நடிகர் ரவி தமிழ் சினிமாவில் வலம் வரும் முன்னணி நடிகர்களில் ஒருவர் ஆவார். இவரது நடிப்பில் சமீபத்தில் காதலிக்க நேரமில்லை எனும் திரைப்படம் வெளியாகி ஓரளவிற்கு நல்ல வரவேற்பை பெற்று வருகிறது. 
அதேசமயம் ரவி, சிவகார்த்திகேயன் நடிப்பில் உருவாகி வரும் புதிய படத்தில் வில்லனாக நடித்து வருகிறார். மேலும் JR 34 படத்தையும் கைவசம் வைத்துள்ளார். இதற்கிடையில் இவர் ஜீனி எனும் திரைப்படத்தில் நடித்திருக்கிறார். இந்த படத்தை வேல்ஸ் ஃபிலிம் இன்டர்நேஷனல் நிறுவனம் தயாரித்திருக்கிறது. இதனை அறிமுகம் இயக்குனர் அர்ஜுனன் இயக்க ஏ ஆர் ரகுமான் இதற்கு இசையமைத்திருக்கிறார். இந்த படத்தில் ரவியுடன் இணைந்து கல்யாணி பிரியதர்ஷன், தேவயானி, கிரித்தி ஷெட்டி, வாமிகா கேபி மற்றும் பலர் நடித்திருக்கின்றனர்.
பிரம்மாண்ட பட்ஜெட்டில் ஃபேண்டஸி கதைக்களத்தில் உருவாகும் இந்த படத்தின் படப்பிடிப்புகள் ஏற்கனவே நிறைவடைந்த நிலையில் படத்திலிருந்து அடுத்தடுத்த போஸ்டர்கள் வெளியாகி ரசிகர்களை கவர்ந்து வருகிறது. இந்நிலையில் தான் இந்த படம் 2025 மார்ச் மாதத்தில் திரைக்கு வரும் என ஏற்கனவே சமூக வலைதளங்களில் செய்திகள் பரவி வருகின்றன. 
அதன்படி இப்படம் 2025 மார்ச் 28ஆம் தேதி திரைக்கு வரும் என சொல்லப்படுகிறது. இது தொடர்பான அதிகாரப்பூர்வ அறிவிப்பு விரைவில் வெளியாகும் என நம்பப்படுகிறது.
சியான் விக்ரம் நடிப்பில் உருவாகி இருக்கும் வீர தீர சூரன் திரைப்படத்தையும் மார்ச் மாதம் 28ஆம் தேதி திரைக்கு கொண்டுவர படக்குழு திட்டமிட்டு வருகிறது என்பது குறிப்பிடத்தக்கது.