சூர்யா 44 படத்தின் டைட்டில் குறித்த தகவல் வெளியாகியிருக்கிறது.
நடிகர் சூர்யா கங்குவா படத்தின் ரிலீஸுக்கு பிறகு ஆர்.ஜே. பாலாஜி இயக்கத்தில் தனது 45 வது திரைப்படத்தில் நடித்து வருகிறார். இந்த படத்தின் படப்பிடிப்புகள் விறுவிறுப்பாக நடைபெற்று வருகிறது. இதற்கிடையில் சூர்யா, கார்த்திக் சுப்பராஜ் இயக்கத்தில் தனது 44வது திரைப்படத்தில் நடித்துள்ளார். தற்காலிகமாக சூர்யா 44 என்று தலைப்பு வைக்கப்பட்டிருக்கும் இந்த படத்தை சூர்யாவின் 2D நிறுவனமும், கார்த்திக் சுப்பராஜின் ஸ்டோன் பெஞ்ச் நிறுவனமும் இணைந்து தயாரிக்கிறது. சந்தோஷ் நாராயணன் இதற்கு இசையமைக்க ஸ்ரேயாஸ் கிருஷ்ணா இதன் ஒளிப்பதிவு பணிகளை மேற்கொள்கிறார். இந்த படத்தில் சூர்யாவிற்கு ஜோடியாக பூஜா ஹெக்டே நடிக்க இவர்களுடன் இணைந்து ஜெயராம், கருணாகரன், ஜோஜு ஜார்ஜ் ஆகியோர் முக்கிய கதாபாத்திரங்களில் நடித்திருக்கின்றனர். ஏற்கனவே இந்த படத்தின் படப்பிடிப்புகள் முழுவதும் நிறைவடைந்த நிலையில் படமானது அடுத்த ஆண்டு கோடை விடுமுறையில் திரைக்கு வரும் என எதிர்பார்க்கப்படுகிறது. இதற்கிடையில் (வருகின்ற டிசம்பர் 25) நாளை கிறிஸ்மஸ் தின ஸ்பெஷலாக இந்த படத்தின் டைட்டில் டீசர் வெளியாகும் என அறிவிக்கப்பட்டுள்ளது.
மேலும் கடந்த சில தினங்களுக்கு முன்னர் இந்த படத்திற்கு CULT என்ற தலைப்பு வைக்க கார்த்திக் சுப்பராஜ் திட்டமிட்டு வருவதாகவும், இந்த தலைப்பு நடிகர் அதர்வா இயக்கும் புதிய படத்தின் புதிய தலைப்பாக இருப்பதன் காரணமாக நடிகர் அதர்வா இந்த தலைப்பை தர மறுத்துவிட்டார் எனவும் செய்திகள் வெளியானது. அதை தொடர்ந்து இந்த படத்திற்கு ஜானி என்ற தலைப்பு வைக்கப்பட்டுள்ளதாக புதிய அப்டேட் வெளிவந்துள்ளது. எனவே ரசிகர்கள் பலரும் சமூக வலைதளங்களில் இது ரஜினி பட டைட்டில் என கமெண்ட் செய்து வருகின்றனர். இருப்பினும் அதிகாரப்பூர்வ அறிவிப்பு வெளியாகும் வரை பொறுத்திருந்து தான் பார்க்க வேண்டும்.