பிரபல திரைப்படத் தயாரிப்பாளரும், நகை வியாபாரியுமான எஸ்.கே. செல்வகுமார் மற்றும் அவரது மனைவி பிந்து செல்வகுமார் உள்ளிட்ட ஐந்து பேர் மீது, மும்பையைச் சேர்ந்த தங்க நகை நிறுவனத்திடம் கோடிக்கணக்கில் தங்கம் பெற்றுக்கொண்டு பணத்தை வழங்காமல் மோசடி செய்ததாகப் பொருளாதாரக் குற்றப்பிரிவு காவல்துறையினர் வழக்குப்பதிவு செய்துள்ளனர்.
விருது பெற்ற தயாரிப்பாளர்:
தமிழக கிராமப்புறங்களின் குடும்ப உறவுகளை மையமாக வைத்து வெளியான ‘மாயாண்டி குடும்பத்தார்’ திரைப்படத்தைத் தயாரித்ததன் மூலம் அறியப்பட்டவர் யுனைடெட் ஆர்ட்ஸ் நிறுவனத்தின் உரிமையாளர் எஸ்.கே. செல்வகுமார். இப்படம் 2009 ஆம் ஆண்டு தமிழக அரசின் சிறந்த திரைப்படத்திற்கான விருதையும் வென்றது குறிப்பிடத்தக்கது. திரைப்படத் தயாரிப்புடன் இணைந்து, தனது மனைவி பிந்து செல்வகுமாருடன் சேர்ந்து ‘அபீஸ் ஜெம்க்ளோவ்’ (Abhis Gemglow Jewellers Pvt Ltd) என்ற பெயரில் தங்க நகை வியாபாரமும் செய்து வந்துள்ளார்.
மோசடியின் பின்னணி:
மும்பையைச் சேர்ந்த முன்னணி ஹால்மார்க் தங்க நகை தயாரிப்பு நிறுவனமான ‘யூனிக் சேஞ்ச் அண்ட் ஜூவல்லர்ஸ் லிமிடெட்’ (Unique Chains and Jewellers Ltd) நிறுவனத்தின் உரிமையாளர் சன்யம் பிரேம் மேஹ்ரா அளித்துள்ள புகாரின் அடிப்படையில் இந்த நடவடிக்கை எடுக்கப்பட்டுள்ளது.
தொடக்கத்தில் குறிப்பிட்ட நிறுவனத்திடம் இருந்து நகைகளை வாங்கி, முறையாகப் பணத்தைச் செலுத்தி நம்பிக்கையைப் பெற்றுள்ளனர். அதன் பின்னர், கடந்த ஆண்டு டிசம்பர் மாதம் முதல் இந்த ஆண்டு ஜனவரி மாதத்திற்குள் சுமார் 14.05 கோடி ரூபாய் மதிப்பிலான 10.50 கிலோவிற்கும் அதிகமான தங்க நகைகளைப் பல கட்டங்களாகப் பெற்றுள்ளனர். ஆனால், அதற்கான நிலுவைத் தொகையைச் செலுத்தாமல் காலம் தாழ்த்தி வந்துள்ளனர்.
சோதனை மற்றும் காசோலை மோசடி:
பணத்தைத் திருப்பித் தருவதாகத் மின்னஞ்சல்கள் மூலம் உறுதியளித்த இவர்கள், பிப்ரவரி மாதம் நிலுவைத் தொகையாக 15.34 கோடி ரூபாய்க்கு காசோலைகளை வழங்கியுள்ளனர். ஆனால், அந்த காசோலைகளை வங்கியில் செலுத்தியபோது ‘ஸ்டாப் பேமெண்ட்’ (Stop Payment) உத்தரவு பிறப்பிக்கப்பட்டிருந்ததால் பணமாக்கப்படாமல் திரும்பி வந்துள்ளது. இதனைத் தொடர்ந்து, நோட்டரி சான்றளிக்கப்பட்ட உறுதிமொழிப் பத்திரத்தை அளித்தும் பணத்தைத் தராமல் ஏமாற்றியதாகப் புகாரில் தெரிவிக்கப்பட்டுள்ளது.
இருவர் கைது – தீவிர விசாரணை:
இந்த புகாரின் பேரில், மும்பை பொருளாதாரக் குற்றப்பிரிவு போலீசார் வழக்குப்பதிவு செய்து தனிப்படை அமைத்து தீவிர விசாரணை மேற்கொண்டனர். இந்நிலையில், வழக்கில் தொடர்புடைய தயாரிப்பாளரின் மனைவி பிந்து செல்வகுமார் (45) மற்றும் நிறுவனத்தின் இயக்குனர் ஆனந்தமூர்த்தி நடராஜன் (40) ஆகிய இருவரையும் கர்நாடக மாநிலம் பெங்களூருவில் வைத்து காவல்துறையினர் கைது செய்தனர்.
கைது செய்யப்பட்டவர்களிடம் விரிவான விசாரணை நடத்தவும், மோசடி செய்யப்பட்ட பணம் மற்றும் நகைகளைக் மீட்கவும் காவல்துறையினர் ஏழு நாள் காவல் கோரி விசாரணை நடத்தி வருகின்றனர். தலைமறைவாக உள்ள தயாரிப்பாளர் எஸ்.கே. செல்வகுமாரைத் தனிப்படை போலீசார் தீவிரமாகத் தேடி வருகின்றனர்.