் என அறிவுறுத்தி, வழக்கை முடித்து வைத்து உத்தரவிட்டனர்.