முத்தமிழறிஞர் கலைஞர் கருணாநிதியின் 8-ஆம் ஆண்டு நினைவு நாள் பொதுக்கூட்டம் சென்னை தரமணியில் நேற்று முன்தினம் மிகச் சிறப்பாக நடைபெற்றது. இக்கூட்டத்தில் திராவிடர் கழகப் பேச்சாளர் மதிவதனி ஆற்றிய எழுச்சிமிகு உரை கூட்டத்தினரிடையே பெரும் வரவேற்பைப் பெற்றது.
“மறைந்தும் தொடரும் எதிர்ப்புகள்” – மதிவதனி ஆவேசப் பேச்சு
நிகழ்ச்சியில் சிறப்புரையாற்றிய திராவிடர் கழகப் பேச்சாளர் மதிவதனி பேசுகையில், “கலைஞர் மறைந்துவிட்டார் என்பதை நாம் நம்புகிறோம்; ஆனால், அவர் உயிரோடு இருந்தபோது எத்தனை எதிர்ப்புகளைச் சந்தித்தாரோ, அதே எதிர்ப்புகளை இன்றுவரை அவர் சந்தித்துக் கொண்டிருக்கிறார். பெரியாரின் மாணவரான கலைஞரின் பெயரைக் கேட்டாலே இன்றும் சிலர் அஞ்சுகின்றனர். சில திட்டங்களில் இருந்து அவரது பெயரை நீக்கிக் கொள்ளும் அளவிற்கு அவர்கள் அச்சப்படுகின்றனர். மறைந்த ஒரு மனிதனின் மீது ஏன் இவ்வளவு காழ்ப்புணர்ச்சி?” என்று கேள்வி எழுப்பினார்.
மேலும், “ஆண்கள் கலைஞரை ஒருவேளை மறந்தாலும், பெண்கள் ஒருபோதும் அவரை மறந்துவிடக் கூடாது. அதே நன்றி உணர்ச்சியோடுதான் நாங்கள் இந்த மேடையில் நிற்கிறோம்” என்று அவர் உணர்ச்சிபெறக் குறிப்பிட்டார்.
“அறிவுச் சமூகமாக மாற்றிய திராவிட இயக்கம்”
இன்றைய இளைய தலைமுறையினர் மற்றும் சமூகச் சூழல் குறித்துப் பேசிய அவர், “எங்களுக்கு வரலாறு வேண்டாம், எந்த மணிக்கு எந்த தியேட்டர் ஷோ ஓடுகிறது என்று எதிர்பார்த்துக் காத்திருக்கும் கூட்டம் இன்றுள்ளது. ஆனால், தமிழ்நாட்டின் வீதிகளில் இன்றும் சாக்ரடீஸ், அரிஸ்டாட்டில் பற்றிப் பேசி, தமிழ் சமூகத்தை ஒரு அறிவுச் சமூகமாக மாற்றிய பெருமை திராவிட இயக்கத்தையே சாரும்” என்றார்.
திமுகவின் தற்போதைய அரசியல் நிலைப்பாடு குறித்துக் குறிப்பிடுகையில், “தேர்தலில் தோல்வி அடைந்துவிட்டதால் திமுக இனி எழ முடியாது என்கிறார்கள். ஆனால், தேர்தலில் வெற்றிபெற்றவர்களால் இன்று ஒரு இடத்தில் கூட மக்கள் கூட்டத்தைக் கூட்ட முடியவில்லை. ஆனால், தோல்வி அடைந்தவர்களோ அடுத்தடுத்து எழுச்சி மாநாடுகளையும் கூட்டங்களையும் நடத்தி வருகின்றனர்; இது கலைஞரிடம் நாங்கள் பயின்ற பயிற்சி!” என்று பெருமிதத்துடன் தெரிவித்தார்.
தகவல் தொழில்நுட்பம் மற்றும் பெண்களின் முன்னேற்றம்
ஐடி துறை மற்றும் பெண்களின் கல்வி குறித்துப் பேசிய மதிவதனி, “யார் முதலமைச்சராக வந்தால் நமக்கு என்ன, என் பிள்ளை நன்றாகப் படித்தால் போதும் என்ற கவலை மட்டுமே பெண்களிடம் இருக்கும். ஆனால், ஒரு தலைவர், ஒரு இயக்கம், ஒரு கட்சி என்ன நினைக்கிறது என்றால், தமிழ்நாட்டில் ஐடி துறை வளர வேண்டும் என்று பெருங்கனவு கண்ட ஒரே தலைவர் கலைஞர் மட்டும்தான். கலைஞர் உருவாக்கித் தந்த ஐடி துறையில் பணிபுரியும் இளைஞர்களே, கலைஞர் என்ன செய்தார் என்ற கேள்வியை மிகச் சுலபமாக நீங்கள் கேட்டுவிடலாம். ஆனால், உண்மையில் அவர் என்ன செய்தார் என்பதைத் தேடிப் பாருங்கள், படியுங்கள்” என்றார்.
தொடர்ந்து பேசிய அவர், “எத்தனையோ வன்மமும் அவதூறும் நிறைந்த இந்தக் காலத்தில், ஊழல்வாதிகள் என்று பொய்மூட்டைகளை அவிழ்த்துவிடுகிறார்கள். ஆனால், வரலாற்றில் எந்தக் குற்றமும் நிரூபிக்கப்படாத ஒரே தூய்மையான கட்சி திராவிட முன்னேற்ற இயக்கம்தான்” என்று திட்டவட்டமாகத் தெரிவித்தார்.
மருத்துவத் துறையில் புரட்சியும், சாதனைகளும்
தமிழ்நாட்டின் மருத்துவத் துறை வளர்ச்சி குறித்துக் குறிப்பிட்ட அவர், “தமிழ்நாட்டில் உறுப்பு மாற்று அறுவை சிகிச்சையைக் கொண்டுவந்தவர் கலைஞர். அதேபோல், உறுப்பு தானம் செய்வோருக்கு அரசு மரியாதை வழங்கப்படும் என்ற மகத்தான திட்டத்தைக் கொண்டுவந்தவர், கலைஞரின் மகனும் தற்போதைய முதலமைச்சருமான மு.க.ஸ்டாலின் ஆவார்.
மத்திய அரசின் உறுப்பு தானம் அதிகம் செய்யும் மாநிலங்களின் பட்டியலில் தமிழ்நாடு முதலிடம் பிடித்தது. அந்த விருதை தவெக அமைச்சர் அருண்ராஜ் பெற்றுக்கொண்டார். அடுத்த ஐந்தாண்டுகளில் இன்னும் பல விருதுகளை அவர்கள் வாங்கலாம். ஆனால், அடுத்த இருபது வருடங்களுக்குத் தேவையான தொலைநோக்குத் திட்டங்களை மு.க.ஸ்டாலின் முதலமைச்சராகி ஏற்கனவே செய்துவிட்டுச் சென்றுள்ளார்.
நீங்கள் வாங்கும் ஒவ்வொரு விருதின் பின்னேயும், அந்தத் தளத்தை உங்களுக்கு உருவாக்கித் தந்து நினைவுபடுத்துகின்ற ஒரே இயக்கம் திராவிட முன்னேற்றக் கழகம்தான்” என்று உரையை நிறைவு செய்தார். தரமணியில் நடைபெற்ற இந்த நினைவு நாள் பொதுக்கூட்டம் தொண்டர்கள் மத்தியில் பெரும் எழுச்சியை ஏற்படுத்தியுள்ளது.