தேர்தல் ஆணையத்துடன் இணைந்து பாஜக தேர்தல்களில் மோசடி செய்து வாக்குகளை திருடுவதாக மக்களவை எதிர்க்கட்சி தலைவர் ராகுல்காந்தி குற்றம்சாட்டியுள்ளார்.
மக்களவை எதிர்க்கட்சித் தலைவர் ராகுல்காந்தி இன்று பிற்பகல் டெல்லியில் செய்தியாளர்களை சந்தித்து பேசினார். அப்போது, பாஜக தேர்தலைத் திருடும் பல வழிகளை பட்டியலிட்டு, விரிவான பவர்பாயிண்ட் விளக்கக்காட்சியை வழங்கினார். அப்போது ராகுல்காந்தி பேசியதாவது:- கர்நாடக மாநிலம் பெங்களூரு மத்திய நாடாளுமன்றத் தொகுதிக்கு உட்பட்ட மகாதேவ்புரா சட்டமன்றத் தொகுதி தேர்தல் முடிவுகள் குறித்து விரிவாக மேற்கொள்ளப்பட்ட ஆய்வின்போது வெளியான உண்மைகளை அவர் வெளியிட்டார். அதன்படி, மகாதேவ்புரா சட்டமன்றத் தொகுதியில் 2024 பொதுத்தேர்தல் முடிவுகள் மற்ற சட்டமன்றத் தொகுதிகளிலிருந்து முற்றிலும் மாறுபட்ட முறையைக் காட்டியது. பெங்களூரு மத்திய நாடாளுமன்றத் தொகுதிக்குள் வரும் 8 சட்டமன்றத் தொகுதிகளில், மகாதேவ்புரா சட்டமன்றத் தொகுதியின் வாக்குப்பதிவு முறை சந்தேகத்திற்குரியதாக அமைந்திருந்தது. அந்த தொகுதியில் பாஜக வேட்பாளர் 1,14,046 வாக்குகள் முன்னிலை வகித்தார். அதேவேளையில் மகாதேவ்புராவில் உள்ள மற்ற தொகுதிகளின் தோல்விகளை உள்ளடக்கியதாக இந்த நாடாளுமன்றத் தொகுதியில் பாஜக வேட்பாளர் 32,707 வாக்குகள் வித்தியாசத்தில் வெற்றி பெற்றார்.
மகாதேவபுரா சட்டமன்றத் தொகுதி வாக்காளர் பட்டியலை விரிவாக ஆராய்ந்ததில், இந்த குறிப்பிட்ட சட்டமன்றத் தொகுதியில் 1,00,250 போலி வாக்காளர்கள் இருந்தனர். இதிலிருந்து பாஜக 1,14,046 வாக்குகள் வித்தியாசத்தில் முன்னிலை வகித்தது. மகாதேவபுரா தொகுதியில் 11,965 பேர் போலி வாக்காளர்கள் கண்டறியப்பட்டனர். 40,009 வாக்காளர்கள் போலி அல்லது செல்லாத முகவரிகளைக் கொண்டிருந்தனர். ஒற்றை முகவரிகளில் 10,452 வாக்காளர்கள் பதிவு செய்யப்பட்டுள்ளனர். அதாவது ஒரு அறை வீடு போன்ற இடங்களில் 80 வாக்காளர்களைக் காட்டின. ஆனால், உண்மையில் யாரும் அங்கு வசிக்கவில்லை. வாக்காளர் பட்டியலில் செல்லாத புகைப்படங்களுடன் 4,132 வாக்காளர்கள் இருந்தனர். மேலும், புதிய வாக்காளர்களுக்கான படிவம் 6 மிகவும் தவறாகப் பயன்படுத்தப்பட்டதும் ஆய்வில் தெரியவந்தது. புதிய வாக்காளர்களின் வயது பொதுவாக 18 முதல் 25 வயது வரை இருக்க வேண்டும். ஆனால் இந்த வகையில் 98, 97, 85, 75 வயது வரை உள்ள வாக்காளர்கள் இருந்தனர். இந்த முதல் முறையாக வாக்காளர்களில் 18 முதல் 25 வயதுக்குட்பட்ட ஒரு நபர் கூட இல்லை. மகாதேவபுராவின் ஒரு சட்டமன்றத் தொகுதியில் உள்ள ஒவ்வொரு வாக்காளரையும் சரிபார்க்க சுமார் 40 பேர் கொண்ட குழுவுக்கு 6 மாதங்கள் ஆனது. இது ஒரு உதாரணம் மட்டுமே, நாட்டின் பிற பகுதிகளிலும் இதே முறைதான் என்று காங்கிரஸ் கட்சி உறுதியாக நம்புகிறது.
ஒவ்வொரு ஜனநாயகத்திலும், ஒவ்வொரு கட்சியையும் அரசுக்கு எதிரான மக்கள் மனநிலை பாதிக்கும்போது, பாஜகவுக்கு எதிராக மட்டும் அது எவ்வாறு பாதிக்காது என்பது குறித்து எனது கட்சிக்கும், அனைத்து எதிர்க்கட்சிகளும் சந்தேம் எழுகிறது. மேலும், கருத்துக் கணிப்புகள் மற்றும் தேர்தலுக்குப் பிந்தைய கருத்துக் கணிப்புகளில் காட்டப்பட்டுள்ள முடிவுகளுக்கு எதிராக தேர்தல் முடிவுகள் பெரும்பாலும் சென்று கொண்டிருந்தன. புல்வாமா தாக்குதல், பெண்களுக்கான மாதாந்திர உதவித்தொகை போன்ற காரணங்களால் பாஜகவின் வெற்றி அப்போது கூறப்பட்டது. அதே நேரத்தில் வாக்குகள் திருடப்பட்டு வடிவமைக்கப்பட்டன என்பது உண்மைதான். கடந்த காலங்களில், வாக்குச் சீட்டுகள் மூலம் தேர்தல்கள் நடத்தப்பட்டன. நாடு முழுவதும் ஒரே நாளில் வாக்களித்தது. தற்போது, தேர்தல்கள் பல மாதங்களாக இழுத்தடிக்கப்படுகிறது. இத்தகைய நீண்ட தேர்தல் அட்டவணை பின்னணியில் உள்ள நோக்கம் குறித்து வலுவான சந்தேகத்தை எழுப்பியது.
ஹரியானா மற்றும் மகாராஷ்டிராவில் ஏற்பட்ட ஆச்சரியமான சட்டமன்ற தேர்தல் முடிவுகளுக்குப் பிறகு முந்தைய சந்தேகங்கள் உறுதிப்படுத்தப்பட்டன.
மக்களவை மற்றும் சட்டமன்றத் தேர்தல்களுக்கு இடையில் மகாராஷ்டிராவில் ஒரு கோடி புதிய வாக்காளர்கள் சேர்க்கப்பட்டனர். காங்கிரஸ் மற்றும் பிற எதிர்க்கட்சிகள் மக்களவைத் தேர்தல்களில் அமோக வெற்றி பெற்றாலும், சில மாதங்களுக்குள் நடைபெற்ற சட்டமன்றத் தேர்தலில் அவர்கள் அழிக்கப்பட்டனர். மாலை 5 மணிக்குப் பிறகு மகாராஷ்டிரா சட்டமன்றத் தேர்தல்களில் வாக்காளர் எண்ணிக்கையில் அசாதாரணமான ஏற்றம் காணப்பட்டது. ஆனால், உண்மையில் வாக்குச் சாவடிகளுக்கு உள்ளேயோ அல்லது வெளியேயோ அத்தகைய மக்கள் கூட்டம் காணப்படவில்லை. இந்திய தேர்தல் ஆணையம் சிசிடிவி காட்சிகளைப் பகிர மறுத்ததைத் தொடர்ந்து சந்தேகங்கள் வலுப்பெற்றன. வாக்குப்பதிவு காட்சிகளைத் சேமித்து வைப்பதற்கான கால அவகாசத்தை ஒன்றரை மாதமாக குறைக்கும் விதியை மாற்றியதன் மூலம் தேர்தல் ஆணையம் ஒரு படி மேலே சென்றது. மகாராஷ்டிரா தேர்தல் திருடப்பட்டது. அதே நேரத்தில், இவை அனைத்தும் தேர்தல் ஆணையம் பாஜகவுடன் இணைந்து வாக்குகளை திருடுகிறது என்பதை உறுதியாக நம்ப வைத்தது.
தேர்தல் ஆணையம் ஜனநாயகத்தை அழிக்கும் பணியில் ஈடுபடக்கூடாது, மாறாக அதைப் பாதுகாக்க வேண்டும். இது இந்திய அரசியலமைப்பு சட்டம் மற்றும் இந்தியக் தேசியக்கொடிக்கு எதிராக செய்யப்படும் குற்றமாகும். மகாதேவபுராவில் உள்ள தரவு பகுப்பாய்வு ஒரு சட்டமன்றத் தொகுதியில் குற்றத்திற்கான ஆதாரங்களை வழங்கியிருந்தாலும், நாடு முழுவதும் இது செய்யப்படுகிறது என்பதை முழுமையாக நம்புகிறோம். எங்களைப் பொறுத்தவரை, சிசிடிவி காட்சிகள் மற்றும் வாக்காளர் பட்டியல் இப்போது குற்றத்திற்கான சான்றாகும். மேலும் தேர்தல் ஆணையம் அதை அழிக்க முயற்சிப்பதில் மும்முரமாக உள்ளது. நாடு தெரிந்துகொள்ள வேண்டும் என்று நான் விரும்புகிறேன், இந்த நாட்டில் தேர்தல் ஆணையத்தாலும், ஆட்சியில் இருக்கும் கட்சியாலும் மிகப்பெரிய குற்றவியல் மோசடி நிகழ்த்தப்படுகிறது, இவ்வாறு அவர் தெரிவித்தார்.