நீட் தேர்வு முறைகேட்டுக்கு பொறுப்பேற்று ஒன்றிய அமைச்சர் தர்மேந்திர பிரதான் பதவி விலகக் கோரிப் போராட்டம். மேடையில் பேசிக் கொண்டிருந்தபோது பெண் ஒருவர் அதிரடித் தாக்குதல்!
மத்திய கல்வி அமைச்சகத்தின் நீட் (NEET) தேர்வு முறைகேடுகளுக்கு முழுப் பொறுப்பேற்று ஒன்றிய கல்வி அமைச்சர் தர்மேந்திர பிரதான் உடனடியாகப் பதவி விலக வேண்டும் என்று வலியுறுத்தி, டெல்லி ஜந்தர் மந்தரில் தொடர் போராட்டம் நடைபெற்று வருகிறது. ‘கரப்பான்பூச்சி ஜனதா கட்சி’ (CJP) சார்பில் ஒருங்கிணைக்கப்பட்ட இந்த அதிரடிப் போராட்டக் களத்தில், அக்கட்சியின் நிறுவனத் தலைவர் அபிஜீத் தீப்கே மக்கள் மத்தியில் உரையாற்றிக் கொண்டிருந்த போது, திடீரென பெண் ஒருவர் அவர் மீது கருப்பு மையை வீசித் தாக்குதல் நடத்திய சம்பவம் தேசிய அளவில் பெரும் பரபரப்பை ஏற்படுத்தியுள்ளது.
நீட் முறைகேடு
ஒன்றிய அமைச்சருக்கு எதிராகத் தீவிரமடையும் போராட்டம் கடந்த சில வாரங்களாக நாடு முழுவதும் பெரும் விவாதத்தைக் கிளப்பியுள்ள நீட் தேர்வு குளறுபடிகள், வினாத்தாள் கசிவு மற்றும் தேர்வு முறை சீர்கேடுகளுக்கு எதிராக மாணவர்களும், இளைஞர்களும் தொடர்ந்து பல்வேறு கட்டப் போராட்டங்களை முன்னெடுத்து வருகின்றனர். இதன் ஒரு பகுதியாக, தில்லி ஜந்தர் மந்தர் போராட்டக் களத்தில் திரண்ட கரப்பான்பூச்சி ஜனதா கட்சியினர், ஒன்றிய கல்வி அமைச்சர் தர்மேந்திர பிரதான் தனது பதவியை ராஜினாமா செய்ய வேண்டும் என்றும், கல்வித் துறையில் முறையான சீர்திருத்தங்கள் கொண்டு வரப்பட வேண்டும் என்றும் முழக்கமிட்டு வந்தனர்.
மேடையில் அரங்கேறிய தாக்குதல்
ஜந்தர் மந்தரில் பதற்றம்! போராட்டக் களத்தில் அமைக்கப்பட்டிருந்த மேடையில், இளைஞர்கள் மற்றும் பத்திரிகையாளர்கள் மத்தியில் அக்கட்சியின் தலைவர் அபிஜீத் தீப்கே ஆவேசமாகப் பேசிக் கொண்டிருந்தார். அப்போது கூட்டத்தில் நின்றுகொண்டிருந்த அடையாளம் தெரியாத பெண் ஒருவர், திடீரென மேடையை நோக்கி முன்னேறி வந்து, தான் மறைத்து வைத்திருந்த கருப்பு மையை அபிஜீத் தீப்கேவின் முகத்திலும், உடலிலும் வீசினார். மை வீசப்பட்ட விநாடியில் மேடையில் இருந்தவர்களும், கூட்டத்தில் இருந்த தொண்டர்களும் அதிர்ச்சியடைந்தனர். இதனால் ஜந்தர் மந்தர் போராட்டக் களம் முழுவதும் ஒரு சில நிமிடங்கள் கடுமையான கூச்சலும், குழப்பமும் நிலவியது.
மை வீசிய பெண் பிடிபட்டார்
தாக்குதல் நடத்திய அந்தப் பெண்ணை அங்கிருந்த கரப்பான்பூச்சி ஜனதா கட்சியின் தொண்டர்கள் மற்றும் பாதுகாப்புப் பணியில் ஈடுபட்டிருந்த தில்லி போலிஸார் உடனடியாகப் பிடித்துக் காவல் நிலையத்திற்கு அழைத்துச் சென்றனர். அவர் யார்? எந்த அமைப்பைச் சேர்ந்தவர்? எதற்காக இந்தத் தாக்குதலை நடத்தினார்? என்பது குறித்து போலிஸார் தற்போது தீவிர விசாரணை மேற்கொண்டு வருகின்றனர். 
“இளைஞர்களின் குரலை ஒடுக்க முடியாது” – சிஜேபி உறுதி
இத்தாக்குதலுக்குப் பின் செய்தியாளர்களிடம் பேசிய கரப்பான்பூச்சி ஜனதா கட்சியின் முக்கிய நிர்வாகிகள், இத்தகைய வன்முறைச் செயல்களுக்குத் தங்களது இயக்கம் ஒருபோதும் அஞ்சாது என்று தெரிவித்தனர். இளைஞர்களின் கல்வி மற்றும் எதிர்காலத்தோடு விளையாடும் நீட் தேர்வு முறைகேடுகளுக்கு நீதி கிடைக்கும் வரையிலும், அதற்குப் பொறுப்பான ஒன்றிய அமைச்சர் தர்மேந்திர பிரதான் பதவி விலகும் வரையிலும் ஜந்தர் மந்தரில் தங்களின் அறப்போராட்டம் இன்னும் வீரியத்துடன் தொடரும் என அவர்கள் திட்டவட்டமாக அறிவித்துள்ளனர்.ஒன்றிய அமைச்சருக்கு எதிரான போராட்டத்தில், கட்சியின் முதன்மைத் தலைவர் மீதே மை வீசப்பட்ட சம்பவம் தலைநகர் அரசியல் மற்றும் மாணவர் அமைப்புகளிடையே பெரும் கொந்தளிப்பை ஏற்படுத்தியுள்ளது.