அரேபியாவில் கார் பந்தயத்தை கண்டுகளித்த நட்சத்திர தம்பதி…
கிட்டத்தட்ட 20-ஆண்டுகளுக்கும் மேலாக சினிமாவில் பணியாற்றி வரும் நயன்தார், விஜய், ரஜினி, அஜித், சூர்யா, கார்த்தி என அனைத்து முன்னணி மற்றும் வளரும் இளம் நாயகர்களுடனும் இணைந்து நடித்திருக்கிறார் நயன்தாரா. தமிழ் மட்டுமில்லாமல், தெலுங்கிலும் முன்னணி நடிகையாக வலம் வருகிறார். தென்னிந்தியாவில் லேடி சூப்பர் ஸ்டாராக கொண்டாடப்படும் நயன், கடந்த ஆண்டு ஷாருக்கான் நடித்த ஜவான் படத்தில் நாயகியாக நடித்ததன் மூலம் பாலிவுட்டிலும் அறிமுகமானார்.
இதனிடையே, இயக்குநர் விக்னேஷ் சிவனை காதலித்து திருமணம் செய்து கொண்ட அவருக்கு, இரட்டை ஆண் குழந்தைகள் உள்ளனர். தற்போது நடிப்பு மட்டுமன்றி, அவ்வப்போது குழந்தைகளுடன் சேர்ந்து குடும்பமாக சுற்றுலா செல்கின்றனர். அந்த வகையில் தற்போது நயன்தாரா துபாய் சென்றிருந்தார். அது தொடர்பான புகைப்படங்களும் இணையத்தில் வெளியாகி வைரலாகின.
இந்நிலையில், சவுதி அரேபியாவில் கார் பந்தயம் நடைபெற்ற மைதானத்திற்கு நயன்தாராவும், விக்னேஷ் சிவனும் சென்றிருக்கின்றனர். அங்கு கார் பந்தயம் நடப்பதை இருவரும் உற்சாகமாக கண்டு களித்துள்ளனர். அங்கு புகைப்படம் எடுத்து மகிழ்ந்த இருவரும், கார் பந்தய வீடியோவையும் சமூக வலைதளங்களில் பகிர்ந்துள்ளனர். அண்மையில், மண்ணாங்கட்டி படப்பிடிப்பில் நயன்தாரா பங்கேற்றுள்ளார்.
