பிரபல தொழிலதிராக வலம் வரும் லெஜெண்ட் சரவணன் தமிழ் சினிமாவில் கடந்த 2022இல் வெளியான லெஜெண்ட் எனும் படத்தின் மூலம் நடிகராக அறிமுகமானவர். அதற்கு முன்னதாகவே தனது தொழில் ரீதியான விளம்பரங்களில் நடிக்க தொடங்கினார். அப்போதிலிருந்தே சமூக வலைதளங்களில் பலரும் இவரை உருவ கேலி செய்து பல மீம்ஸ்களை உருவாக்கி வந்தனர். இருந்த போதிலும் எதையும் பொருட்படுத்தாமல் நடிப்பதிலும் ஆர்வம் கொண்ட இவர், ஜேடி மற்றும் ஜெர்ரி ஆகியோர் இயக்கியிருந்த லெஜெண்ட் படத்தில் நடித்தார். இந்த படத்தின் ஒளிப்பதிவு, படத்தொகுப்பு, இசை போன்றவை சிறப்பாக அமைந்திருந்தது. படத்தில் இடம்பெற்ற பாடல்களும் நல்ல வரவேற்பை பெற்றது. இருப்பினும் பலவீனமான கதை படத்திற்கு போதுமான அளவில் வெற்றியை தரவில்லை. 
இந்நிலையில் அடுத்ததாக லெஜெண்ட் சரவணன், எதிர்நீச்சல், காக்கிச்சட்டை, கொடி உள்ளிட்ட படங்களை இயக்கி பிரபலமான துரை செந்தில்குமார் இயக்கத்தில் புதிய படம் ஒன்றில் நடிக்க இருப்பதாக ஏற்கனவே தகவல்கள் கசிந்திருந்தது. இந்த படத்திற்காக லெஜெண்ட் சரவணன் அறுவை சிகிச்சைகள் மேற்கொண்டு தனது லுக்கையும் மாற்றியிருக்கிறார். அதே சமயம் சில தினங்களுக்கு முன்பாக இந்த புதிய படத்தின் படப்பிடிப்புகள் 2024 பிப்ரவரி மாதத்தில் தொடங்கப்படும் என்று கூறப்பட்டது. இந்நிலையில் படத்தின் படப்பிடிப்பு தள்ளிப் போவதாக தகவல் வெளியாகி உள்ளது. அதாவது துரை செந்தில்குமார் தற்போது சூரி நடிப்பில் கருடன் எனும் திரைப்படத்தை இயக்கியுள்ளார். 
இப்படத்தை துரை செந்தில்குமார் வருகின்ற மார்ச் 29ஆம் தேதியில் வெளியிட திட்டமிட்டுள்ளாராம். அதற்கான பணிகளும் விறுவிறுப்பாக நடைபெற்று வருகிறதாம். எனவே கருடன் படத்தில் ரிலீசுக்கு பிறகு லெஜெண்ட் சரவணன் நடிக்கும் புதிய படத்தை துரை செந்தில்குமார் இயக்குவார் என்று தற்போதைய தகவல்கள் தெரிவிக்கின்றன.
மேலும் இதன் கூடுதல் தகவலாக இந்த படத்திற்கு ஜிப்ரான் இசையமைப்பாளராக கமிட் ஆகியுள்ளார் என்ற புதிய தகவலும் கிடைத்துள்ளது.