“பெண்களின் பொருளாதார சுதந்திரத்தைப் பறிக்கும் மது விற்பனை!” – சட்டமன்றத்தில் சௌமியா அன்புமணி எம்.எல்.ஏ. ஆவேச உரை

தமிழகத்தில் பெருகிவரும் மது விற்பனையால் பெண்களின் பொருளாதாரச் சுதந்திரம் முற்றிலும் பறிபோவதோடு, ஏராளமான குடும்பங்கள் நடுத்தெருவுக்கு வரும் அவல நிலை ஏற்பட்டுள்ளதாகப் பாட்டாளி மக்கள் கட்சியின் மகளிர் அணித் தலைவரும், சட்டமன்ற உறுப்பினருமான சௌமியா அன்புமணி தமிழகச் சட்டமன்றத்தில் குற்றம்சாட்டியுள்ளார்.

டாஸ்மாக் கடைகளும் பெண்களின் கண்ணீரும்

சட்டமன்றக் கூட்டத்தொடரில் உரையாற்றிய சௌமியா அன்புமணி, தீபாவளி, பொங்கல் மற்றும் புத்தாண்டு போன்ற பண்டிகைக் காலங்களில் மட்டும் தமிழ்நாட்டில் பல நூறு கோடி ரூபாய்க்கு மது விற்பனை நடைபெறுவதைச் சுட்டிக்காட்டினார்.

குழந்தைகளின் கல்விச் செலவிற்காகவும், குடும்பப் பராமரிப்பிற்காகவும் பெண்கள் சிறுகச் சிறுகச் சேர்த்துவைக்கும் சேமிப்புப் பணம் அனைத்தும் மதுக்கடைகளுக்கே சென்று சேர்கிறது. இதனால் பெண்களின் பொருளாதாரச் சுதந்திரம் கேள்விக்குறியாகியுள்ளது எனக் கவலை தெரிவித்தார். மேலும், மதுப் பழக்கத்தால் இளம் வயதிலேயே கணவனை இழந்து தவிக்கும் பெண்களின் கண்ணீருக்கு அரசாங்கம் உரிய தீர்வு காண வேண்டும் என வலியுறுத்தினார்.

போக்சோ சட்டமும் பெண்களின் பாதுகாப்பும்

தமிழகத்தில் பெண்களுக்கு எதிரான குற்றங்களைத் தடுக்கக் கூடுதல் கவனம் செலுத்தப்பட வேண்டும் எனக் குறிப்பிட்ட அவர், போக்சோ வழக்குகளை விரைவாக விசாரிக்கக் கூடுதல் சிறப்பு நீதிமன்றங்களை அமைக்க வேண்டும் என்ற அரசின் அறிவிப்புக்குத் தனது நன்றியைத் தெரிவித்துக் கொண்டார். மேலும், வழக்கு விசாரணைகளை விரைவுபடுத்த பெண் நீதிபதிகள் மற்றும் பெண் அரசு வழக்கறிஞர்களை நியமிக்க வேண்டும் என்றும், முன்னாள் முதல்வர் ஜெயலலிதா அவர்களால் கொண்டுவரப்பட்ட 13 அம்ச வழிகாட்டுதல்களை முழுமையாகப் பின்பற்ற வேண்டும் என்றும் கேட்டுக்கொண்டார்.

16 வயதுக்குட்பட்டோருக்குச் சமூக வலைதளத் தடை!

இன்றைய காலகட்டத்தில் சிறுவயதிலேயே குழந்தைகள் ஆபாசக் காட்சிகள் மற்றும் வன்முறை சார்ந்த விஷயங்களுக்கு ஆளாகி வருவதைச் சுட்டிக்காட்டிய அவர், ஆஸ்திரேலியா மற்றும் கனடா போன்ற நாடுகளைப் பின்பற்றி 16 வயதுக்கு உட்பட்ட சிறுவர்கள் சமூக வலைதளங்களைப் பயன்படுத்துவதைத் தடை செய்ய வேண்டும் எனத் தெரிவித்தார். இதற்கான சட்டப் பூர்வத் தீர்மானத்தை தமிழக அரசு ஒருமனதாக நிறைவேற்ற வேண்டும் என்றும் அவர் வலியுறுத்தினார்.

விவசாயிகள் நலன் மற்றும் தர்மபுரி மாவட்டக் கோரிக்கைகள்

தொடர்ந்து பேசிய சௌமியா அன்புமணி எம்.எல்.ஏ.:

• கூட்டுறவுப் பயிர்க்கடன்களை முழுமையாகத் தள்ளுபடி செய்ய வேண்டும்.

• விவசாயிகளுக்காக ‘உழவர் ஊதியக் குழு’ அமைக்கப்பட வேண்டும்.

• தர்மபுரி மாவட்டத்தில் உள்ள பல உயர்நிலைப் பள்ளிகளை மேல்நிலைப் பள்ளிகளாகத் தரம் உயர்த்த வேண்டும்.

• நீண்ட நாட்களாக நிலுவையில் உள்ள காவிரி – தர்மபுரி உபநீர்த் திட்டத்தை விரைந்து செயல்படுத்த வேண்டும் என அரசுக்குக் கோரிக்கை விடுத்தார்.

சட்டமன்றத்தில் மக்களுக்கான குரல்! — சௌமியா அன்புமணிக்கு கமல்ஹாசன் எக்ஸ் (X) தளத்தில் பாராட்டு!