பிரபல குறுஞ்செயலி நிறுவனமான வாட்ஸ்அப் (WhatsApp), தனது பயனர்களுக்குப் புத்தம் புதிய மற்றும் பயனுள்ள அம்சம் ஒன்றை அறிமுகம் செய்ய உள்ளது. இன்ஸ்டாகிராம் (Instagram) செயலியில் இருப்பது போன்றே, இனி வாட்ஸ்அப்பிலும் பயனர்கள் ஆன்லைனில் (Online) இருக்கும்போது அவர்களின் கணக்கிற்கு அருகில் பச்சை நிறப் புள்ளி (Green Dot) காட்டும் வசதியை வாட்ஸ்அப் சோதனை செய்து வருகிறது.
உலகளவில் கோடிக்கணக்கான மக்களால் பயன்படுத்தப்படும் வாட்ஸ்அப் செயலி, பயனர்களின் அனுபவத்தை மேம்படுத்த தொடர்ந்து பல புதிய அப்டேட்களை வழங்கி வருகிறது. அந்த வகையில், தற்போது ‘கிரீன் டாட்’ (Green Dot) என்ற புதிய குறியீட்டு அம்சத்தை வாட்ஸ்அப் கொண்டு வரவுள்ளது.
இன்ஸ்டாகிராம் பாணியில் வாட்ஸ்அப்
பொதுவாக இன்ஸ்டாகிராம் மற்றும் பேஸ்புக் மெசஞ்சர் செயலிகளில் நமது நண்பர்கள் ஆன்லைனில் இருந்தால், அவர்களின் புரோஃபைல் படத்திற்கு அருகில் ஒரு பச்சை நிறப் புள்ளி தோன்றும். அதே போன்ற ஒரு அம்சம்தான் தற்போது வாட்ஸ்அப்பிலும் சோதனை செய்யப்பட்டு வருகிறது. இந்த வசதி தற்போது முதற்கட்டமாக சில குறிப்பிட்ட பயனர்களிடம் மட்டுமே சோதிக்கப்பட்டு வருகிறது (Beta Testing).
அனைவருக்கும் எப்போது கிடைக்கும்?
இந்த சோதனைக் கட்டம் வெற்றிகரமாக முடிவடைந்தால், வரும் மாதங்களில் ஆண்ட்ராய்டு மற்றும் ஐஓஎஸ் (iOS) என அனைத்து வாட்ஸ்அப் பயனர்களின் பயன்பாட்டிற்கும் இந்த அம்சம் அதிகாரப்பூர்வமாக அறிமுகம் செய்யப்படும் என்று தெரிவிக்கப்பட்டுள்ளது. இந்த புதிய ‘கிரீன் டாட்’ அம்சம் பயன்பாட்டிற்கு வரும்போது, நாம் சேட் (Chat) செய்ய விரும்பும் நபர் ஆன்லைனில் இருக்கிறாரா இல்லையா என்பதை சாட்டிற்குள் செல்லாமலேயே, சாட் லிஸ்ட்டில் (Chat List) இருந்தே மிக எளிதாகத் தெரிந்துகொள்ள முடியும் என்பது குறிப்பிடத்தக்கது.