ரசிகர்கள் எதிர்பார்க்கும் ‘விடாமுயற்சி’ படத்தின் ஃபர்ஸ்ட் லுக் ரிலீஸ் எப்போது?

நடிகர் அஜித் தற்போது தனது 62 ஆவது படமான விடாமுயற்சி படத்தில் நடித்து வருகிறார். இந்தப் படத்தை தடையறத் தாக்க, தடம், கலகத் தலைவன் உள்ளிட்ட படங்களை இயக்கிய மகிழ் திருமேனி இயக்குகிறார். இந்த படத்தில் அஜித்துக்கு ஜோடியாக திரிஷா நடிக்கிறார். மேலும் இப்படத்தில் வில்லன்களாக அர்ஜுன் மற்றும் ஆரவ் ஆகியோர் நடிக்கின்றனர். அர்ஜுனுக்கு ஜோடியாக ரெஜினா நடிக்கிறார். லைக்கா ப்ரொடக்ஷன்ஸ் நிறுவனத்தின் தயாரிப்பில் உருவாகி வரும் இந்த படத்திற்கு அனிருத் இசை அமைக்கிறார். படத்தின் படப்பிடிப்புகள் சில மாதங்களுக்கு முன்பாக தொடங்கி விறுவிறுப்பாக நடைபெற்று வருகிறது. அஜர்பைஜானில் நடைபெற்று வந்த விடாமுயற்சி படத்தின் மூன்றாம் கட்ட படப்பிடிப்பு நிறைவடைந்துள்ளதாக கூறப்படுகிறது. 50 சதவீதத்துக்கும் மேலான படப்பிடிப்புகள் முடிந்து விட்டதாகவும், இனி அடுத்த கட்ட படப்பிடிப்பை வேறொரு லொக்கேஷனில் படக்குழுவினர் நடத்த திட்டமிட்டுள்ளதாகவும் தெரியவந்துள்ளது. இதற்கிடையில் கடந்த பொங்கல் தினத்தை முன்னிட்டு விடாமுயற்சி படத்தின் ஃபர்ஸ்ட் லுக் வெளியாகும் என்று ரசிகர்கள் பலரும் எதிர்பார்த்து காத்திருந்தனர். ஆனால் படம் சம்பந்தமான எந்தவித அப்டேட்டும் வெளியாகவில்லை. இந்நிலையில் விடாமுயற்சி படத்தின் பர்ஸ்ட் லுக் பிப்ரவரி இரண்டாவது வாரத்தில் வெளியாகும் என்று நம்பத் தகுந்த வட்டாரங்கள் தெரிவிக்கின்றன. எனினும் இது சம்பந்தமான அறிவிப்பு விரைவில் வெளியாகும் என்று எதிர்பார்க்கப்படுகிறது.